ଶାରଜା,୨୪।୯(ପି.ଟି.): ଶ୍ରେଷ୍ଠ ଫିନିଶର ଭାବେ ଜଣାଶୁଣା ଥିବା ଚେନ୍ନାଇ ସୁପର କିଙ୍ଗ୍ସ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଉପରେ ପ୍ରଶଂସକମାନେ ସବୁବେଳେ ବହୁତ ଆଶା ରଖିଥାନ୍ତି। ପ୍ରଥମ ମ୍ୟାଚ୍ରେ ଧୋନୀ ରାଜସ୍ଥାନ ରୟାଲ୍ସ ବିପକ୍ଷରେ ଦଳକୁ ଜିତାଇ ପାରି ନ ଥିବାରୁ ଚେନ୍ନାଇ ପ୍ରଶଂସକ ନିରାଶ ହୋଇଛନ୍ତି। ଦଳର ହେଡ୍ କୋଚ୍ ଷ୍ଟିଫାନ ଫ୍ଲେମିଂ ହୃଦୟଙ୍ଗମ କରିଛନ୍ତି। ନିଜର ଶ୍ରେଷ୍ଠ ପ୍ରଦର୍ଶନ କରିବାକୁ ଧୋନୀ କିଛି ସମୟ ଆବଶ୍ୟକ କରିବେ ବୋଲି ସେ କହିଛନ୍ତି।
ମଙ୍ଗଳବାର ମ୍ୟାଚ୍ରେ ଧୋନୀ ୭ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ଫଳରେ ଅଧିକ ବଲ୍ ଖେଳିପାରି ନ ଥିଲେ। ଫଳରେ ଦଳ ମାତ୍ର ୧୬ ରନରେ ପରାସ୍ତ ହୋଇଥିଲା। ଧୋନୀ ୧୭ ବଲ୍ ଖେଳି ୩ ଛକା ସହ ୨୯ରନ କରି ଅପରାଜିତ ରହିଥିଲେ। ବର୍ଦ୍ଧିତ ଦୁଇ ସପ୍ତାହର କ୍ୱାରାଣ୍ଟାଇନ୍ ତାଙ୍କ ପ୍ରସ୍ତୁତିରେ ବାଧା ପହଞ୍ଚାଇଥିଲା ବୋଲି ଧୋନୀ କହିଛନ୍ତି। ଅଧିକ ଅଭ୍ୟାସ କରିବାକୁ ସମୟ ପାଇ ନ ଥିଲେ। ଆଇପିଏଲ୍ ପୂର୍ବରୁ ସେ ଅଧିକ ପରିମାଣର କ୍ରିକେଟ ଖେଳି ନ ଥିଲେ ବୋଲି ମ୍ୟାଚ୍ ପରେ ଖବରଦାତା ସମ୍ମିଳନୀରେ ଫ୍ଲେମିଂ କହିଛନ୍ତି। ଦଳ ପରାସ୍ତ ହୋଇଥିଲେ ମଧ୍ୟ ବ୍ୟାଟିଂକୁ ନେଇ ଆମେ ସେତେଟା ବ୍ୟସ୍ତ ନୁହଁ । ନିଜ ପୂର୍ବରୁ ଧୋନୀ କେଦାର ଯାଦବ ଓ ସାମ କୁରାନଙ୍କୁ ବ୍ୟାଟିଂ କରିବାକୁ ପଠାଇଥିଲେ। ଆଗାମୀ ମ୍ୟାଚ୍ଗୁଡିକରେ ଧୋନୀ ତାଙ୍କ ଚମକ ଦେଖାଇବାକୁ ସକ୍ଷମ ହେବେ ବୋଲି ସେ କହିଛନ୍ତି।
