ଚମ୍ପୁଆ, ୪।୬(ଡି.ଏନ୍.ଏ.): ରାଜ୍ୟ ସରକାର ଭିନ୍ନକ୍ଷମମାନଙ୍କୁ ସାମାଜିକ ସୁରକ୍ଷାରେ ସାମିଲ କରିବା ପାଇଁ ବିଭିନ୍ନ ଯୋଜନାମାନ କରିଛନ୍ତି। ଅଗ୍ରାଧିକାର ଭିତ୍ତିରେ ଦିବ୍ୟାଙ୍ଗମାନଙ୍କୁ ସହାୟତା ପ୍ରଦାନ ପାଇଁ ବହୁବିଧି ପଦକ୍ଷେପ ଗ୍ରହଣ କରାଯାଇଛି। ମାତ୍ର ଏହାର ଓଲଟା ପ୍ରତିବିମ୍ବ ଦେଖିବାକୁ ମିଳିଛି ଚମ୍ପୁଆ ବ୍ଲକ୍ର ଜାମୁଦଲକ ପଞ୍ଚାୟତ ମଙ୍ଗଳପୁର ଗ୍ରାମର ଜମ୍ବୁ ନାଏକଙ୍କ କ୍ଷେତ୍ରରେ।
ସୂଚନା ଅନୁଯାୟୀ, ମଙ୍ଗଳପୁର ଗ୍ରାମର ପଦ୍ମଚରଣ ନାଏକଙ୍କ ପତ୍ନୀ ଜମ୍ବୁ ନାଏକ ୨୦୧୩ରେ ଉଭୟ ଗୋଡ଼ରେ କଷ୍ଟ ଅନୁଭବ କରିଥିଲେ। ଆର୍ଥିକ ଅନଗ୍ରସର ହୋଇଥିବାରୁ ଚିକିସତ୍ା କରାଇପାରି ନ ଥିଲେ। ଫଳରେ ଦୁଇ ଗୋଡ଼ ଓ ଦୁଇ ହାତ ବଙ୍କା ହୋଇଯିବାରୁ ସେ ଦିବ୍ୟାଙ୍ଗ ପାଲଟି ଯାଇଥିଲେ। ଏପରିକି ପରିବାର ଦାୟିତ୍ୱ ତୁଲାଉଥିବା ଜମ୍ବୁ ନିଜ ନିତ୍ୟକର୍ମ ମଧ୍ୟ କରିବା ପାଇଁ ଅସମର୍ଥ ହୋଇଗଲେ। ଏଭଳି କ୍ଷେତ୍ରରେ ସେ ଭଙ୍ଗା ଦଦରା ଘରେ ରହୁଥିବା ବେଳେ ପ୍ରଧାନମନ୍ତ୍ରୀ ଆବାସ ଯୋଜନ ପାଇଁ ପଞ୍ଚାୟତରେ ୩ ଥର ଆବେଦନ କରିଥିଲେ। ମାତ୍ର ଏପର୍ଯ୍ୟନ୍ତ ଯୋଗ୍ୟ ହିତାଧିକାରୀଙ୍କ ତାଲିକାରେ ତାଙ୍କ ନାମ ରହୁ ନ ଥିବା ପରିତାପର ବିଷୟ ପାଲଟିଛି। ଏଥିସହ ଏକ ତିନିଚକିଆ ସାଇକେଲ ପାଇଁ ପ୍ରଶାସନକୁ ନିବେଦନ କରିଥିବା ବେଳେ ତାହା ମଧ୍ୟ ମିଳିନାହିଁ। ଏ ନେଇ ଜାମୁଦଲକ ପଞ୍ଚାୟତ ନିର୍ବାହୀ ଅଧିକାରୀ ରୀନା ପ୍ରଧାନ କହିଛନ୍ତି, ସେ ଅଳ୍ପ ଦିନ ହେବ ପଞ୍ଚାୟତରେ ଯୋଗ ଦେଇଛନ୍ତି। ବର୍ଷେ ପୂର୍ବରୁ ଏହାର ଲିଷ୍ଟ୍ ପ୍ରଦାନ କରାଯାଇଥିଲା। ସେ ଏ ବିଷୟରେ ଚମ୍ପୁଆ ବିଡିଓଙ୍କ ଦୃଷ୍ଟି ଆକର୍ଷଣ କରିବେ।