ମୁମ୍ବାଇ,୨୭।୪: ଭାରତୀୟ କ୍ରିକେଟ ଦଳର ଅଧିନାୟକତ୍ୱର ପ୍ରଥମ ବର୍ଷରେ ମହେନ୍ଦ୍ର ସିଂ ଧୋନୀ ସୋସିଆଲ ମିଡିଆରେ ବହୁତ ସକ୍ରିୟ ଥିଲେ। କିନ୍ତୁ ଗତ କିଛି ବର୍ଷ ଧରି ସେ ଟୁଇଟର୍ ସମେତ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମଠାରୁ ଦୂରରେ ରହିଆସିଛନ୍ତି। ଏହା ସତ୍ତ୍ୱେ ତାଙ୍କର ପୁରୁଣା ଟୁଇଟ୍ ଭାଇରାଲ ହୋଇଛି। ଯାହା ଚର୍ଚ୍ଚାର ବିଷୟ ପାଲଟିଛି। ଆଇପିଏଲ ୨୦୨୧ରେ ସିଏସ୍କେ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ମଧ୍ୟରେ ମ୍ୟାଚ ପରେ ସମାନ ଘଟଣା ଘଟିଛି। ରବିନ୍ଦ୍ର ଜାଡେଜାଙ୍କ ଅଲରାଉଣ୍ଡ ପ୍ରଦର୍ଶନ ଯୋଗୁ ଚେନ୍ନାଇ ଏହି ମ୍ୟାଚକୁ ୬୯ ରନରେ ଜିତିଛି। ଏହି ମ୍ୟାଚ ପରେ ଧୋନୀଙ୍କ ୮ ବର୍ଷ ପୁରୁଣା ଟୁଇଟ୍ ଭାଇରାଲ ହେବାକୁ ଲାଗିଛି। ଧୋନୀ ଏହି ଟୁଇଟ ୨୦୧୩, ଏପ୍ରିଲ ୯ରେ କରିଥିଲେ। ଏଥିରେ ସେ ଜାଡେଜାଙ୍କୁ ଭାରତୀୟ ଚଳଚ୍ଚିତ୍ରର ସୁପରଷ୍ଟାର ରଜନୀକାନ୍ତଙ୍କ ସହ ତୁଳନା କରିଥିଲେ। ଧୋନୀ ଏହା ପରେ ଲେଖିଥିଲେ ଯେ ଭଗବାନ ଅନୁଭବ କରିଛନ୍ତି ଯେ ରଜନୀ ସାର୍ ଏବେ ବୃଦ୍ଧ ହେବାରେ ଲାଗିଲେଣି, ତେଣୁ ସେ ସାର୍ ରବିନ୍ଦ୍ର ଜାଡେଜାଙ୍କୁ ତିଆରି କରିଛନ୍ତି। ଧୋନୀଙ୍କ ପୁରୁଣା ଟୁଇଟ୍ରେ ଲୋକମାନେ ମଜାଳିଆ ମନ୍ତବ୍ୟ ମଧ୍ୟ ଦେଇଛନ୍ତି। ଧୋନୀଙ୍କ ଏହି ଟୁଇଟ୍ ଶତ ପ୍ରତିଶତ ସତ୍ୟ ବୋଲି ୟୁଜର୍ସ କହିଛନ୍ତି।
ସୂଚନାଯୋଗ୍ୟ, ଆଇପିଏଲ ୨୦୨୧ର ୧୯ତମ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଅଲରାଉଣ୍ଡର ରବିନ୍ଦ୍ର ଜାଡେଜା ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁର (ଆରସିବି) ବିପକ୍ଷରେ ଚମତ୍କାର ପ୍ରଦର୍ଶନ କରିଥିଲେ। ସେ ବଲ, ବ୍ୟାଟ ଏବଂ ଫିଲ୍ଡିଂ ସମେତ ତିନୋଟି ବିଭାଗରେ ସିଏସ୍କେର ବିଜୟରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ ଏବଂ ଦଳ ପଏଣ୍ଟ ଟେବୁଲରେ ପ୍ରଥମ ସ୍ଥାନରେ ପହଞ୍ଚିଥିଲା। ଆରସିବି ବିପକ୍ଷ ମ୍ୟାଚରେ ପାଞ୍ଚ ନମ୍ବରରେ ବ୍ୟାଟିଂ କରିବାକୁ ଆସିଥିବା ଜାଡେଜା ୨୮ ବଲରୁ ଅପରାଜିତ ୬୨ ସ୍କୋର କରିଥିଲେ। ଏହି ଇନିଂସରେ ଜାଡେଜାଙ୍କ ଷ୍ଟ୍ରାଇକ ହାର ୨୨୧ରୁ ଅଧିକ ଥିଲା। ସେ ଚଳିତ ସିଜନରେ ସର୍ବାଧିକ ଉଇକେଟ ଟେକର ହର୍ଷଲ ପଟେଲଙ୍କ ଏକ ଓଭରରେ ୫ ଛକା ମାରି ମୋଟ ୩୭ ରନ ସଂଗ୍ରହ କରିଥିଲେ। ଏଥିସହ ସେ ୪ ଓଭରରେ ୧୩ ରନ ଦେଇ ତିନୋଟି ଉଇକେଟ ନେଇଥିଲେ।