ଭୁବନେଶ୍ୱର,୨୮।୨: ବାଲେଶ୍ୱର ସଂସଦୀୟ କ୍ଷେତ୍ରରୁ ଭାଜପା ଟିକେଟ୍ରେ ପୁଣି ନିର୍ବାଚନ ଲଢ଼ିବାକୁ ଆଗ୍ରହ ଦେଖାଇଛନ୍ତି ପୂର୍ବତନ ଏମ୍ପି ଖାରବେଳ ସ୍ବାଇଁ। ଏ ନେଇ ସେ ପ୍ରସ୍ତୁତିରେ ଲାଗିପଡ଼ିଛନ୍ତି। ଏହା ସହ ସେ ପ୍ରତିଦ୍ବନ୍ଦ୍ବୀ ପ୍ରାର୍ଥୀଙ୍କଠାରୁ ପାଖାପାଖି ୪ ଲକ୍ଷରୁ ଅଧିକ ଭୋଟ୍ରେ ଜିତିବେ ବୋଲି ପ୍ରକାଶ କରିଛନ୍ତି। ଗଣମାଧ୍ୟମକୁ ନିଜର ପ୍ରାର୍ଥିତ୍ୱ ସମ୍ପର୍କରେ ମତ ରଖି ସେ କହିଛନ୍ତି, ୨୦୧୯ରେ ‘କନ୍ଧମାଳରୁ ନିର୍ବାଚନ ଲଢ଼ିବା ପାଇଁ ତାଙ୍କୁ ଶେଷ ସମୟରେ ସୁଯୋଗ ଦିଆଯାଇଥିଲା। ଯଦି ସପ୍ତାହେ କି ୮ ଦିନ ପୂର୍ବରୁ ଟିକେଟ ମିଳିଥା’ନ୍ତା, ତେବେ ଭିନ୍ନ କଥା ହୋଇଥା’ନ୍ତା। ମାତ୍ର ଚଳିତ ବର୍ଷ ସେ ବାଲେଶ୍ୱରରୁ ନିର୍ବାଚନ ଲଢ଼ିବେ ବୋଲି ଦଳର ନେତୃବୃନ୍ଦଙ୍କୁ ଜଣାଇଦେଇଛନ୍ତି।’ କନ୍ଧମାଳରେ ତାଙ୍କୁ କେହି ଚିହ୍ନି ନ ଥିବା ବେଳେ ବାଲେଶ୍ୱରରୁ ସେ ୬ ଥର ନିର୍ବାଚନ ଲଢ଼ିଛନ୍ତି ଏବଂ ୩ ଥର ବିଜୟଲାଭ କରିଛନ୍ତି। ବାଲେଶ୍ବରରେ ଏଥର ତାଙ୍କର ଜିତିବା ଏକପ୍ରକାର ସୁନିଶ୍ଚିତ ବୋଲି ସେ କହଛନ୍ତି।
ସେ ଆହୁରି ମଧ୍ୟ କହିଛନ୍ତି, ‘ବର୍ତ୍ତମାନ ବାଲେଶ୍ୱରରେ ଭାଜପାରୁ ପ୍ରତାପ ଏମ୍ପି ଅଛନ୍ତି ମାନେ ନୁହେଁ ଯେ ସେ ଆଉଥରେ ଲୋକସଭା ଟିକେଟ ପାଇବେ। ଦଳ ଯଦି ତାଙ୍କୁ ପୁଣିଥରେ ଟିକେଟ ଦେବ, ମୋର କିଛି କହିବାର ନାହିଁ। ହେଲେ, ପ୍ରତାପ ଆଉ ନିର୍ବାଚନ ଜିତି ପାରିବେ ନାହିଁ।’
