ନୂଆଦିଲ୍ଲୀ,୨୧।୧୨ : ଅନେକ ଦେଶରେ କରୋନା ସଂକ୍ରମଣ ବୃଦ୍ଧି ପାଇବା ମଧ୍ୟରେ ଭାରତ ଯୋଡା ଯାତ୍ରା ବନ୍ଦ କରିବା ସମ୍ପର୍କରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ରାହୁଲ ଗାନ୍ଧୀଙ୍କୁ ଏକ ଚିଠି ଲେଖିଛନ୍ତି। ଏହି ପ୍ରସଙ୍ଗରେ କଂଗ୍ରେସ ଏବେ ଏହାର ଜବାବ ଦେଇଛି। ବୁଧବାର କଂଗ୍ରେସ ଏମ୍ପି ଅଧିର ରଞ୍ଜନ ଚୌଧୁରୀ କହିଛନ୍ତି, ମୁଁ ଭାଜପାକୁ ପଚାରିବାକୁ ଚାହୁଁଛି ଗୁଜୁରାଟ ନିର୍ବାଚନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କରୋନା ମାର୍ଗଦର୍ଶିକା ଅନୁସରଣ କରିଛନ୍ତି କି?
ସେ କହିଛନ୍ତି, ମୁଁ ଭାବୁଛି ମାଣ୍ଡବ୍ୟ ରାହୁଲ ଗାନ୍ଧୀଙ୍କ ଭାରତ ଯୋଡା ଯାତ୍ରାକୁ ପସନ୍ଦ କରୁନାହାଁନ୍ତି, କିନ୍ତୁ ଲୋକମାନେ ଏହାକୁ ପସନ୍ଦ କରୁଛନ୍ତି ଏବଂ ଏଥିରେ ଯୋଗ ଦେଉଛନ୍ତି। ଜନସାଧାରଣଙ୍କ ଦୃଷ୍ଟି ହଟାଇବା ପାଇଁ ଶାସକ ଦଳ ମାଣ୍ଡବ୍ୟଙ୍କୁ ନିଯୁକ୍ତି କରିଛି ବୋଲି ସେ ଅଭିଯୋଗ କରିଛନ୍ତି।
ଏଥି ସହିତ କଂଗ୍ରେସ ଏମ୍ପି କାର୍ତ୍ତି ଚିଦାମ୍ବରମ ମଧ୍ୟ ମାଣ୍ଡବ୍ୟଙ୍କ ଚିଠି ନେଇ କଟାକ୍ଷ କରିଛନ୍ତି। ସେ କହିଛନ୍ତି, ମୁଁ ଚିଠି ଦେଖି ନାହିଁ, କିନ୍ତୁ ଆଜି କୋଭିଡ ପ୍ରୋଟୋକଲ କେଉଁଠାରେ ଏବଂ କ’ଣ ପାଇଁ? ଏବେ ସର୍ବସାଧାରଣ ସମାବେଶ ପାଇଁ କୌଣସି ବାଧ୍ୟତାମୂଳକ କୋଭିଡ ପ୍ରୋଟୋକଲ ନାହିଁ। ଭାରତ ଯୋଡା ଯାତ୍ରା ଉପରେ ହଠାତ ଧ୍ୟାନ କାହିଁକି? ଏହା ବ୍ୟତୀତ ଟିଏମସି ଏମ୍ପି ଡୋନା ସେନ ମଧ୍ୟ ମାଣ୍ଡବ୍ୟଙ୍କ ଚିଠି ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ କେନ୍ଦ୍ର ସରକାର ଏ ସମ୍ପର୍କରେ ଏକ ପରାମର୍ଶ ଦେଇ ପାରିଥାନ୍ତେ।
ଆମେ ସଂସଦରେ ଅଛୁ, କିନ୍ତୁ ମାସ୍କ ପିନ୍ଧିବା କିମ୍ବା ଅନ୍ୟାନ୍ୟ ପଦକ୍ଷେପ ନେବା ପାଇଁ କୌଣସି ସର୍କୁଲାର ଆସିନାହିଁ। ରାଜ୍ୟ ସରକାରଙ୍କୁ ପ୍ରାଧାନ୍ୟ ଦେବା କେନ୍ଦ୍ରର ଏକମାତ୍ର କର୍ତ୍ତବ୍ୟ ନୁହେଁ। ତାଙ୍କର ଦାୟିତ୍ୱ ଜନସାଧାରଣଙ୍କ ପ୍ରତି, ଯେଉଁଥିରେ ସରକାର ବିଫଳ ହୋଇଛନ୍ତି। ତେଣୁ ଆମେ ସରକାରଙ୍କଠାରୁ ଏନେଇ ଅଧିକ କିଛି ଆଶା କରୁନାହୁଁ ।