ଧର୍ମଶାଳା,୨୮ା୩(ଡି.ଏନ.ଏ.):ଦୁର୍ଘଟଣା ବଦଳାଇଦେଲା ଜୀବନର ଗତିପଥ। ସାଧାରଣ ମଣିଷଙ୍କ ପରି ବେଶ ସୁସ୍ଥ ଥିବା ଯାଜପୁର ଜିଲା ଧର୍ମଶାଳା ବ୍ଲକ୍ କୁମାରୀ ଗ୍ରାମର କ୍ରୀଡ଼ା ପ୍ରତିଭା ସରୋଜ ସାହୁ (୪୬) ଏକ ଦୁର୍ଘଟଣାର ଶିକାର ହୋଇ ଏବେ ଦିବ୍ୟାଙ୍ଗ ଜୀବନ ବିତାଉଛନ୍ତି। ହେଲେ ସେ ପୁରୀ ଅଞ୍ଚଳର ଜଣେ ଯୁବକଙ୍କ ପ୍ରେରଣାକ୍ରମେ ପାରାଅଥଲେଟିକ୍ସରେ ଭାଗ ନେଇ ପ୍ରଶଂସା ସାଉଣ୍ଟି ପାରିଛନ୍ତି। ଦୁର୍ଘଟଣା ପୂର୍ବରୁ ସରୋଜ କ୍ରିକେଟ, ଫୁଟ୍ବଲ, କବାଡ଼ି ଆଦି ପ୍ରତିଯୋଗିତାରେ ଭାଗ ନେଉଥିଲେ। ଦୁର୍ଘଟଣା ପରେ ହ୍ବିଲ୍ ଚେୟାର୍ରେ ଏବେ ସମୟ ବିତୁଛି। ହେଲେ ତାଙ୍କର ପୂର୍ବ ମନୋବଳ ଭାଙ୍ଗିଯାଇନି। ହ୍ବିଲ୍ ଚେୟାରରେ ସେ ବାସ୍କେଟବଲ୍, ଶଟ୍ପୁଟ୍, ଜାଭେଲିନ୍ ଥ୍ରୋ, ଡିସ୍କସ୍ ଥ୍ରୋ, ମାରାଥନ ଓ ତୀରନ୍ଦାଜୀ ଆଦିରେ ଜଣେ ପାରା ଅଥଲେଟ ଭାବେ ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ଅନେକ ପଦକ ଓ ପ୍ରମାଣ ପତ୍ର ପାଇଛନ୍ତି।
ତାଙ୍କ ବାପା ରସୁଲପୁର ବ୍ଲକ୍ କଲଣ ଗ୍ରାମର ବ୍ୟବସାୟୀ ସ୍ବର୍ଗତ ପରମାନନ୍ଦ ସାହୁ ପରିବାର ସହିତ ୧୯୯୬ରୁ ଆସି କୁମାରୀରେ ରହୁଥିଲେ। ୨୦୧୭ ନଭେମ୍ବର ୧ ତାରିଖ କାର୍ତ୍ତିକ ମାସରେ ସରୋଜ ଗଁାକୁ ଯାଇ ଓଉ ଗଛରେ ଚଢ଼ିଥିଲେ। ଭାରସାମ୍ୟ ହରାଇ ତଳକୁ ଖସିପଡ଼ି ଗୁରୁତର ହୋଇଥିଲେ। ଚିକିତ୍ସା ସତ୍ତ୍ୱେ ସେହିଦିନଠାରୁ ସେ ଆଉ ଚାଲିପାରୁ ନାହାନ୍ତି। ଏବେ ସେ କୁମାରୀ ଗଁାରେ ଛୋଟ ଜଳଖିଆ ଦୋକାନ କରି ପରିବାର ପ୍ରତିପୋଷଣ କରୁଛନ୍ତି। ଟାଟା ଷ୍ଟିଲ୍ ଓ ଷ୍ଟେଟ୍ ବ୍ୟାଙ୍କ୍ ପକ୍ଷରୁ ଦିଲ୍ଲୀ, ପଞ୍ଜାବ, ଚେନ୍ନାଇ, ଭୁବନେଶ୍ୱର ଆଦି ବିଭିନ୍ନ ସ୍ଥାନରେ ଆୟୋଜିତ ଆନ୍ତଃରାଜ୍ୟସ୍ତରୀୟ ପାରା ଆଥଲେଟିକ୍ସରେ ଅଂଶଗ୍ରହଣ କରି ସ୍ବର୍ଣ୍ଣ, ରୌପ୍ୟ, ବ୍ରୋଞ୍ଜ, ପ୍ରମାଣପତ୍ର ଓ ଆର୍ଥତ୍କ ପୁରସ୍କାର ପାଇଛନ୍ତି। ତୀରନ୍ଦାଜୀ ପ୍ରତିଯୋଗିତାରେ ସେ ସ୍ବର୍ଣ୍ଣପଦକ ହାସଲ କରିଛନ୍ତି। ସେ ଜାତୀୟ ବାସ୍କେଟବଲ୍ ଦଳରେ ସ୍ଥାନ ପାଇଛନ୍ତି। ଭିନ୍ନକ୍ଷମ ହୋଇଥିଲେ ମଧ୍ୟ ସରୋଜଙ୍କୁ ଆଗାମୀ ଦିନରେ ବିହାର ଓ ପଶ୍ଚିମବଙ୍ଗରେ ହେବାକୁ ଥିବା ବିଭିନ୍ନ ଜାତୀୟସ୍ତରୀୟ ପ୍ରତିଯୋଗିତାରେ ଭାଗ ନେବାକୁ ଚୟନ କରାଯାଇଛି। ପୂର୍ବରୁ ଝାଡ଼ଖଣ୍ଡରେ ହୋଟେଲ୍ ବ୍ୟବସାୟ କରୁଥିବା ସରୋଜ ଏହି ସ୍ବଳ୍ପ ଆୟରେ ପରିବାର ଚଳାଇ ପାରୁନାହାନ୍ତି। ଘରୋଇ ସ୍କୁଲରେ ଶିକ୍ଷା ଲାଭ କରୁଥିବା ପୁଅଝିଅ ଏବେ ସରକାରୀ ବିଦ୍ୟାଳୟରେ ପଢୁଛନ୍ତି। ବୃଦ୍ଧା ମା’, ସ୍ତ୍ରୀ, ପୁଅ ଓ ଝିଅଙ୍କ ମୁହଁରେ ଦାନାମୁଠେ ଦେବାକୁ ହ୍ବିଲଚେୟାରରେ ବସି ସଂଘର୍ଷ କରୁଛନ୍ତି। ତାଙ୍କୁ କୌଣସି ପ୍ରକାର ସରକାରୀ ସହାୟତା ମିଳିନାହିଁ। ସରକାରୀ କିମ୍ବା ବେସରକାରୀ ଅନୁଷ୍ଠାନ ପକ୍ଷରୁ ସରୋଜଙ୍କୁ ସହାୟତା ମିଳିଲେ ସେ ପାରା ଅଥଲେଟରେ ଭାଗ ନେଇ ରାଜ୍ୟ ଓ ଦେଶ ପାଇଁ ଗୌରବ ଆଣିପାରନ୍ତେ ବୋଲି ଗ୍ରାମବାସୀ ପ୍ରକାଶ କରିଛନ୍ତି।