କୋଲକାତା,୧।୭: ପଶ୍ଚିମବଙ୍ଗ ବିଧାନସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ସହିତ ଭାଜପା ର ବହୁ ବରିଷ୍ଠ ନେତା ମମତା ବାନାର୍ଜୀଙ୍କ ସହିତ ମୁହାଁମୁହିଁ ହୋଇଥିଲେ। ତେବେ ନିର୍ବାଚନ ପରେ ଏବେ ଦିଦି ଆମ୍ବ କୂଟନୀତି ଆରମ୍ଭ କରିଛନ୍ତି। ନିର୍ବାଚନ ପ୍ରଚାର ସମୟରେ ପରସ୍ପର ଉପରକୁ କାଦୁଆ ଫିଙ୍ଗାର ଦୁଃଖ ଲାଘବ କରି ରାଜ୍ୟ ଏବଂ କେନ୍ଦ୍ର ମଧ୍ୟରେ ସୁସମ୍ପର୍କ ସ୍ଥାପନ ପାଇଁ ଦିଦି ମୋଦି ,ଶାହାଙ୍କ ସମେତ ଭାଜପାର ଅନ୍ୟ ବରିଷ୍ଠ ନେତାଙ୍କ ଲାଗି ପଶ୍ଚିମବଙ୍ଗର ମିଠା ଆମ୍ବ ପଠାଇଛନ୍ତି। ମମତା ହିମସାଗର, ମାଲଦା ଏବଂ ଲକ୍ଷ୍ମଣଭୋଗ ଆମ୍ବ ପଠାଥିବା କୁହାଯାଉଛି। ଏସବୁ ଆମ୍ବ ରାଷ୍ଟ୍ରପତି ରାମନାଥ କୋବିନ୍ଦ, ଉପରାଷ୍ଟ୍ରପତି ଭେଙ୍କିୟା ନାଇଡୁ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ପାଖକୁ ମଧ୍ୟ ପଠାଯାଇଛି। ଏହା ସହିତ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କ ପାଖକୁ ମଧ୍ୟ ମମତା ଆମ୍ବ ପେଟି ପଠାଇଛନ୍ତି। ୨୦୧୧ଠାରୁ ମମତା ଦିଲ୍ଲୀକୁ ଆମ୍ବ ପଠାଇବା ଜାରି ରଖିଛନ୍ତି। ଆମ୍ବ ସହିତ ମମତା ମିଠା ମଧ୍ୟ ଦିଲ୍ଲୀ ପଠାଉଛନ୍ତି।