ୱାଶିଂଟନ୍: ବହୁତ ଲୋକ ଅଛନ୍ତି, ଯେଉଁମାନେ ଅନ୍ୟମାନଙ୍କ ମୁହଁରେ ହସ ଫୁଟାଇ ଆନନ୍ଦ ଅନୁଭବ କରିଥାଆନ୍ତି। ସେମାନଙ୍କ ମଧ୍ୟରୁ ଅନେକ କମେଡ଼ିଆନ୍ ଅଛନ୍ତି, ଯେଉଁମାନଙ୍କ ମଜାଳିଆ କଥାରେ ଲୋକେ ହସି ହସି ବେଦମ୍ ହୋଇଯାଆନ୍ତି। ଆମେରିକାର ଜଣେ ମହିଳା କମେଡ଼ିଆନ୍ ଡିୟାନ୍ ଫରେଷ୍ଟ, ଯିଏ ପ୍ରମାଣିତ କରିଛନ୍ତି କି ବୟସ ହେଉଛି ଏକ ନମ୍ବର। ବାକି ମଣିଷ ବଞ୍ଚତ୍ବାକୁ ଖୁସି ରହିବା ନିତାନ୍ତ ଆବଶ୍ୟକ। ତାଙ୍କୁ ବର୍ତ୍ତମାନ ୮୮ ବର୍ଷ ହୋଇଥିଲେ ବି ତାଙ୍କ ମୁହଁରେ ସବୁବେଳେ ହସ ଦେଖିବାକୁ ମିଳିଥାଏ। ଜୀବନର ପ୍ରତିଟି ମୁହୂର୍ତ୍ତରେ ନିଜ କମେଡ଼ିରେ ଲୋକଙ୍କୁ ହସାଇବା ସହ ନିଜକୁ ମଧ୍ୟ ଖୁସି ରଖିଥା’ନ୍ତି। ଡିୱାନ୍ ଫରେଷ୍ଟ ସବୁଠାରୁ ପୁରୁଣା ମହିଳା କମେଡ଼ିଆନ୍ ବୋଲି ଗିନିଜ୍ ବୁକ୍ ଅଫ୍ ୱାଲର୍ଡ ରେକର୍ଡ ତା’ ଟୁଇଟର ମାଧ୍ୟମରେ ସୂଚନା ଦେଇଛି। ସେ ୩୧ ଜୁଲାଇ ୧୯୩୪ରେ ବୋଷ୍ଟନ ସହରରେ ଜନ୍ମଗ୍ରହଣ କରିଥିଲେ। ସେ ୨୦ ବର୍ଷ ବୟସରୁ ଲୋକଙ୍କୁ ହସାଇ ଆସୁଛନ୍ତି। ଡିୱାନ୍ ଜଣେ କମେଡିଆନ୍ ସହ ସଙ୍ଗୀତଜ୍ଞ, ମ୍ୟୁଜିସିଆନ୍ ଏବଂ ମଜାଳିଆ ମଣିଷ ମଧ୍ୟ। ତାଙ୍କୁ ଏକାଧିକ ବାଦ୍ୟଯନ୍ତ୍ର ବଜାଇବା ଜଣାଥିଲା। ସେ ଏକସଙ୍ଗେ ଇଂଲିଶ୍ ଏବଂ ଫ୍ରେଞ୍ଚ ଭାଷାରେ କମେଡ଼ି କରୁଥିଲେ। ସେ ନିକଟରେ ଏକ ଶୋ’ରେ ତାଙ୍କ କମେଡି ଜୀବନ ଆରମ୍ଭ ବିଷୟରେ କହିଛନ୍ତି। କମେଡ଼ି ପୂର୍ବରୁ ସେ ପିଆନୋ ବଜାଇବା ସହ ଫ୍ରେଞ୍ଚରେ ଗୀତ ଗାଉଥିଲେ। ପରେ ଲୋକଙ୍କୁ ତାଙ୍କ ସଙ୍ଗୀତ ଆକୃଷ୍ଟ କରି ନ ଥିଲା। ଫଳରେ ତାଙ୍କ ଉପରେ ଲୋକେ ହସିବା ଆରମ୍ଭ କଲେ। ତା’ପରେ ସେ କମେଡ଼ି କରିବା ଆରମ୍ଭ କରିଥିବା କହିଛନ୍ତି।