ରାଜକୋଟ,୧୫।୨: ରାଜକୋଟରେ ଭାରତୀୟ ଅଧିନାୟକ ରୋହିତ ଶର୍ମା ଏକ ଶତକ ହାସଲ କରିଥିଲେ। ସେ ନିଜ ଟେଷ୍ଟ କ୍ୟାରିୟରର ୧୧ତମ ଶତକକୁ ୧୫୭ ବଲରେ ପୂରଣ କରିଥିଲେ। ରାଜକୋଟରେ ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟରେ ଗୋଟିଏ ସମୟରେ ଭାରତୀୟ ଦଳ ୩୩ ରନରେ ୩ଟି ଉଇକେଟ ହରାଇଥିଲା। ଏହା ପରେ ରୋହିତ ରବୀନ୍ଦ୍ର ଜାଡେଜାଙ୍କ ସହ ଚତୁର୍ଥ ଉଇକେଟ ପାଇଁ ୨୦୪ ରନ ରେକର୍ଡ ଭାଗିଦାରୀ କରି ଭାରତକୁ ଏକ ଶକ୍ତିଶାଳୀ ସ୍ଥିତିରେ ରଖିଥିଲେ।
ଭାରତ ପାଇଁ ଶତକ ସ୍କୋର କରିବାରେ ସେ ୧୫ତମ ସ୍ଥାନକୁ ଆସିଛନ୍ତି। ଏହି ଫର୍ମାଟରେ ସଚିନ ତେନ୍ଦୁଲକର ସର୍ବାଧିକ ଶତକ ସ୍କୋର କରିଥିଲେ। ତାଙ୍କ ନାମରେ ୫୧ ଶତକ ଅଛି। ଜୁଲାଇ ୨୦୨୩ ପରେ ରୋହିତ ଟେଷ୍ଟରେ ତାଙ୍କର ପ୍ରଥମ ଶତକ ହାସଲ କରିଛନ୍ତି।
ରୋହିତ ଆଜି ତାଙ୍କ ଇନିଂସରେ ୩ଟି ଛକା ମାରିଥିଲେ। ଏହା ସହ ସେ ଟେଷ୍ଟରେ ସର୍ବାଧିକ ଛକା ମାରିବା ମାମଲାରେ ପୂର୍ବତନ ଭାରତୀୟ ଟେଷ୍ଟ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ପଛରେ ପକାଇ ଦେଇଛନ୍ତି। ଟେଷ୍ଟରେ ଦ୍ୱିତୀୟ ସର୍ବାଧିକ ଛକା ମାରିଥିବା ହିଟମ୍ୟାନ ଭାରତୀୟ ବ୍ୟାଟ୍ସମ୍ୟାନ ହୋଇଛନ୍ତି। ତାଙ୍କ ନାମରେ ୮୦ଟି ଛକା ଅଛି। ଧୋନୀଙ୍କ ନାମରେ ୭୮ ଛକା ଥିଲା। ବର୍ତ୍ତମାନ ରୋହିତ କେବଳ ବୀରେନ୍ଦ୍ର ସେହ୍ବାଗଙ୍କ ପଛରେ ଅଛନ୍ତି। ସେହ୍ବାଗ ତାଙ୍କ ଟେଷ୍ଟ କ୍ୟାରିୟରରେ ୯୧ ଛକା ମାରିଥିଲେ।
ସଚିନ ତେନ୍ଦୁଲକର ଟେଷ୍ଟରେ ୬୯ ଛକା ମାରିଥିଲେ। ଏଥି ସହ କପିଲ ଦେବ ୬୧ ଛକା ସହ ପଞ୍ଚମ ସ୍ଥାନରେ ଏବଂ ରବିନ୍ଦ୍ର ଜାଡେଜା ୬୦ଟି ଛକା ସହ ଷଷ୍ଠ ସ୍ଥାନରେ ଅଛନ୍ତି। ସାମଗ୍ରିକ ଟେଷ୍ଟରେ ସର୍ବାଧିକ ଛକା ମାରିବାର ରେକର୍ଡ ବେନ ଷ୍ଟୋକ୍ସଙ୍କ ନାମରେ ଅଛି। ଷ୍ଟୋକ୍ସ ୧୨୮ଛକା ମାରିଛନ୍ତି। ୧୦୭ ଛକା ସହ ବ୍ରାଣ୍ଡନ ମ୍ୟାକକୁଲମ ଦ୍ୱିତୀୟ ସ୍ଥାନରେ ଏବଂ ଆଡାମ ଗିଲକ୍ରିଷ୍ଟ ୧୦୦ ଛକା ସହ ତୃତୀୟ ସ୍ଥାନରେ ଅଛନ୍ତି। ଟେଷ୍ଟରେ ସର୍ବାଧିକି ଛକା ମାରିବାରେ ରୋହିତ ମୋଟ ୧୬ତମ ସ୍ଥାନରେ ଅଛନ୍ତି।