କଣ୍ଟାବାଞ୍ଜି, ୨ା୯(ଡି.ଏନ.ଏ.) – ବଲାଙ୍ଗୀର ଜିଲା ତୁରେକେଲା ବ୍ଲକ ହିଆଁଲ ପଞ୍ଚାୟତ ଅନ୍ତର୍ଗତ ଦାବିରି ଗାଁର ଭୁଲେଶ୍ୱରୀ ମଲ୍ଲିକ(୪୭)। ୨୦୧୦ରେ ସ୍ବାମୀ ଶ୍ରୀଧର ମଲ୍ଲିକଙ୍କ ମୃତ୍ୟୁ ପରେ ପରିବାର ଭରଣ ପୋଷଣର ବୋଝ ତାଙ୍କ ଉପରେ ପଡିଲା। ସେହିଦିନୁ ପୁଅ, ଦୁଇ ଝିଅଙ୍କୁ ନେଇ ସେ ଦୁଃଖକଷ୍ଟରେ ପରିବାର ଚଳାଇଛନ୍ତି। ଏକ ଏକରରୁ କମ୍ ତାଙ୍କର ଜମି ବାଡି। ସ୍ବାମୀର ମୃତ୍ୟୁ ପରେ ବିଧବା ଭତ୍ତା ଏବଂ ପରିବାର ମଙ୍ଗଳ ଯୋଜନାରେ ମିଳିବାକୁ ଥିବା କୋଡିଏ ହଜାର ଟଙ୍କାର ସହାୟତା ଏ ଯାଏ ତାଙ୍କୁ ମିଳିନାହିଁ। ଏ ନେଇ ସେ ପଞ୍ଚାୟତ ଏବଂ ବ୍ଲକ କାର୍ଯ୍ୟାଳୟକୁ ବାରମ୍ବାର ଯାଇ ନିରାଶ ହୋଇଛନ୍ତି। ଭଙ୍ଗା କୁଡିଆରେ ରହୁଥିଲେ ମଧ୍ୟ ପ୍ରଧାନମନ୍ତ୍ରୀ ଆବାସ କିମ୍ବା ଇନ୍ଦିରା ଆବାସ ଯୋଜନାରେ ତାଙ୍କୁ ଘର ମିଳିନାହିଁ। ସବୁଥିରୁ ନିରାଶ ହେବା ପରେ ପୁଅ ଓ ଦୁଇ ଝିଅକୁ ଧରି ଅନେକ ଥର ସେ ବାହାର ରାଜ୍ୟକୁ ଦାଦନ ଖଟିବାକୁ ଯାଇଛନ୍ତି। ୨୦୧୯ରେ କାମ କରିବାକୁ ହାଇଦ୍ରାବାଦ ଯାଇଥିଲେ । କରୋନା ପରେ ସେଠାରେ କାମ ବନ୍ଦ ହୋଇଯିବାରୁ ସେ ଏଠାକୁ ଫେରି ଆସି ଦୁର୍ବିଷହ ଜୀବନ ବିତାଉଛନ୍ତି। ଜବ୍କାର୍ଡ ନ ଥିବାରୁ ଏମଜିଏନଆରଇଜିଏସ କିମ୍ବା ଅନ୍ୟ କୌଣସି ଯୋଜନାରେ କାମ କରି ପାରୁନାହାନ୍ତି। ତେଣୁ ପୁଣିଥରେ ସେ ଦାଦନ ଖଟି ଯିବାକୁ ବାଧ୍ୟ ହେବେ ବୋଲି କହନ୍ତି ଭୁଲେଶ୍ୱରୀ । ଏ ନେଇ ସରପଞ୍ଚ ହରିସି ପୋଢଙ୍କୁ ପଚାରିବାରୁ ଭୁଲେଶ୍ୱରୀଙ୍କ ସମସ୍ୟା ସମ୍ପର୍କରେ ତାଙ୍କ ପାଖରେ ଖବର ନାହିଁ। ବିଧବା ଭତ୍ତା ଏବଂ ଅନ୍ୟାନ୍ୟ ସରକାରୀ ସହାୟତା ପାଇଁ ଆବେଦନ କଲେ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଛନ୍ତି।
