ନୂଆଦିଲ୍ଲୀ,୯।୯: ଜୁରିଚରେ ଡାଏମଣ୍ଡ ଲିଗ୍ ଫାଇନାଲରେ ପ୍ରଥମ ସ୍ଥାନ ଅଧିକାର କରି ନୀରଜ ଚୋପ୍ରା ଇତିହାସ ସୃଷ୍ଟି କରିଛନ୍ତି। ଡାଏମଣ୍ଡ ଟ୍ରଫି ଜିତିବାରେ ନୀରଜ ଚୋପ୍ରା ପ୍ରଥମ ଭାରତୀୟ ହୋଇଛନ୍ତି। ସେ ୮୮.୪୪ ମିଟର ଜାଭେଲିନ ଥ୍ରୋରେ ଚେକ ରିପବ୍ଲିକର ଜାକୋବ ଭାଡଲେଚୋଙ୍କୁ ଅତିକ୍ରମ କରିଥିଲେ। ସେ ତାଙ୍କର ପଞ୍ଚମ ପ୍ରୟାସରେ ୮୬.୯୪ ମିଟର ଫିଙ୍ଗିଥିଲେ।
ନୀରଜଙ୍କ ପ୍ରଥମ ଥ୍ରୋ ଖରାପ ଥିଲାବେଳେ ଦ୍ୱିତୀୟ ଥ୍ରୋ ମାପ ୮୮.୪୪ ମିଟର ଥିଲା, ଯାହା ତାଙ୍କ ପାଇଁ ଟାଇଟଲ ଜିତିବା ପାଇଁ ଯଥେଷ୍ଟ ଥିଲା। ନୀରଜ ତୃତୀୟ ଥ୍ରୋ ୮୮, ଚତୁର୍ଥ ୮୬.୧୧, ପଞ୍ଚମ ୮୭ ଏବଂ ଷଷ୍ଠ ତଥା ଫାଇନାଲ ଥ୍ରୋ ୮୩.୬ ମିଟର ଫିଙ୍ଗିଥିଲେ। ଭାଡଲେଚୋ ନୀରଜଙ୍କ ସହ ଅଲିମ୍ପିକ୍ସରେ ପଦକ ଜିତିଥିଲେ।
ଭାଡଲେଚୋ ଦ୍ୱିତୀୟ ଏବଂ ଜର୍ମାନୀର ଜୁଲିଆନ ୱେବର ୮୩.୭୩ ମିଟର ସହିତ ତୃତୀୟ ସ୍ଥାନରେ ରହିଛନ୍ତି। ଏହି ବିଜୟ ସହିତ ନୀରଜ ୨୩.୯୮ ଲକ୍ଷ ଟଙ୍କା ପୁରସ୍କାର ରାଶି ଜିତିଥିଲେ ଏବଂ ଡାଏମଣ୍ଡ ଟ୍ରଫି ମଧ୍ୟ ଜିତିଥିଲେ।
ଏହାପୂର୍ବରୁ ବିଶ୍ୱ ଚାମ୍ପିୟନଶିପ ପରେ ନୀରଜ ଆହତ ହୋଇଥିଲେ। ଏହି କାରଣରୁ ସେ ବର୍ମିଂହାମ କମନୱେଲଥ ଗେମ୍ସରେ ଭାଗ ନେଇପାରି ନ ଥିଲେ। ଏହା ପରେ ସେ ଆଘାତରୁ ସୁସ୍ଥ ହୋଇ ୮୯.୦୮ ମିଟର ଥ୍ରୋ ସହିତ ଲୋଜାନ ଡାଇମଣ୍ଡ ଲିଗରେ ସ୍ବର୍ଣ୍ଣ ପଦକ ଜିତିଥିଲେ। ଏହାପୂର୍ବରୁ ନୀରଜ ଅଲିମ୍ପିକ୍ସ ମଧ୍ୟ ସ୍ବର୍ଣ୍ଣ ଜିତିଥିଲେ।
