ଛତ୍ରପୁର,୨୪।୯(ସନ୍ତୋଷ ପାଢ଼ୀ):ଭଳିକି ଭଳି ସୁନ୍ଦର ସୁନ୍ଦର କଣ୍ଢେଇ। ଗଣେଶ, ଶ୍ରୀଜଗନ୍ନାଥ, ବଳଭଦ୍ର, ସୁଭଦ୍ରା, ଏମିତି ଅନେକ ମୂର୍ତ୍ତି ସହ ପିଲାଙ୍କ ଖେଳଣା ପାଇଁ ଶଗଡ଼, ରାଜାରାଣୀ, ଘୋଡା, ମାଛ, ଘରଚଟିଆ ବସା, ଘର ଓ ଅଫିସର ସୌନ୍ଦର୍ଯ୍ୟକୁ ଦୁଇ ଗୁଣିତ କରିବା ପାଇଁ ଦିବ୍ୟଙ୍ଗ ମହିଳାମାନେ ନଡ଼ିଆ କତାରେ ତିଆରି କରୁଛନ୍ତି ସୁନ୍ଦର ମନଲୋଭା କଣ୍ଢେଇ। ଗଞ୍ଜାମ ଜିଲା ବଳରାମପୁରର ୭ଜଣ ଦିବ୍ୟାଙ୍ଗ ମହିଳା ମିଶି ଏହିସବୁ କାର୍ଯ୍ୟ କରୁଛନ୍ତି। ପୂର୍ବରୁ ନିଜକୁ ଅକ୍ଷମ ଭାବି ଘରେ ବସି ରହୁଥିଲେ। ଦିନେ ଗ୍ରାମର ଜଣେ ଶିକ୍ଷିତ ମା’ ଆସି ସେମାନଙ୍କୁ ଏକତ୍ରିତ କରି କିଛି ଟଙ୍କା ରୋଜଗାର କରିବାର ପନ୍ଥା ଦେଖାଇ ମନରେ ଆସା ସଞ୍ଚାର କରିଥିଲେ। ଏବଂ କିଛି ଦିନ ପରେ ଜଣେ କଣ୍ଢେଇ କାରିଗରଙ୍କୁ ଡାକି ଏକ ସପ୍ତାହ ଧରି ଶିକ୍ଷା ଗ୍ରହଣ କରିଥିଲେ। ପରେ ନଡ଼ିଆ କତା ମଗାଇ ସେଥିରେ ରଙ୍ଗ ବେରଙ୍ଗ ସୂତା ସହ ଅନେକ ପ୍ରକାର ସାମଗ୍ରୀ ମିଶାଇ ଅତି ସୁନ୍ଦର ସୁନ୍ଦର ମୂର୍ତ୍ତି କଣ୍ଢେଇ, ଘର ସାମଗ୍ରୀ, ଏମିତି ଅନେକ ପ୍ରକାର ଘରକୁ ସୁନ୍ଦର ଲାଗିବା ସହ ପିଲାଙ୍କ ଖେଳନା ଆଦି ପ୍ରସ୍ତୁତ କରି ଏବେ ରୋଜଗାରକ୍ଷମ ହୋଇପାରିଛନ୍ତି । ଏଭଳି କଣ୍ଢେଇ ଲୋକଙ୍କୁ ଅଧିକ ପସନ୍ଦ ଆସୁଥିବା ହେତୁ କଣ୍ଢେଇର ତିଆରି ମୂଲ୍ୟ ଠାରୁ ଅଧିକ ଲାଭ ହୋଇଥିବା କହିଛନ୍ତି। ଏଭଳି କାମ କରି ନିଜେ ସ୍ବାବଲମ୍ବୀ ହେବାସହ ଘରର ଆର୍ଥିକ ସ୍ଥିତିରେ ମଧ୍ୟ ସହଯୋଗ କରିପାରୁଛନ୍ତି । ଏହି କଣ୍ଢେଇ ତିଆରି କଳାକୁ ଆହୁରି ଆଗକୁ ନେବାକୁ ଇଛା ଥିବା ବେଳେ ସରକାରଙ୍କ ସହଯୋଗ ଲୋଢିଛନ୍ତି।