କିଏ ସେ ଧ୍ରୁବ୍ ଜୁରେଲ? ସୁନା ଚେନ୍ ବିକ୍ରି କରି ମା’ ଦେଇଥିଲେ କ୍ରିକେଟ କିଟ୍, ଏବେ ଦେଶ ପାଇଁ ଖେଳିବେ…
06 ନୂଆଦିଲ୍ଲୀ,୧୩।୧: ଇଂଲଣ୍ଡ ବିପକ୍ଷରେ ହେବାକୁ ଥିବା ଟେଷ୍ଟ ସିରିଜ ଲାଗି ଭାରତୀୟ ଟିମ୍ ପ୍ରସ୍ତୁତ। ପ୍ରାରମ୍ଭିକ ଦୁଇ ମ୍ୟାଚ୍ ଲାଗି ଦଳ ଘୋଷଣା ମଧ୍ୟ ହୋଇସାରିଛି। ଏଥିରେ ୨୨ ବର୍ଷୀୟ ଧ୍ରୁବ୍ ଜୁରେଲଙ୍କୁ ଡେବ୍ୟୁର ସୁଯୋଗ ମିଳିଛି। ରଣଜୀ ଟ୍ରଫିରେ ଉତ୍ତରପ୍ରଦେଶରୁ ଖେଳୁଥିବା ଧ୍ରୁବ୍ଙ୍କୁ ତୃତୀୟ ଉଇକେଟକିପର ଭାବେ ଦଳରେ ରଖାଯାଇଛି। ଟିମ୍ ଇଣ୍ଡିଆର ଚୟନକର୍ତ୍ତା ଏବଂ ଦଳ ପରିଚାଳନା ଈଶାନ କିଷନଙ୍କ ଉପରେ ପ୍ରାଧାନ୍ୟ ଦେଇଛନ୍ତି। ଏହାପରେ କ୍ରିକେଟ ପ୍ରଶଂସକମାନେ ଧ୍ରୁବ୍ କିଏ ତାଙ୍କ ବିଷୟରେ ଜାଣିବାକୁ ଆଗ୍ରହ ବୃଦ୍ଧି ପାଇଛି। ଆସନ୍ତୁ ଜାଣିବା ସେ କିଏ?
ଧ୍ରୁବ୍ ଉତ୍ତରପ୍ରଦେଶ ଆଗ୍ରାରୁ ଆସିଛନ୍ତି। ତାଙ୍କ ବାପା ସେନାର ହାବିଲଦାର ଥିଲେ। ସେ ନିଜେ ମଧ୍ୟ ସେନାରେ ଯୋଗଦିଅନ୍ତୁ ବୋଲି ବାପାଙ୍କର ଇଚ୍ଛା ଥିଲା। ହେଲେ ଧ୍ରୁବ୍ କ୍ରିକେଟ ପ୍ରତି ଆଗ୍ରହୀ ଥିଲେ। ଯେତେବେଳେ ସେ କ୍ରିକେଟ ଟ୍ରେନିଂ ପାଇଁ ନାମ ଲେଖାଇଥିଲେ, ସେ ଏହି କଥାକୁ ବାପାଙ୍କଠାରୁ ଲୁଚାଇ ରଖିଥିଲେ। ପରେ ଏହା ଜଣାପଡ଼ିବା ପରେ ତାଙ୍କୁ ଅନେକ ଗାଳି ଶୁଣିବାକୁ ପଡ଼ିଥିଲା। ଏକ ଟୁର୍ନାମେଣ୍ଟରେ ଖେଳିବା ଲାଗି ଧ୍ରୁବ୍ଙ୍କୁ ଏକ କ୍ରିକେଟ କିଟ୍ର ଆବଶ୍ୟକତା ଥିଲା। ବଜେଟ ନ ଥିବାରୁ ତାଙ୍କ ବାପା କିଟ୍ ଦେବାକୁ ମନା କରିଦେଇଥିଲେ। ଏମିତିରେ ତାଙ୍କ ମା’ ସୁନା ଚେନ୍ ବିକ୍ରି କରି ତାଙ୍କୁ କ୍ରିକେଟ କିଟ୍ କିଣି ଦେଇଥିଲେ।
ଧ୍ରୁବଙ୍କ ପିତା ଅବସର ପରେ PSO ଭାବରେ ମଧ୍ୟ କାର୍ଯ୍ୟ କରିଥିଲେ। ଏଣୁ ସେ ପିତାଙ୍କ ଆର୍ଥିକ ଅବସ୍ଥା ଦେଖି ସେ ଦୁଃ ଖ ଅନୁଭବ କରିଥିଲେ। ଏଭଳି ପରିସ୍ଥିତିରେ ସେ କ୍ରିକେଟ ଉପରେ ଧ୍ୟାନ ଦେବାକୁ ନିଷ୍ପତ୍ତି ନେଇଥିଲେ। ପ୍ରଥମେ ସେ ବିଭିନ୍ନ ପର୍ଯ୍ୟାୟରେ ଖେଳିଥିଲେ ଏବଂ ପରେ ଆଇପିଏଲ୍ରେ ସୁଯୋଗ ପାଇଥିଲେ। ସେଠାରୁ ଧ୍ରୁଭ ଜୁରେଲଙ୍କ ଭାଗ୍ୟ ବଦଳି ଯାଇଥିଲା। ଅନ୍ୟପକ୍ଷରେ ସେ ଘରୋଇ କ୍ରିକେଟରେ ଭଲ ପ୍ରଦର୍ଶନ କରିଥିଲେ।
ଏବେ ଭାରତ ଲାଗି ଖେଳିବା ଲାଗି ଧ୍ରୁବ୍ଙ୍କୁ ଏକ କଲ ଆସିଛି। ସେ ଇଂଲଣ୍ଡ ବିପକ୍ଷ ସିରିଜ ପାଇଁ ମନୋନୀତ ହେବା ଖବର ତାଙ୍କର ବନ୍ଧୁମାନେ ହିଁ ପ୍ରଥମେ ଧ୍ରୁବଙ୍କୁ ସୂଚନା ଦେଇଥିଲେ। କାରଣ ସେ ଇଣ୍ଡିଆ ଏ ପାଇଁ ମ୍ୟାଚରେ ବ୍ୟସ୍ତ ଥିଲେ। ତେବେ ୨୨ ବର୍ଷ ବୟସ୍କା ଧ୍ରୁବ୍ ଟିମ ଇଣ୍ଡିଆ ସହିତ ରହିବାର ସୁଯୋଗ ପାଇବେ। ଯଦିଓ ସେ ଏଠାରେ ଡେବ୍ୟୁ କରିବାର ସୁଯୋଗ ପାଇ ନ ପାରନ୍ତି, ହେଲେ ସେ ନିଶ୍ଚିତ ଭାବରେ ଜାତୀୟ ଦଳରେ ସାମିଲ ହୋଇ ବହୁତ କିଛି ଶିଖିବେ ବୋଲି ଆଶା କରାଯାଉଛି।