![](https://www.dharitri.com/wp-content/uploads/2024/04/cc.jpg)
ମୁମ୍ବାଇ,୧୫।୪: ଚେନ୍ନାଇର ସୁପର କିଙ୍ଗ୍ସ (ସିଏସକେ)ର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ୱାଙ୍ଖଡେରେ ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚରେ ପ୍ରବେଶ କରିବା ମାତ୍ରେ ତାଙ୍କ ନାମରେ ଏକ ବିଶେଷ ସଫଳତା ହାସଲ କରିଥିଲେ। ଟି-୨୦ ଇତିହାସରେ ଯେକୌଣସି ଦଳ ପାଇଁ ଏହା ଧୋନୀଙ୍କ ୨୫୦ ତମ ମ୍ୟାଚ ଥିଲା। ଭାରତୀୟ କ୍ରିକେଟ ଇତିହାସର ଅନ୍ୟତମ ଶ୍ରେଷ୍ଠ ଖେଳାଳି ଧୋନ ଏହି ପ୍ରସଙ୍ଗରେ ପୂର୍ବତନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ(ଆରସିବି) ଅଧିନାୟକ ବିରାଟ କୋହଲିଙ୍କ ସମକକ୍ଷ ହୋଇଛନ୍ତି। ନିକଟରେ କୋହଲି ଆରସିବି ପାଇଁ ୨୫୦ମ୍ୟାଚ ଖେଳିଥିଲେ। ଏହି ଦୁଇ ଖେଳାଳିଙ୍କ ବ୍ୟତୀତ ଏପର୍ଯ୍ୟନ୍ତ କେହି ଏହି ସଫଳତା ହାସଲ କରିପାରି ନାହାଁନ୍ତି।
ଧୋନୀ ଆଇପିଏଲ ଏବଂ ଚାମ୍ପିଅନ୍ସ ଲିଗରେ ସିଏସକେ ପାଇଁ ଖେଳିଛନ୍ତି। ଅବଶ୍ୟ ଧୋନୀ ଦୁଇଟି ସିଜିନ୍ ପାଇଁ ରାଇଜିଂ ପୁଣେ ସୁପରଜିଆଣ୍ଟସ ପ୍ରତିନିଧିତ୍ୱ କରିଥିଲେ କାରଣ ଦୁଇ ବର୍ଷ ପାଇଁ ସିଏସକେକୁ ନିଷେଧ କରାଯାଇଥିଲା। ଧୋନ ୨୦୦୮ରେ ଆଇପିଏଲ ଆରମ୍ଭରୁ ଚେନ୍ନାଇ ସୁପର କିଙ୍ଗ୍ସ ସହିତ ଜଡିତ ଥିଲେ। ପ୍ରଥମ ସିଜିନ ପାଇଁ ଅନୁଷ୍ଠିତ ନିଲାମରେ ସିଏସକେ ଧୋନୀଙ୍କୁ କିଣିଥିଲା।
ଧୋନୀ ଏହି ଟୁର୍ନାମେଣ୍ଟର ସବୁଠାରୁ ସଫଳ ଅଧିନାୟକ। ତାଙ୍କ ନେତୃତ୍ୱରେ ଚେନ୍ନାଇ ସୁପର କିଙ୍ଗ୍ସ ପାଞ୍ଚ ଥର ଆଇପିଏଲ ଟାଇଟଲ ଜିତିଛି। ଧୋନୀଙ୍କ ଅଧିନାୟକତ୍ୱରେ ସିଏସକେ ଦଳ ୨୦୧୦, ୨୦୧୧, ୨୦୧୮, ୨୦୨୧ ଏବଂ ୨୦୨୩ରେ ବିଜୟୀ ହୋଇଛି। ଧୋନୀଙ୍କ ନେତୃତ୍ୱ ଦକ୍ଷତା କେତେ ଶକ୍ତିଶାଳୀ ତାହା ଏହା ଦର୍ଶାଏ। ତେବେ ଆଇପିଏଲ ୨୦୨୪ ସିଜିନ୍ ଆରମ୍ଭର ଠିକ ପୂର୍ବରୁ ଧୋନୀ ସିଏସକେ୍ର କମାଣ୍ଡ ଛାଡିଥିଲେ ଏବଂ ତାଙ୍କ ସ୍ଥାନରେ ଋତୁରାଜ ଗାଇକ୍ୱାଡ ଏହି ସିଜନରେ ସିଏସକେର ଅଧିନାୟକତ୍ୱ କରୁଛନ୍ତି।