ଆବୁଧାବି: ଆସନ୍ତା ବର୍ଷ ମଧ୍ୟ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳିବେ ମହେନ୍ଦ୍ର ସିଂ ଧୋନୀ। ରବିବାର କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷରେ ଚଳିତ ସିଜନର ଶେଷ ମ୍ୟାଚ ଖେଳିବା ପୂର୍ବରୁ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଅଧିନାୟକ ଏହା ସ୍ପଷ୍ଟ କରିଛନ୍ତି। ଅନ୍ତର୍ଜାତୀୟ କ୍ରିକେଟରୁ ଅବସର ନେଇସାରିଥିବା ଧୋନୀଙ୍କୁ ପରବର୍ତ୍ତୀ ଆଇପିଏଲ୍ରେ ଦେଖିବାକୁ ମିଳିବ କି ନା ସେ ନେଇ ତାଙ୍କ ଅଗଣିତ ପ୍ରଶଂସକଙ୍କ ମନରେ ଉତ୍ସୁକତା ଥିଲା। ଟସ୍ ବେଳେ ନ୍ୟୁଜିଲାଣ୍ଡର ପୂର୍ବତନ ପେସ୍ ବୋଲର ଡ୍ୟାନି ମୋରିସନଙ୍କ ପ୍ରଶ୍ନର ଉତ୍ତରରେ ଧୋନୀ କହିଥିଲେ, ଆଇପିଏଲ୍ରେ ଏହା ତାଙ୍କର ଶେଷ ମ୍ୟାଚ ନୁହେଁ। ସେ ଆସନ୍ତା ସିଜନରେ ମଧ୍ୟ ସିଏସ୍କେ ତରଫରୁ ଖେଳିବେ। କୋଭିଡ୍ ଯୋଗୁ ଚଳିତବର୍ଷ ଅକ୍ଟୋବର-ନଭେମ୍ବରରେ ହେବାକୁଥିବା ଟି୨୦ ବିଶ୍ୱକପ୍କୁ ସ୍ଥଗିତ ରଖାଯିବା ପରେ ଅଗଷ୍ଟ ୧୫ରେ ୩୯ ବର୍ଷୀୟ ଧୋନୀ ଅନ୍ତର୍ଜାତୀୟ କ୍ରିକେଟରୁ ତାଙ୍କର ଅବସର ଘୋଷଣା କରିଥିଲେ। ସେ ଅତିକମ୍ରେ ଦୁଇ ସିଜନ ଆଇପିଏଲ୍ ଖେଳିବେ ବୋଲି ଆଶା କରାଯାଉଥିଲା। ଧୋନୀ ଶେଷ ଥର ପାଇଁ ଭାରତ ତରଫରୁ ନ୍ୟୁଜିଲାଣ୍ଡ ବିପକ୍ଷ ୨୦୧୯ ବିଶ୍ୱକପ୍ ସେମିଫାଇନାଲ ଖେଳିଥିଲେ। ଚଳିତବର୍ଷ ଆଇପିଏଲ୍ରେ ସିଏସ୍କେ ସବୁଠାରୁ ନିକୃଷ୍ଟ ପ୍ରଦର୍ଶନ କରିଛି। ପଏଣ୍ଟ ଟେବୁଲର ନିମ୍ନ ଭାଗରେ ରହିଛି। ୩ଥର ଚାମ୍ପିୟନ ଦଳ କ୍ରମାଗତ ସ୍ଥିର ପ୍ରଦର୍ଶନ କରିବା ପରେ ପ୍ରଥମ ଥର ଟୁର୍ନାମେଣ୍ଟର ସେମିଫାଇନାଲରେ ପ୍ରବେଶ କରିପାରି ନାହିଁ। ଆସନ୍ତା ବର୍ଷ ଆଇପିଏଲ୍ ସ୍ବାଭାବିକ ଏପ୍ରିଲ-ମେରେ କରିବା ଲାଗି ଯୋଜନା ରହିଛି। ତେବେ ସେ ସମୟରେ ସମଗ୍ର ବିଶ୍ୱରେ କୋଭିଡ୍ ପରିସ୍ଥିତିକୁ ଦେଖି ତାରିଖରେ ପରିବର୍ତ୍ତନ ହୋଇପାରେ।
