ନବରଙ୍ଗପୁର,୧୪।୫(ବି.ପ୍ର.): ଦିବ୍ୟାଙ୍ଗ ହେଲେବି ସକ୍ଷମ। ଦୃଢ଼ ମନ ଓ ପରିଶ୍ରମ ବଞ୍ଚତ୍ବାର ରାହା ଦେଇଛି। ତେବେ ନବରଙ୍ଗପୁର ସତ୍ୟ ସାଇ ସେବା ସମିତିର କିଛି ଆର୍ଥିକ ସହାୟତା ଦିବ୍ୟାଙ୍ଗ ଝୁନୁ ଭତରାଙ୍କ ବ୍ୟବସାୟରେ ସହାୟକ ହୋଇପାରିଛି। ଏଭଳି ଘଟଣା ଦେଖିବାକୁ ମିଳିଛି ସଦର ବ୍ଲକ ବଙ୍ଗାପାଲି ଗାଁରେ।
ନବରଙ୍ଗପୁର ବ୍ଲକ ପୂଜାରୀଗୁଡା ପଞ୍ଚାୟତ ଅଧୀନ ବଙ୍ଗାପାଲି ଗାଁର ସୁବର୍ଣ୍ଣ ଓ ନୀଳକଣ୍ଠ ଭତରା ଝିଅ ଝୁନୁ। ଜନ୍ମରୁ ଦିବ୍ୟାଙ୍ଗ। ୨ଗୋଡ଼ ଠିକ୍ ନ ଥିବାରୁ ସେ ଭଲଭାବେ ଚାଲିବୁଲି ପାରନ୍ତି ନାହିଁ। ନବରଙ୍ଗପୁର ସତ୍ୟ ସାଇ ସେବା ସମିତି ପକ୍ଷରୁ ୨୦୧୦ରେ ଝୁନୁଙ୍କୁ ୧୫ ଶହ ଟଙ୍କା ସହାୟତା କରାଯାଇଛି। ନିଜର ଝୁପୁଡି କୁଡ଼ିଆରେ ଝୁନୁ ଦୋକାନଟିଏ ଆରମ୍ଭ କଲେ। ଧୀରେ ଧୀରେ ବ୍ୟବସାୟ ବଢିବା ପରେ ଏବେ ଅଧିକ ଦି ପଇସା ରୋଜଗାର କରିବାରେ ସକ୍ଷମ ହୋଇ ପାରିଛନ୍ତି। ଏହାପରେ ପ୍ରଶାସନ ପକ୍ଷରୁ ଟ୍ରାଇ ସାଇକଲ ଓ ଆଶା ବାଡ଼ି ମଧ୍ୟ ଯୋଗାଇ ଦିଆଯାଇଛି। ୭ ଶହ ଟଙ୍କା ଭତ୍ତା ଓ ଚାଉଳ ମଧ୍ୟ ମିଳୁଛି। ୭ ବର୍ଷ ତଳେ ରାମେଶ୍ୱର ଭତରାଙ୍କୁ ସେ ବିବାହ କରିଥିଲେ। ଏବେ ବେଶ୍ ଖୁସିରେ ତାଙ୍କ ସଂସାର ଚାଲିଛି। ସରକାର ସବୁ ସୁବିଧା ଯୋଗାଉଛନ୍ତି। ସ୍ବଚ୍ଛ ଭାରତ ନାଁରେ ବ୍ୟାପକ ଅନୁଦାନ ଗାଁ ମାନଙ୍କରେ ଖର୍ଚ୍ଚ କରାଯାଉଛି। କିନ୍ତୁ ଦିବ୍ୟାଙ୍ଗଙ୍କ ପାଇଁ ସ୍ବତନ୍ତ୍ର ଶୌଚାଳୟ କରାଇଲେ ବିଶେଷ ଉପକୃତ ହେବେ ବୋଲି ସେ କହିଛନ୍ତି। ପାଇଖାନା ଓ ପାଣି ସୁବିଧା ନଥିବାରୁ ଶୌଚ ପାଇଁ ବାହାରକୁ ଯିବା ଦୁଃଖର ବିଷୟ ବୋଲି ଝୁନୁ କହିଛନ୍ତି। ପ୍ରଶାସନ ଏଥିପ୍ରତି ଦୃଷ୍ଟି ଦେଲେ ଦିବ୍ୟାଙ୍ଗ ପାଇଁ ଭଲ ହେବ। ସତ୍ୟ ସାଇ ସେବା ସମିତି ୧୫ ଶହ ଟଙ୍କା ଆର୍ଥିକ ସହାୟତା ଯୋଗାଇଥିଲେ। ସେମାନଙ୍କ ମାର୍ଗ ଦର୍ଶନ ଯୋଗୁ ଦୋକାନ ଟିଏ କରି ରୋଜଗାର କରିପାଉଛି। ଦିବ୍ୟାଙ୍ଗ ଲୋକ ଆଉ ଅନ୍ୟ କିଛି କରିବା ସମ୍ଭବ ନଥିବାରୁ ଦୋକାନରେ ବସି ବ୍ୟବସାୟ କରି ରୋଜଗାରକ୍ଷମ ହୋଇପାରିଛି ବୋଲି ଝୁନୁ କହିଛନ୍ତି।
