ସମ୍ବଲପୁର,୧୦ା୭(ଶୁଭାଶିଷ ପାଢୀ) : ରାଜ୍ୟ ସରକାର ବିଧବା, ଦିବ୍ୟାଙ୍ଗ, ବୃଦ୍ଧାବୃଦ୍ଧଙ୍କ ପଇଁ ଭତ୍ତା ବ୍ୟବସ୍ଥା କରିଛନ୍ତି। ଏବେ ଭତ୍ତା ଟଙ୍କା ଜମାଖାତାରେ ଦେବା ବ୍ୟବସ୍ଥା ଲାଗୁ ହେବା ପରେ ହିତାଧିକାରୀଙ୍କ ଦୁଃଖ ବଢିଯାଇଛି। ମାସ ମାସ ଧରି ଭତ୍ତା ପାଇବାରୁ ବଞ୍ଚିତ ହେଉଛନ୍ତି। ସମ୍ବଲପୁର ମହାନଗର ନିଗମ ୩୯ନଂ. ୱାର୍ଡ ଗୁଲୁଣ୍ଡା ଗ୍ରାମର ସୁରେଖା ଦେହୁରି ମାତ୍ର ୫ଶହ ଟଙ୍କା ବିଧବା ଭତ୍ତା ପାଇଁ ଅଫିସରୁ ଅଫିସ ବୁଲୁଛନ୍ତି। ସୁରେଖାଙ୍କୁ ଭେଟି ଗ୍ରାମର ପ୍ରିୟରଞ୍ଜନ ସାହୁ ଘଟଣା ସମ୍ପର୍କରେ ପଚାରି ବୁଝିଥିଲେ। ଏହାକୁ ନେଇ ସିଏମ୍ଓ, ଜିଲାପାଳ ସମ୍ବଲପୁରଙ୍କୁ ସାମାଜିକ ଗଣମାଧ୍ୟମ ଟୁଇଟର ମାଧ୍ୟମରେ ଅଭିଯୋଗ କରିଥିଲେ। ଜିଲାପାଳ ଅନନ୍ୟା ଦାସ ଅଭିଯୋଗ ଉପରେ ଉତ୍ତର ଦେଇ ଶୀଘ୍ର ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ମଧ୍ୟ ଦେଇଥିଲେ।
ସୁରେଖାଙ୍କ ଅଭିଯୋଗ କ୍ରମେ ସେ ୭ମାସ ହେଲା ଭତ୍ତା ପାଇନାହାନ୍ତି। ୨୦୨୦ରେ ସେ ବ୍ୟାଙ୍କରେ ଜମାଖାତା ଖୋଲିଛନ୍ତି। କିଛିମାସ ଠିକ୍ରେ ଭତ୍ତା ଟଙ୍କା ଆସିଥିଲେ ବି ପରେ ଆଉ ଆସୁନାହିଁ। ଏହାକୁ ନେଇ ସେ ଏସ୍ଏମ୍ସି ଅଫିସ ଯାଇଥିଲେ। ସେଠାରେ ବ୍ୟାଙ୍କଖାତାରେ ଟଙ୍କା ଦିଆଯାଉଥିବା କହିଥିଲେ। ବ୍ୟାଙ୍କକୁ ଆସି ପଚାରିବା ପରେ ସେମାନେ ମଧ୍ୟ ଟଙ୍କା ଜମାହୋଇ ନ ଥିବା କହିଥିଲେ। ଏଭଳି ଭାବେ ବିଭିନ୍ନ ଅଫିସ ଦୌଡି ୬ରୁ ୭ ଶହ ଟଙ୍କା ଖର୍ଚ୍ଚ ହୋଇସାରିଛି। ୨୦୨୨ବର୍ଷର ୪ମାସ ଓ ୨୦୨୩ ବର୍ଷର ୩ମାସରେ ଭତ୍ତା ଟଙ୍କା ଦିଆଯାଇ ନାହିଁ ା ଏପଟେ ବାର୍ଦ୍ଧକ୍ୟ ଜନିତ ରୋଗ ସାଙ୍ଗକୁ ଗୋଡ ମଧ୍ୟ କାମ କରୁ ନାହିଁ। ତେଣୁ ଭତ୍ତା ଟଙ୍କା ପ୍ରତି ମାସରେ ମୋ ହାତରେ ଦିଆଯାଉ ବୋଲି ସୁରେଖା ଅନୁରୋଧ କରିଛନ୍ତି। ଅନ୍ୟପଟେ ସାହୁ କହିଛନ୍ତି, ଏହା କେବଳ ସୁରେଖାଙ୍କ କ୍ଷେତ୍ରରେ ନୁହେଁ। ଜିଲାର ବିଭିନ୍ନ ପଞ୍ଚାୟତ, ଏସ୍ଏମ୍ସିର ହିତାଧିକାରୀ ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି। କମଚାରୀ ଓ ଅଧିକାରୀ ସୁବିଧାରେ ପହଞ୍ଚାଇବା ବ୍ୟବସ୍ଥା କଲେ ହିତାଧିକାରୀ ଉପକୃତ ହୋଇପାରିବେ ବୋଲି ସେ କହିଥିଲେ।