ଚେନ୍ନାଇ, ୫ା୩ (ପି.ଟି.)-ଆସନ୍ତା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ସିଜନ ପାଇଁ ଚେନ୍ନାଇନ ସୁପର କିଙ୍ଗ୍ସ (ସିଏସ୍କେ)ର ଟ୍ରେନିଂ କ୍ୟାମ୍ପ ମାର୍ଚ୍ଚ ୯ରୁ ଆରମ୍ଭ ସମ୍ଭାବନା ରହିଛି। ଏଥିରେ ଯୋଗ ଦେବାଲାଗି ଦଳର ଅଧିନାୟକ ମହେନ୍ଦ୍ର ସିଂ ଧୋନୀ ବୁଧବାର ଚେନ୍ନାଇରେ ପହଞ୍ଚତ୍ସାରିଛନ୍ତି। ସେ ୫ ଦିନ କ୍ୱାରାଣ୍ଟାଇନ୍ରେ ରହିବେ। ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ଅମ୍ବାଟି ରାୟୁଡୁ ମଧ୍ୟ ଆସିସାରିଥିବା ସିଏସ୍କେ ସିଇଓ କେ.ଏସ୍. ବିଶ୍ୱନାଥନ ପ୍ରକାଶ କରିଛନ୍ତି। ଟ୍ରେନିଂ ପୂର୍ବରୁ ସମସ୍ତ ଖେଳାଳି ୫ ଦିନି କ୍ୱାରାଣ୍ଟାଇନ୍ରେ ରହିବେ। ଆଇପିଏଲ୍-୧୪ ସଂସ୍କରଣର କାର୍ଯ୍ୟସୂଚୀ ଓ ଭେନ୍ୟୁ ଏପର୍ଯ୍ୟନ୍ତ ସ୍ଥିର ହୋଇନାହିଁ। ଏହି ବ୍ୟୟବହୁଳ ଟି୨୦ ଲିଗ୍ ପାଇଁ ଚଳିତ ବର୍ଷ ହୋଇଥବବା ମିନି ଖେଳାଳି ନିଲାମରେ ସିଏସ୍କେ ଇଂଲଣ୍ଡ ଅଲରାଉଣ୍ଡର ମୋଇନ ଅଲିଙ୍କୁ ୭କୋଟି ଟଙ୍କାରେ କ୍ରୟ କରିଛି। ଏହାଛଡ଼ା କର୍ନାଟକ ଅଲରାଉଣ୍ଡର କେ. ଗୋଥାମ (୯.୨୫ କୋଟି ଟଙ୍କା) ଏବଂ ଚେତେଶ୍ୱର ପୂଜାରା (୫୦ ଲକ୍ଷ ଟଙ୍କା)ଙ୍କୁ ମଧ୍ୟ କ୍ରୟ କରିଛି। ଦଳ ଅନଞ କେତେଜଣ ଖେଳାଳିଙ୍କୁ ମଧ୍ୟ ନେଇଛି। ସେମାନଙ୍କ ମଧ୍ୟରେ ରହିଛନ୍ତି ତାମିଲନାଡୁ ବ୍ୟାଟ୍ସମ୍ୟାନ ସି. ହରି ନିଶାନ୍ଥ, ହରିଶଙ୍କାର ରେଡ୍ଡୀ ଓ ଭଗନ ବର୍ମା। ଏହି ସମସ୍ତ ଖେଳାଳିଙ୍କୁ ଜଣ ପିଛା ୨୦ ଲକ୍ଷ ଟଙ୍କା ଲେଖାଏଁ କ୍ରୟ କରିଛି। ଗତ ଆଇପିଏଲରେ ସିଏସ୍କେ ଆଶାନୁରୂପ ପ୍ରଦର୍ଶନ କରିପାରି ନ ଥିଲା। ଦଳ ପ୍ରଥମ ଥର ପ୍ଲେ-ଅଫ୍ ପାଇଁ ଯୋଗ୍ୟତା ହାସଲ କରିପାରି ନ ଥିଲା।
