ଶରୀରର ୭୫% ଭାଗ ଭିନ୍ନକ୍ଷମ। ନିଜର ଇଚ୍ଛାଶକ୍ତି ଓ ଦୃଢ଼ ମନୋବଳ ଯୋଗୁ ସେ ଆଜି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ପେସାରେ ସେ ଜଣେ ଶିକ୍ଷକ ହୋଇଥିଲେ ହେଁ ଗୀତ ଲେଖିବା, ବିଭିନ୍ନ ଭଜନ ଓ ଆଧୁନିକ ଆଲବମ୍ ପ୍ରସ୍ତୁତ କରିବା ସହ ଅଭିନୟ କରିବା, ନିର୍ଦ୍ଦେଶନା ଦେବା ଓ ଗୀତ ଗାଇବା ହେଉଛି ତାଙ୍କର ନିଶା। ସେ ହେଉଛନ୍ତି କେନ୍ଦୁଝର ଜିଲା ସଦର ବ୍ଲକ ଅନ୍ତର୍ଗତ କେରୀ ଗ୍ରାମରେ ରହୁଥିବା ବାସନ୍ତି ଏବଂ ରଘୁନାଥ ମହାନ୍ତଙ୍କ ପୁଅ ଗଣନାଥ।
ସ୍କୁଲ୍ରେ ପଢ଼ିବା ବେଳରୁ ହିଁ ସେ ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରି କୃତିତ୍ୱ ଅର୍ଜନ କରୁଥିଲେ। ବର୍ତ୍ତମାନ ସୁଦ୍ଧା ସେ ୩୦୦ରୁ ଊର୍ଦ୍ଧ୍ୱ ଝୁମର ଗୀତ, ୧୦୦ରୁ ଅଧିକ ଭଜନ, ଆଧୁନିକ ଗୀତ, ୫୦ଟି କାହାଣୀ, ୫ଟି ନାଟକ, ୨ଟି ସଂଳାପ ଓ ୧୦ଟି ଚିତ୍ରନାଟ୍ୟ କରିସାରିଛନ୍ତି। ଶିଶୁମାନଙ୍କ ଉପରେ ବହୁ ନାଟକ ଭିଡିଓ, ଆଲବମ୍ ପ୍ରସ୍ତୁତ କରିଛନ୍ତି। କେବଳ ଏତିକି ନୁହେଁ, ସେ ୟୁଟ୍ୟୁବ୍ରେ ମଧ୍ୟ ଅନେକ ଭିଡିଓ ପୋଷ୍ଟ କରି ଦର୍ଶକଙ୍କ ହୃଦୟ ଜିତି ପାରିଛନ୍ତି। ନିକଟରେ ‘ଶିଶୁ ଦିବସ ଅବସରରେ ମୁଁ ପଢ଼ିବି’ ଶୀର୍ଷକରେ ଗୀତ ରଚନା ଓ ସଙ୍ଗୀତ ନିର୍ଦ୍ଦେଶନା ଦେଇଥିଲେ, ଯାହାକି ୟୁଟ୍ୟୁବ୍ରେ ଅନେକଙ୍କୁ ବେଶ୍ ପସନ୍ଦ ଆସିଥିଲା। ସେହିପରି କୀଚକେଶ୍ୱରୀ ଫିଲ୍ମ ବ୍ୟାନରରେ ତାଙ୍କର ବେଟି ପଢ଼ାୟେ, ଆଗେ ବଢ଼ାୟେ ଓ ଷ୍ଟପ ଚାଇଲ୍ଡ ଲେବର ଭଳି ସଚେତନତାଧର୍ମୀ କ୍ଷୁଦ୍ର ଚଳଚ୍ଚିତ୍ର ଲୋକାଦୃତ ହୋଇଥିବା ବେଳେ ସୋସିଆଲ୍ ମିଡିଆରେ ବେଶ୍ ପ୍ରସାରିତ ହୋଇପାରିଛି।
ଭଲ ଭାବରେ ଚଲାବୁଲା ଓ ଖେଳକୁଦ କରିପାରୁ ନ ଥିବା ଗଣନାଥ ଫାଙ୍କା ସମୟରେ ବିଦ୍ୟାଳୟର ପିଲାମାନଙ୍କୁ ଅଭିନୟ ଶିଖାଇଥା’ନ୍ତି। ୨୦୧୭ ମସିହାରେ କଳାକାର ସିନେ ପ୍ରଡକ୍ସନ, ବାଲେଶ୍ୱର ପକ୍ଷରୁ ତାଙ୍କୁ ଶ୍ରେଷ୍ଠ ରାଜ୍ୟସ୍ତରୀୟ ଚଳଚ୍ଚିତ୍ର ସମ୍ମାନ ଓ ପୁରସ୍କାର ପ୍ରାପ୍ତ ହୋଇଛି। ଏହା ବ୍ୟତୀତ ସେ ଅନେକ ଅନୁଷ୍ଠାନ ପକ୍ଷରୁ ସମ୍ମାନିତ ଓ ପୁରସ୍କୃତ ହୋଇଛନ୍ତି।
ଅଲ୍ ଇଣ୍ଡିଆ ରେଡିଓ, ଏଫ୍ଏମ୍ ଚ୍ୟାନେଲରେ ଝୁମର ଗାୟକ କିଶୋର ପ୍ରହ୍ଲାଦ ମହାନ୍ତିଙ୍କ କଣ୍ଠରେ ତାଙ୍କ ଲିଖିତ ଝୁମର ଗୀତ ବେଶ୍ ପ୍ରଶଂସିତ ହୋଇପାରିଛି। ଆଗାମୀ ଦିନରେ ସିନେମା କରିବା ସହ କଳାକ୍ଷେତ୍ରରେ ନିଜକୁ ରାଜ୍ୟସ୍ତରରେ ପ୍ରତିଷ୍ଠିତ କରିବାକୁ ଲକ୍ଷ୍ୟ ରଖିଥିବା ପ୍ରକାଶ କରନ୍ତି ଗଣନାଥ।
– ନରେଶ ଚନ୍ଦ୍ର ପଟ୍ଟନାୟକ