ରାଉରକେଲା,୧୭।୧୨(ସଙ୍ଗୀତା ଜେନା): ରାଉରକେଲାରେ ଝାଡ଼ାବାନ୍ତି ପ୍ରକୋପ କ୍ରମଶଃ ବଢ଼ିବାରେ ଲାଗିଛି। ଝାଡ଼ାବାନ୍ତିରେ ପୂର୍ବରୁ ୪ଜଣଙ୍କ ମୃତ୍ୟୁ ହୋଇଥିବା ବେଳେ ଶନିବାର ପୁଣି ୩ ଜଣଙ୍କ ମୃତ୍ୟୁ ହୋଇଛି। ମୃତକମାନେ ହେଲେ ହୋଟେଲ ବ୍ୟବସାୟୀ ପ୍ରଣବ ସ୍ବାଇଁ, ଏମ୍ଡି. ଅସଲମ୍ ଏବଂ ଗାନ୍ଧୀରୋଡ୍ର ଅତୁଲ କିଷାନ। ଫଳରେ ଝାଡ଼ାବାନ୍ତି ମୃତ୍ୟୁସଂଖ୍ୟା ୭କୁ ବୃଦ୍ଧି ପାଇଛି। ଆର୍ଜିଏଚ୍ରେ ରବିବାର ୧୫ ରୋଗୀ ସୁସ୍ଥ ହୋଇ ଘରକୁ ଫେରିଥିବା ବେଳେ ୧୧୮ଜଣ ଚିକିତ୍ସିତ ହେଉଛନ୍ତି। ସେହିପରି ରାଉରକେଲାର କିଛି ଘରୋଇ ହସ୍ପିଟାଲରେ ଝାଡ଼ାବାନ୍ତି ରୋଗୀ ଚିକିତ୍ସିତ ହେଉଥିବାରୁ ସହରରେ ରୋଗୀସଂଖ୍ୟା ୨ ଶହରୁ ଊର୍ଦ୍ଧ୍ୱ ହେବ ବୋଲି କୁହାଯାଉଛି।
ଅନ୍ୟପକ୍ଷେ ଭୁବନେଶ୍ୱର ଓ ସୁନ୍ଦରଗଡ଼ରୁ ୮ଜଣିଆ ଡାକ୍ତରୀ ଟିମ୍ ରବିବାର ଆର୍ଜିଏଚ୍ରେ ପହଞ୍ଚି ରୋଗୀ ଚିକିତ୍ସା କରିବା ସହ ଅନୁସନ୍ଧାନ ଆରମ୍ଭ କରିଛନ୍ତି। ଏହି ଟିମ୍ରେ ରାଜ୍ୟ ଆଇଡିଏସ୍ପି ଯୁଗ୍ମ ନିର୍ଦ୍ଦେଶକ ଡା. ଅଶୋକ ପାଇକରାୟ, ଆର୍ଆର୍ଟି ସଦସ୍ୟ ଡ. ସୁରଜିତ୍ ଗରାବଡୁ, ସହାୟକ ପ୍ରଫେସର ଡ. ନଳିନୀକାନ୍ତ ତ୍ରିପାଠୀ, ଡ. ଆଶିଷ ବିଶ୍ୱାଳ, ଶିଶୁ ବିଶେଷଜ୍ଞ ଡ. ବିବେକାନନ୍ଦ ସିଂହ, ମାଇକ୍ରୋବାୟୋଲୋଜିଷ୍ଟ ଡ. ରଞ୍ଜନ ସାମଲ, ସୁନ୍ଦରଗଡ଼ ଡିଏଚ୍ଏଚ୍ ଜିଡିଏମ୍ଓ ଡ. ସୋମ ଶୁଭଙ୍କର ଏବଂ ଡ. ସାଗର ଦଳେଇ ପ୍ରମୁଖ ସାମିଲ ହୋଇଛନ୍ତି। ସୁନ୍ଦରଗଡ଼ ଜିଲାପାଳ ପରାଗ ହର୍ଷଦ ଗାଭାଲି ମଧ୍ୟ ଆର୍ଜିଏଚ୍ରେ ପହଞ୍ଚି ଘଟଣାର ଅନୁସନ୍ଧାନ କରୁଛନ୍ତି।
ସେହିପରି ଜିଲା ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ସ୍ବରୂପ ଡାକବାଜି ଯନ୍ତ୍ର ଯୋଗେ ଲୋକଙ୍କୁ ସଚେତନ କରାଯିବା ସହ ସ୍ବଚ୍ଛ, ଶିଝାପାଣି ପିଇବା ଓ ଦୂଷିତ ଖାଦ୍ୟ ନ ଖାଇବାକୁ ପରାମର୍ଶ ଦିଆଯାଉଛି।