ଭଞ୍ଜନଗର,୧୧ା୪(ଡି.ଏନ.ଏ.): ପ୍ରଥମ ଥର ପାଇଁ ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ମୁଜାଗଡ଼ ରେଞ୍ଜ ବାଇବାଲି ଜଙ୍ଗଲରୁ ୪୦ ଫୁଟ ଲମ୍ବର ୨୦ ଖଣ୍ଡ ଢଉରା କାଠ ପୁରୀ ରଥଯାତ୍ରା ପାଇଁ ପଠାଯାଇଛି। ଆଉ କିଛି ଦିନ ପରେ କେନ୍ଦ୍ରୀୟ ବନାଞ୍ଚଳ ପୁରୁଣାପାଣିରୁ ମଧ୍ୟ ପ୍ରଥମ ଥର ପାଇଁ ପୁରୀ ରଥଯାତ୍ରା ପାଇଁ ଫାଶି କାଠ ଯିବ । କାଠ କାଟି ଜଙ୍ଗଲରେ ଗଛିତ ରଖାଯାଇଛି। ଏଥିସହ ତାରସି ରେଞ୍ଜରୁ ପୂର୍ବରୁ ଦୁଇଥର ପୁରୀ ରଥଯାତ୍ରା ପାଇଁ ଫାଶି କାଠ ପଠାଯାଇଥିବା ବେଳେ ଚଳିତ ବର୍ଷ ମଧ୍ୟ ଫାଶି କାଠ ପଠାଯିବ। କାଠ କାଟି ଜଙ୍ଗଲରେ ରଖାଯାଇଛି। ବାଇବାଲି ଜଙ୍ଗଲରୁ ଆଜି ଏକ ବିରାଟ ଟ୍ରକରେ କାଠ ଗୁଡିକୁ ନିଆଯିବ ସମୟରେ ବାଟରେ ବିଭିନ୍ନ ସ୍ଥାନରେ ରଥ କାଠକୁ ଲୋକେ ପୂଜାର୍ଚ୍ଚନା କରିବା ସହ ସ୍ବାଗତ କରିଥିଲେ। ହୁଳହୁଳି ଏବଂ ଢୋଲ, ମୃଦଙ୍ଗର ତାଳେତାଳେ ରଥ କାଠ ଭର୍ତ୍ତି ହୋଇଥିବା ଟ୍ରକ୍କୁ ଲୋକେ ପାଛୋଟି ନେଇଥିଲେ। ଏହି ସମୟରେ କେନ୍ଦ୍ରୀୟ ବନାଞ୍ଚଳ ଅଧିକାରୀ କୁମର ବେହେରା, ମୁଜାଗଡ଼ ରେଞ୍ଜର ବିମ୍ବାଧର ସାହୁ, ବନପାଳ ବଂଶୀଧର ବିଶୋଇ, ଅବୈତନିକ ବନ୍ୟପ୍ରାଣୀ ତତ୍ତ୍ବାବଧାରକ ଶୂଳ ପାଣି ସତପଥୀ, ଏମ୍ପି ପ୍ରତିନିଧି ପଞ୍ଚାନନ ପାଳ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିବାରେ ସହଯୋଗ କରିଥିଲେ।