ନୂଆଦିଲ୍ଲୀ,୨୯।୩: IPL ୨୦୨୫ର ୮ମ ମ୍ୟାଚ ଚେନ୍ନାଇ ସୁପର କିଙ୍ଗ୍ସ (CSK) ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (RCB) ମଧ୍ୟରେ ଖେଳାଯାଇଥିଲା। ଏହି ମ୍ୟାଚରେ ଏମଏସ ଧୋନି ନିଜ ନାମରେ ଏକ ବଡ଼ ରେକର୍ଡ କରିଥିଲେ। ସେ CSK ପାଇଁ ସର୍ବାଧିକ ରନ ସ୍କୋରର ହୋଇଥିଲେ। ସେ ସୁରେଶ ରାଇନାଙ୍କୁ ପଛରେ ପକାଇ ଦେଇଛନ୍ତି। ତଥାପି, ତାଙ୍କର ଏହି ସଫଳତା ଦଳକୁ ଜିତାଇବାରେ ସାହାଯ୍ୟ କରିପାରିଲା ନାହିଁ ଏବଂ ଚେନ୍ନାଇକୁ ୫୦ରନରେ ପରାଜୟର ସାମ୍ନା କରିବାକୁ ପଡିଲା।
ଏହି ମ୍ୟାଚରେ ଧୋନି ୧୬ ବଲରେ ୩୦ ରନର ଅପରାଜିତ ଇନିଂସ ଖେଳିଥିଲେ। ଏହା ସହିତ, ସେ IPLରେ CSK ପାଇଁ ସର୍ବାଧିକ ରନ ସ୍କୋରର ହୋଇଗଲେ। ଧୋନି ଏପର୍ଯ୍ୟନ୍ତ CSK ପାଇଁ ମୋଟ ୪୬୯୯ ରନ କରିଛନ୍ତି। ଏହି ମାଇଲଖୁଣ୍ଟରେ ପହଞ୍ଚିବା ପାଇଁ ଧୋନି ୨୩୬ଟି ମ୍ୟାଚ ନେଇଥିଲେ। ପୂର୍ବରୁ ଏହି ରେକର୍ଡ ସୁରେଶ ରାଇନାଙ୍କ ନାମରେ ଥିଲା, ଯିଏ ୧୭୬ ମ୍ୟାଚରେ ୪୬୮୭ ରନ କରିଥିଲେ। ଧୋନି ଏବେ CSKର ସର୍ବକାଳୀନ ସର୍ବାଧିକ ସ୍କୋରର ହୋଇସାରିଛନ୍ତି।
ଏହି ମ୍ୟାଚରେ RCB ପ୍ରଥମେ ବ୍ୟାଟିଂ କରି ୧୯୬/୭ ର ଏକ ଦୃଢ଼ ସ୍କୋର କରିଥିଲା। ଜବାବରେ, CSK କେବଳ ୧୪୬/୮ କରିପାରିଥିଲା ଏବଂ ୫୦ରନରେ ପରାସ୍ତ ହୋଇଥିଲା। ଏହି ବିଜୟ ଆରସିବି ପାଇଁ ସ୍ବତନ୍ତ୍ର ଥିଲା କାରଣ ସେମାନେ ୧୭ ବର୍ଷ ପରେ ଚେନ୍ନାଇର ଘରୋଇ ପଡ଼ିଆ ଚେପକ ଷ୍ଟାଡିୟମରେ ଏକ ମ୍ୟାଚ ଜିତିଥିଲେ।
ଆରସିବି ପାଇଁ ଅଧିନାୟକ ରଜତ ପାଟିଦାର ଚମତ୍କାର ବ୍ୟାଟିଂ କରିଥିଲେ ଏବଂ ୩୨ବଲ ରେ ୫୧ ରନ କରିଥିଲେ। ତାଙ୍କ ବ୍ୟତୀତ ଫିଲ ସଲ୍ଟ (୩୨ ରନ, ୧୬ ବଲ) ଏବଂ ବିରାଟ କୋହଲି (୩୧ ରନ, ୩୦ ବଲ) ମଧ୍ୟ ଭଲ ଯୋଗଦାନ ଦେଇଥିଲେ। ସିଏସକେ ବୋଲରମାନେ ଆରସିବି ବ୍ୟାଟସମ୍ୟାନଙ୍କୁ ରୋକିବାରେ ବିଫଳ ହୋଇଥିଲେ ଏବଂ ବେଙ୍ଗାଲୁରୁ ଏକ ବଡ଼ ସ୍କୋର କରିଥିଲା।
