ମୁମ୍ବାଇ, ୨୩।୯: ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଭାରତ ଓ ଶ୍ରୀଲଙ୍କା ମଧ୍ୟରେ ୨୦୧୧ ଆଇସିସି ବିଶ୍ୱକପ୍ ଫାଇନାଲ ମ୍ୟାଚ୍ ଖେଳାଯାଇଥିଲା। ଏହି ମ୍ୟାଚ୍ରେ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ଛକା ମାରି ଭାରତକୁ ବିଶ୍ୱ ବିଜେତା କରାଇଥିଲେ। ଧୋନୀ ଛକା ମାରି ଜିତାଇଥିବା ବଲ୍ଟି ଗ୍ୟାଲେରୀ ମଧ୍ୟରେ ପଡ଼ିଥିଲା। ଯାହା ଆଜି ପର୍ଯ୍ୟନ୍ତ ମଧ୍ୟ ମିଳିନାହିଁ। ତେବେ ଧୋନୀଙ୍କ ସମ୍ମାନାର୍ଥେ ସେହି ବଲ୍କୁ ତାଙ୍କୁ ପ୍ରଦାନ କରିବା ଲାଗି ମୁମ୍ବାଇ କ୍ରିକେଟ୍ ଆସୋସିଏଶନ (ଏମ୍ସିଏ) ଏବେ ସନ୍ଧାନରେ ରହିଛି। ଏହି ସମୟରେ ଏମ୍ସିଏକୁ ସହାୟତା କରିବା ଲାଗି ସୁନୀଲ ଗାଭାସ୍କର ଆଗେଇ ଆସିଛନ୍ତି।
କହିଛନ୍ତି, ସେ ସେହି ବ୍ୟକ୍ତିଙ୍କୁ ଜାଣିଛନ୍ତି, ଯାହା ପାଖକୁ ସେହି ବଲ୍ଟି ଯାଇ ପଡ଼ିଥିଲା। ଜଣେ ସାଙ୍ଗଙ୍କ ମାଧ୍ୟମରେ ସେ ସେହି ବଲ୍ ରଖିଥିବା ବ୍ୟକ୍ତିଙ୍କ ସମ୍ପର୍କରେ ସୂଚନା ପାଇଛନ୍ତି। ଏମ୍ସିଏରୁ ମିଳିଥିବା ସୂଚନା ଅନୁଯାୟୀ, ଧୋନୀଙ୍କ ସେହି ଛକାଟି ‘ଏଲ୍’ ବ୍ଲକର ୨୧୦ ନମ୍ବର ସିଟରେ ପଡ଼ିଥିଲା। ଏହା ସହିତ ସେହି ବ୍ୟକ୍ତିଙ୍କ ନାମ ଏବେ ଜଣାପଡ଼ିଛି, ଯାହାଙ୍କ ନାମରେ ଏହି ସିଟ୍ ରିଜର୍ଭ ରହିଥିଲା। ଗାଭାସ୍କର ମଧ୍ୟ କହିଛନ୍ତି ଯେ, ବିଶ୍ୱକପ୍ ଫାଇନାଲରେ ସେହି ୨୧୦ ନମ୍ବର ସିଟ୍ରେ ବସିଥିବା ବ୍ୟକ୍ତିଙ୍କୁ ସେ ଜାଣିଛନ୍ତି। ସେହି ବ୍ୟକ୍ତିଙ୍କ ପାଖରେ ବଲ୍ ରହିଛି। ଏମ୍ସିଏ ଏବେ ଗାଭାସ୍କରଙ୍କ ସହାୟତାରେ ସେହି ବ୍ୟକ୍ତିଙ୍କ ନିକଟରେ ପହଞ୍ଚିବାର ସମ୍ଭାବନା ରହିଛି। ଏଠାରେ ଉଲ୍ଲେଖଯୋଗ୍ୟ, ଗତ ମାସରେ ଧୋନୀ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ନେଇଥିଲେ। ଏହାପରେ ଏମ୍ସିଏ ଧୋନୀଙ୍କ ସମ୍ମାନାର୍ଥେ ସେହି ବଲ୍ ଓ ସିଟ୍କୁ ଧୋନୀଙ୍କ ନାମରେ କରିବାକୁ ଚିନ୍ତା କରିଛି। କିନ୍ତୁ ବଲ୍ଟି ମିଳି ନ ଥିବାରୁ ଏହା ଏମ୍ସିଏ ପାଇଁ ଚିନ୍ତାର କାରଣ ହୋଇଛି।