କୋଚି,୨୬।୩ : ଭାରତୀୟ ତଟରକ୍ଷୀ ବାହିନୀର ଏଏଲଏଚ ଧ୍ରୁବ ହେଲିକପ୍ଟରର ଏକ ପରୀକ୍ଷଣ ବିମାନକୁ ରବିବାର କେରଳର କୋଚିରେ ଜରୁରୀକାଳୀନ ଅବତରଣ କରାଯାଇଛି। ନ୍ୟୁଜ ଏଜେନ୍ସି ଅନୁଯାୟୀ, ଏଏଲଏଚ ଧ୍ରୁବ ମାର୍କ-୩ ଏକ ପରୀକ୍ଷଣ ଉଡ଼ାଣ ସମୟରେ ୨୫ ଫୁଟ ଉଚ୍ଚରେ ଥିଲା। ତେବେ କୌଣସି କାରଣରୁ ହେଲିକପ୍ଟରକୁ ହଠାତ ଜରୁରୀକାଳୀନ ଅବତରଣ କରିବାକୁ ପଡିଥିବା କୁହାଯାଉଛି।
କୋଷ୍ଟଗାର୍ଡର ଅଧିକାରୀମାନେ କହିଛନ୍ତି ଜରୁରୀ ଅବତରଣ ଯୋଗୁ ବଡ଼ ଦୁର୍ଘଟଣାକୁ ଏଡାଇ ଦିଆଯାଇଛି। ଏହି ଘଟଣାରେ କୌଣସି କ୍ଷୟକ୍ଷତିର ଖବର ଏପର୍ଯ୍ୟନ୍ତ ସାମ୍ନାକୁ ଆସିନାହିଁ।
କୁହାଯାଉଛି ଯେ ଭାରତୀୟ ତଟରକ୍ଷୀ ବାହିନୀ ଏଏଲଏଚ ଧ୍ରୁବ ହେଲିକପ୍ଟର ଉଡ଼ାଣ ଉପରେ ଲାଗିଥିବା ପ୍ରତିବନ୍ଧକକୁ ହଟାଇବା ପାଇଁ ନିରନ୍ତର କାର୍ଯ୍ୟ କରୁଛି। ସେହି ମାସରେ ମୁମ୍ବାଇ ଉପକୂଳରେ ଏକ ଦୁର୍ଘଟଣା ପରେ ପ୍ରତିରକ୍ଷା ବାହିନୀ ଦ୍ୱାରା ସତର୍କତାମୂଳକ ପଦକ୍ଷେପ ଭାବରେ ଏଏଲଏଚ ଧ୍ରୁବ ହେଲିକପ୍ଟରଗୁଡିକର ଉଡ଼ାଣ ଉପରେ ରୋକ ଲଗାଯାଇଥିଲା।
ଏହି ରୋକ ପରେ କୁହାଯାଇଥିଲା ଯେ ଯେପର୍ଯ୍ୟନ୍ତ ଅନୁସନ୍ଧାନକାରୀମାନେ ହେଲିକପ୍ଟର ଦୁର୍ଘଟଣାର କାରଣ ଜାଣି ନାହାଁନ୍ତି ସେ ପର୍ଯ୍ୟନ୍ତ ଏହି ନିଷେଧାଦେଶ ଜାରି ରହିବ। ଆଡଭାନ୍ସଡ ଲାଇଟ ହେଲିକପ୍ଟର (ଏଏଲଏଚ) ଧ୍ରୁବ ହେଲିକପ୍ଟର ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ ଦ୍ୱାରା ନିର୍ମାଣ କରାଯାଇଛି। ଏହାକୁ ଭାରତୀୟ ତଟରକ୍ଷୀ ବାହିନୀ, ସେନା, ନୌସେନା ଏବଂ ବାୟୁସେନାରେ ବ୍ୟବହାର କରାଯାଉଛି।
