ଦୁବାଇ,୧୦।୧୦(ପି.ଟି.): ତୃତୀୟ ଡବଲ ହେଡରର ଦ୍ୱିତୀୟ ମ୍ୟାଚ୍ରେ ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ଓ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଶନିବାର ପରସ୍ପରକୁ ଭେଟିବେ। ବ୍ୟାଟିଂକୁ ନେଇ ଉଭୟ ଦଳ ସଂଘର୍ଷ କରୁଛନ୍ତି। କୋଲକାତା ନାଇଟ୍ ରାଇଡର୍ସ ବିପକ୍ଷରେ ବ୍ୟାଟିଂରେ ସାଂଘାତିକ ଭାବେ ଫେଲ ମାରିଥିବାରୁ କେଦାର ଯାଦବଙ୍କ ଚୟନ ନେଇ ଟିମ୍ ମ୍ୟାନେଜମେଣ୍ଟ ନିଷ୍ପତ୍ତି ନେବ। ବୁଧବାର ଚେନ୍ନାଇ ମାତ୍ର ୧୦ ରନରେ କୋଲକାତାଠାରୁ ପରାସ୍ତ ହୋଇଥିଲା। ନିହାତି ମାମୁଲି ବ୍ୟାଟିଂ କରି କେଦାର ବେଶ୍ ସମାଲୋଚିତ ହୋଇଛନ୍ତି। ଟପ୍ ଅର୍ଡରରେ ଶେନ୍ ଓ୍ବାଟସନ ଓ ଫାଫ୍ ଡୁପ୍ଲେସି ଭଲ ପ୍ରଦର୍ଶନ କରୁଥିଲେ ମଧ୍ୟ ମିଡିଲ ଅର୍ଡରରେ ବ୍ୟାଟ୍ସମ୍ୟାନମାନେ ଅସ୍ଥିର ପ୍ରଦର୍ଶନ କରୁଛନ୍ତି। ନିଜେ ଧୋନୀ ମଧ୍ୟ ଶ୍ରେଷ୍ଠ ଫର୍ମରେ ନାହାନ୍ତି। କେଦାରଙ୍କୁ ବାଦ୍ ଦିଆଗଲେ ଋତୁରାଜ ଗାଏକ୍ୱାଡ କିମ୍ବା ଏନ୍. ଜଗଦୀଶନ ଦଳରେ ସାମିଲ ହୋଇପାରିନ୍ତି। ୨୦୧୮ରୁ ଏହି ଦୁଇ ଖେଳାଳି ବେଞ୍ଚ୍ରେ ବସିଆସୁଛନ୍ତି। ବ୍ୟାଟିଂରେ ସଂଘର୍ଷ କରୁଥିଲେ ମଧ୍ୟ ଚେନ୍ନାଇର ବୋଲିଂରେ ସୁଧାର ଆସିଛି। ପୀୟୂଷ ଚାଓ୍ବଲାଙ୍କ ବଦଳରେ ଦଳରେ ସ୍ଥାନ ପାଇଥିବା କର୍ନ ଶର୍ମା ପ୍ରଭାବୀ ବୋଲିଂ କରି ୨ ଉଇକେଟ ନେଇଛନ୍ତି। ଦ୍ରୁତ ବୋଲର ଦୀପକ ଚହର, ସାମ କୁରାନ ଓ ଶାର୍ଦ୍ଦୁଳ ଠାକୁରଙ୍କ ଉପରେ ଧୋନୀ ପୁଣି ଭରସା କରିବେ।
ଅପରପକ୍ଷରେ ବାଙ୍ଗାଲେର ବ୍ୟାଟିଂ ଲାଇନ୍ ଇତିମଧ୍ୟରେ ବେଶ ଦୃଢ ହୋଇଛି। ରାଜସ୍ଥାନ ରୟାଲ୍ସ ବିପକ୍ଷରେ ଅଧିନାୟକ ବିରାଟ କୋହଲି ଦମ୍ଦାର ପ୍ରଦର୍ଶନ କରି ଫର୍ମକୁ ଫେରିଛନ୍ତି। ଯୁବ ଓପନର ଦେବଦତ୍ତ ପଡିକାଲ, ଅଭିଜ୍ଞ ଏବି ଡିଭଲର୍ସ, ଆରୋନ ଫିଞ୍ଚ୍ ଟପ୍ ଅର୍ଡରରେ ବାଙ୍ଗାଲୋର ପାଇଁ ଅଧିକ ରନ୍ ସଂଗ୍ରହ କରିବେ ବୋଲି ଆଶା କରାଯାଉଛି। ତେବେ ବୋଲିଂ ନେଇ କୋହଲି ଚିନ୍ତିତ ଥିବେ। ଯଦିଓ ଲେଗ୍ ସ୍ପିନର ୟୁଜବେନ୍ଦ୍ର ଚହଲ ଭଲ ପ୍ରଦର୍ଶନ କରୁଛନ୍ତି। ଓ୍ବାଶିଂଟନ ସୁନ୍ଦର ମଧ୍ୟ ଭଲ ପ୍ରଦର୍ଶନ କରୁଛନ୍ତି। ତେବେ ଦ୍ରୁତ ବୋଲର ଉମେଶ ଯାଦବ, ମହମ୍ମଦ ସିରାଜ ଓ ନବଦୀପ ସଇନି ଅତ୍ୟଧିକ ରନ ବ୍ୟୟ କରୁଛନ୍ତି। ଶ୍ରୀଲଙ୍କା ଦ୍ରୁତ ବୋଲର ଇସିରୁ ଉଡାନା ସାମିଲ ହେବା ପରେ ଦଳରେ ସନ୍ତୁଳନ ଆସିଛି। ବାଙ୍ଗାଲୋରର ବୋଲିଂକୁ ସଂଘର୍ଷ କରୁଥିବା ଚେନ୍ନାଇ ବ୍ୟାଟ୍ସମ୍ୟାନ କିପରି ସାମ୍ନା କରୁଛନ୍ତି ତାହା ଉପରେ ଏହି ମୁକାବିଲାର ଫଳାଫଳ ନିର୍ଭର କରିବ। ମୋଟ ଉପରେ ମ୍ୟାଚ୍ ରୋମାଞ୍ଚକ ହେବ ବୋଲି ଆଶା କରାଯାଉଛି।