ନୂଆଦିଲ୍ଲୀ, ୮।୮-ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରେ ସେପ୍ଟେମ୍ବରରୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଆରମ୍ଭ ହେବାକୁ ଯାଉଛି। କରୋନା ଭାଇରସ ସଂକ୍ରମଣ ଜନିତ ଗାଇଡଲାଇନ୍କୁ ଦୃଷ୍ଟିରେ ରଖି ବିଭିନ୍ନ ଫ୍ରାଞ୍ଚାଇଜ୍ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। କ୍ରିକେଟରୁ ଦୀର୍ଘଦିନଧରି ଦୂରେଇ ରହିଥିବା ଚେନ୍ନାଇ ସୁପରକିଙ୍ଗ୍ସ ଅଧିନାୟକ ମହେନ୍ଦ୍ର ସିଂ ଧୋନୀ ରାଞ୍ଚି ରେ ଅଭ୍ୟାସକୁ ଫେରିଥିବା ଜଣାଯାଇଛି। ରିପୋର୍ଟ ଅନୁସାରେ ଝାଡ଼ଖଣ୍ଡ ରାଜ୍ୟ କ୍ରିକେଟ ଆସୋସିଏଶନ(ଜେଏସସିଏ) ଇନ୍ଡୋର ଷ୍ଟାଡିୟମରେ ଧୋନୀ ରନିଂ କରିବା ସହ ଅନ୍ୟ ଅଭ୍ୟାସ କରିଛନ୍ତି। ଲକ୍ଡାଉନ୍ ଏବଂ ସାମାଜିକ ଦୂରତା କଟକଣା ଥିବାରୁ ଧୋନୀଙ୍କୁ ନେଟ୍ସରେ ବୋଲିଂ ପାଇଁ ଅଧିକ ବୋଲର ଉପଲବ୍ଧ ହେଉ ନାହାନ୍ତି। ତେଣୁ ଧୋନୀ ବୋଲିଂ ମେସିନର ସହାୟତା ନେଉଛନ୍ତି। ଗତ ସପ୍ତାହ ଶେଷରେ ସେ କ୍ରମାଗତ ୨ ଦିନ ବ୍ୟାଟିଂ ପ୍ରାକ୍ଟିସ କରିଛନ୍ତି। ୟୁଏଇ ଯିବା ପୂର୍ବରୁ ସୁପରକିଙ୍ଗ୍ସ ଦଳର ଖେଳାଳିମାନେ ଚେନ୍ନାଇଠାରେ ଅଗଷ୍ଟ ୨୦ରେ ଏକତ୍ରିତ ହେବା କାର୍ଯ୍ୟକ୍ରମ ରହିଛି।