ବମ୍ବେ: ପ୍ରଥମେ ବିବାହ ଆଉ ଏବେ ମାତାପିତା ହେବାକୁ ଯାଉଥିବା ନେଇ ଘୋଷଣା କରି ଚର୍ଚ୍ଚାରେ ବଲିଉଡର ଅନ୍ୟତମ ଲୋକପ୍ରିୟ ଯୋଡ଼ି ଆଲିଆ ଭଟ୍ଟ-ରଣବୀର କପୁର। ଏହାକୁ ନେଇ ପ୍ରଶଂସକଙ୍କଠାରୁ ଆରମ୍ଭ କରି ସାଥୀ କଳାକାର ବେଶ ଖୁସି ଅଛନ୍ତି। ଉଭୟଙ୍କ ପରିବାରଲୋକେ ମଧ୍ୟ ସୋସିଆଲ ମିଡିଆରେ ଫଟୋ ଶେୟାର କରି ସେମାନଙ୍କୁ ଶୁଭେଚ୍ଛା ଜଣାଉଛନ୍ତି। ଏହି କ୍ରମରେ ନୀତୁ କପୁର ଶେୟାର କରିଥିବା ଫଟୋ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। କାରଣ ଫଟୋରେ ରଣବୀର ଏବଂ ଆଲିଆଙ୍କୁ ବେଶ ରୋମାଣ୍ଟିକ୍ ଭାବେ ଦେଖିବାକୁ ମିଳୁଛି। ରଣବୀରଙ୍କ ହାତରେ ଛୋଟ ଖୋଳ ଥିବାରୁ ତାହା ମୁଦିର ବକ୍ସ ବୋଲି ଅନୁମାନ କରାଯାଉଛି। ଏପରିକି ଫଟୋଟି ଆଲିଆଙ୍କୁ ପ୍ରପୋଜ କରିବା ସମୟର କି ବୋଲି ପ୍ରଶଂସକ ନୀତୁଙ୍କୁ ମଧ୍ୟ ପଚାରୁଛନ୍ତି।
କହିରଖୁଛୁ, ଆଲିଆ ମା’ ହେବାକୁ ଯାଉଥିବା ନେଇ ସୋସିଆଲ ମିଡିଆରେ ଜଣାଇଛନ୍ତି। ଡାକ୍ତରଖାନା ବେଡ୍ରେ ସୋନୋଗ୍ରାଫି ସମୟର ଏକ ଫଟୋକୁ ସେ ଶେୟାର କରି ‘ଆମ ଛୁଆ…ଶୀଘ୍ର ଆସୁଛି’ ବୋଲି ଲେଖିଥିଲେ। ଅଭିନୟ ଜୀବନ ଦେଖିଲେ ଆଗାମୀ ଦିନରେ ଆଲିଆ-ରଣବୀରଙ୍କ ଫିଲ୍ମ ‘ବ୍ରହ୍ମାସ୍ତ୍ର’ ରିଲିଜ ହେବ। ଏହାର ଶୁଟିଂ ସମୟରେ ଦୁହେଁ ଦୁହିଁଙ୍କୁ ଡେଟ୍ କରିବା ଆରମ୍ଭ କରିଥିଲେ। ଏଣୁ ଫିଲ୍ମଟି ଉଭୟଙ୍କ ପାଇଁ ଖାସ୍ ରହିବ।
