ଭାରତୀୟ ମହିଳା କ୍ରିକେଟରେ ଡାଏନା ଏଡୁଲଜୀ ଏକ ବଡ ନାମ। ଜଣେ ଖେଳାଳି ଭାବରେ,ଡାଏନା ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଛନ୍ତି। ଡାଏନା ୨୬ ଜାନୁଆରୀ ୧୯୫୬ରେ ଜନ୍ମଗ୍ରହଣ କରିଥିଲେ। ସେ ୭୦ ଦଶକର ଖେଳାଳି ଥିଲେ।ସେ ଭାରତୀୟ ଦଳ ପାଇଁ ୨୦ଟି ଟେଷ୍ଟ ଏବଂ ୩୪ଟି ଏକଦିବସୀୟ ଖେଳିଥିଲେ। ସେ ନିଜର ଚତୁରତା ଏବଂ ଦୃୃଢତା ପାଇଁ ଜଣାଶୁଣା।
ଏଡୁଲଜୀ ପରିବାରରେ ପୂର୍ବରୁ କ୍ରିକେଟ ଖେଳିବା ଏକ ପରମ୍ପରା ଥିଲା। ଏହି ପରମ୍ପରାକୁ ଆଗକୁ ବଢାଇଥିଲେ ସେ। ପ୍ରଥମ ମ୍ୟାଚ୍ ଖେଳୁଥିବା ସମୟରେ ଡାଏନା ଏଡୁଲଜୀଙ୍କ ଚାରିଟି ଦାନ୍ତ ଭାଙ୍ଗି ଯାଇଥିଲା। ସେହି ସମୟରେ ଝିଅ ହୋଇଥିବାରୁ ଏହା ବହୁତ ଚିନ୍ତାର ବିଷୟ ଥିଲା। ଲୋକେ ତାଙ୍କ ପରିହାସ କରିବାକୁ ଲାଗିଲେ। ଡାଏନା ଭୟଭୀତ ହୋଇ ନ ଥିଲେ। ସେ ଆଘାତରୁ ସୁସ୍ଥ ହୋଇ ପୁନର୍ବାର ଖେଳିବା ଆରମ୍ଭ କରିଥିଲେ।
୧୯୭୬ରୁ ୧୯୯୩ ପର୍ଯ୍ୟନ୍ତ ଭାରତ ପାଇଁ ୫୪ଟି ଆନ୍ତର୍ଜାତୀୟ ମ୍ୟାଚ ଖେଳିଥିବା ଡାଏନା ଭାରତ ପାଇଁ ମହିଳା ଟେଷ୍ଟ କ୍ରିକେଟରେ ସର୍ବାଧିକ ୬୩ ଉଇକେଟ ନେଇ ରେକର୍ଡ ରଖିଛନ୍ତି। ଏହା ବ୍ୟତୀତ ସେ ହେଉଛନ୍ତି ପ୍ରଥମ ଭାରତୀୟ ମହିଳା ଯିଏକି ମହିଳା କ୍ରିକେଟର ଉଭୟ ଫର୍ମାଟରେ ୧୦୦ ଉଇକେଟ ନେଇଛନ୍ତି। ଭାରତରେ ମହିଳା କ୍ରିକେଟ ମନୋଭାବ ବିରୋଧରେ ଡାଏନା ସର୍ବଦା ସ୍ବର ଉତ୍ତୋଳନ କରିଆସିଛନ୍ତି। ମହିଳା କ୍ରିକେଟରଙ୍କ ଦ୍ୱାରା ଉଠାଯାଇଥିବା ଅଭିଯୋଗ ଯେପରିକି କମ ମ୍ୟାଚ ଫି ଏବଂ ପୁରୁଷ ଖେଳାଳିଙ୍କ ତୁଳନାରେ କମ ସୁବିଧା ଭଳି ସମସ୍ୟା ସର୍ବଦା ଜାତୀୟ ତଥା ଆନ୍ତର୍ଜାତୀୟ ସ୍ତରରେ ସେ ଉଠାଇଛନ୍ତି।
