ଭୁବନ, ୪।୧୨(ଡି.ଏନ୍.ଏ.)-ଦିବ୍ୟାଙ୍ଗଙ୍କୁ ମୁଖ୍ୟସ୍ରୋତରେ ସାମିଲ କରାଇବା, ସେମାନେ କୌଣସି ଗୁଣରେ କମ୍ ନୁହନ୍ତି ବୋଲି ଅନୁଭବ କରାଇବା ଏବଂ ସେମାନଙ୍କ ମଧ୍ୟରେ ଥିବା ଦକ୍ଷତାର ବିକଶିତ କରାଇବା ଭଳି ମହତ୍ ଉଦ୍ଦେଶ୍ୟ ନେଇ ମଙ୍ଗଳବାର ପାଳିତ ହୋଇଛି ବିଶ୍ୱ ଭିନ୍ନକ୍ଷମ ଦିବସ। ହେଲେ ଢେଙ୍କାନାଳ ଜିଲା ଭୁବନରୁ ଦିବସ ପାଳନ ବେଳେ ଆସିଛି ନକାରାତ୍ମକ ଚିତ୍ର। ଶିକ୍ଷା ବିଭାଗର ଦୂରଦୃଷ୍ଟି ଅଭାବରୁ ହାତଗଣତି ଦିବ୍ୟାଙ୍ଗ ଛାତ୍ରୀଛାତ୍ର କାର୍ଯ୍ୟକ୍ରମରେ ଯୋଗଦେଇଥିବାବେଳେ ସେମାନଙ୍କୁ ହଟହଟା ହେବାକୁ ପଡ଼ିଛି। କେବଳ ଏତିକି ନୁହେଁ, ସଚେତନତା ଶୋଭାଯାତ୍ରା ନାମରେ ପିଲାମାନଙ୍କୁ ୨ କିମି ଚଲାଇବାକୁ ନେଇ ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି।
ପୂର୍ବ ନିଷ୍ପତ୍ତି ଅନୁଯାୟୀ ମଙ୍ଗଳବାର ସ୍ଥାନୀୟ ବଡ଼ହାଟ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ଶିକ୍ଷା ବିଭାଗ ପକ୍ଷରୁ ଅନ୍ତର୍ଜାତୀୟ ଦିବ୍ୟାଙ୍ଗ ଦିବସ ପାଳନ କରାଯିବାକୁ ନିଷ୍ପତ୍ତି ହୋଇଥିଲା। ମୁଖ୍ୟଅତିଥି ଭାବେ ବ୍ଲକ ଅଧ୍ୟକ୍ଷ ଧର୍ମାନନ୍ଦ ବରାଳ, ସମ୍ମାନିତ ଅତିଥି ବିଡିଓ ଆଶୀର୍ବାଦ ପରିଡ଼ା, ବିଇଓ ପ୍ରତାପ ଶତପଥୀ, ସିଆର୍ସିସି ରାଜଲକ୍ଷ୍ମୀ ଟୁଡୁ, ଏବିଇଓ ପୁଷ୍ପାଞ୍ଜଳି ମିଶ୍ର, ସୁମରି ପ୍ରଧାନ ପ୍ରମୁଖ ଉପସ୍ଥିତ ଥିଲେ। ତେବେ ସୂଚନା ଅଭାବରୁ ବ୍ଲକ ଏବଂ ଏନ୍ଏସିର ବିଭିନ୍ନ ସ୍କୁଲରେ ପଢୁଥିବା ୪୬୨ ଦିବ୍ୟାଙ୍ଗ ଛାତ୍ରୀଛାତ୍ରଙ୍କ ମଧ୍ୟରୁ ମାତ୍ର ୫୩ ଜଣ ଉପସ୍ଥିତ ଥିଲେ। ଅପରପକ୍ଷେ ବ୍ଲକ କାର୍ଯ୍ୟାଳୟଠାରୁ ବଡ଼ହାଟ ସ୍କୁଲ ଯାଏ ୨ କି.ମି. ଯାଏ ଛାତ୍ରୀଛାତ୍ରଙ୍କୁ ପ୍ଲାକାର୍ଡ ଧରାଇ ରାଲିର ଆୟୋଜନ କରାଯାଇଥିଲା। ପିଲାମାନେ ବଡ଼କଷ୍ଟରେ ଶୋଭାଯାତ୍ରାରେ ଆସିଥିଲେ। ଏହାପରେ ଚିତ୍ରାଙ୍କନ, ପ୍ରବନ୍ଧ, ସଂଗୀତ, ମ୍ୟୁଜିକ୍ ଚେୟାର ପ୍ରତିଯୋଗିତା କରାଯାଇ କୃତୀ ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ତେବେ ଦିବ୍ୟାଙ୍ଗ ଦିବସରେ ଏଭଳି ଅବ୍ୟବସ୍ଥାକୁ ବୁଦ୍ଧିଜୀବୀ ନାପସନ୍ଦ କରିଛନ୍ତି।
ଏ ସଂକ୍ରାନ୍ତରେ ବିଇଓ କୁହନ୍ତି, ଦାୟିତ୍ୱରେ ଥିବା ଅଧିକାରୀ ହୁଏତ ସୂଚନା ଦେଇନାହାନ୍ତି। ତେଣୁ ଦିବ୍ୟାଙ୍ଗ ଛାତ୍ରୀଛାତ୍ରଙ୍କ ସଂଖ୍ୟା କମ୍ ଥିଲା। କେତେକ କ୍ଷେତ୍ରରେ ଅଭିଭାବକ ମଧ୍ୟ ପିଲାମାନଙ୍କୁ ଛାଡ଼ିବାକୁ ଅଗଭର ହେଉ ନ ଥିଲେ। ବିଭାଗ ପକ୍ଷରୁ ଯଥାସାଧ୍ୟ ଉଦ୍ୟମ କରି ପିଲାମାନଙ୍କୁ ଅଣାଯାଇଥିଲା।