କୋକସରା,୧୭।୧(ଡି.ଏନ୍.ଏ): କଳାହାଣ୍ଡି ଜିଲା କୋକସରା ବ୍ଲକ ସଦର କୋକସରା ପଞ୍ଚାୟତ କୋକସରା ଗ୍ରାମରେ ଗତ କିଛି ଦିନ ଧରି ଝାଡ଼ାବାନ୍ତିରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଝାଡ଼ାବାନ୍ତି ବ୍ୟାପିବାର ମୁଖ୍ୟ କାରଣ ଦୂଷିତ ପାନୀୟ ଜଳ ବୋଲି ପ୍ରାଥମିକ ଅନୁସନ୍ଧାନରୁ ଜଣାପଡିଛି।
କୋକସରା ଗ୍ରାମରେ ୬ ଟି ୱାର୍ଡ ରହିଥିବା ବେଳେ ୫ ହଜାରରୁ ଊର୍ଦ୍ଧ୍ୱ ଲୋକ ଏଠାରେ ବାସ କରନ୍ତି। ତେବେ ବିଶୁଦ୍ଧ ପାନୀୟ ଜଳ ପାଇଁ ଗ୍ରାମ୍ୟ ପରିମଳ ଓ ପଞ୍ଚାୟତ ପକ୍ଷରୁ ବିଛା ଯାଇଥିବା ଲୁହାର ପାଇପ ଲାଇନ ଅନେକ ସ୍ଥାନରେ କଳଙ୍କି ଲାଗି ନଷ୍ଟ ହୋଇଛି। ଏଥିସହ ଡ୍ରେନର ଦୂଷିତ ପାଣି ପାଇପ ଲାଇନ ପାଣିରେ ମିଶୁଥିବା କାରଣରୁ ଝାଡ଼ାବାନ୍ତି ବ୍ୟାପୁଥିବା ନେଇ ସ୍ବାସ୍ଥ୍ୟକର୍ମୀମାନେ ସ୍ଥିତି ଅନୁଧ୍ୟାନ ପରେ ସୂଚନା ଦେଇଛନ୍ତି। ତେବେ ଗତ ସପ୍ତାହ ମଧ୍ୟରେ କୋକସରା ଗ୍ରାମର ପାଖାପାଖି ୧୩ରୁ ଅଧିକ ଲୋକେ ଝାଡ଼ାବାନ୍ତିରେ ଆକ୍ରାନ୍ତ ହୋଇ ସୁସ୍ଥ ହୋଇଥିବା ବେଳେ ମଙ୍ଗଳବାର ମଧ୍ୟ ଆଉ କେତେଜଣ ଏଥିରେ ଆକ୍ରାନ୍ତ ହୋଇଥିବା ଜଣାପଡ଼ିଛି। ସେମାନେ କୋକସରା ଡାକ୍ତରଖାନାରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି।
ଗତ ରବିବାର ଝାଡ଼ାବାନ୍ତିର କାରଣ ଅନୁଧ୍ୟାନ କରିବାକୁ ମହିଳା ସ୍ବାସ୍ଥ୍ୟ କର୍ମୀ, ଆଶା କର୍ମୀମାନେ କୋକସରା ଗ୍ରାମର ଘରକୁ ଘର ବୁଲି ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରିବା ସହ ଔଷଧ ବଣ୍ଟନ କରିଥିଲେ। ଏଥିସହ ପାଣିକୁ ଫୁଟାଇ ପିଇବାକୁ ସଚେତନ କରିଛନ୍ତି। ଏନେଇ ଗ୍ରାମ୍ୟ ଜଳ ଯୋଗାଣ କନିଷ୍ଠ ଯନ୍ତ୍ରୀ ଯଶୋବନ୍ତୀ ଭୋଇଙ୍କ ମତାମତ ନେବାପାଇଁ ଚେଷ୍ଟା କରିବାରୁ କୌଣସି ପ୍ରତିକ୍ରିୟା ହସ୍ତଗତ ହୋଇନାହିଁ ।