ଲାହୋର,୨୧।୯: ସୁରକ୍ଷାଜନିତ ସଙ୍କଟ ଦର୍ଶାଇ ପାକିସ୍ତାନ ଗସ୍ତରୁ ନ୍ୟୁଜିଲାଣ୍ଡ ଫେରିଯିବା ପରେ ଅକ୍ଟୋବରରେ ଖେଳାଯିବାକୁ ଥିବା ଅନ୍ତର୍ଜାତୀୟ ସିରିଜ୍କୁ ବାତିଲ କରିଦେଇଛି ଇଂଲଣ୍ଡ। ଏହା ଉପରେ ପ୍ରଥମ ଥର ପାଇଁ ପ୍ରତିକ୍ରିୟା ରଖିଛନ୍ତି ପାକିସ୍ତାନ କ୍ରିକେଟ ବୋର୍ଡ ମୁ୍ଖ୍ୟ ରମିଜ ରାଜା।
”ପାକିସ୍ତାନରେ ସିରିଜ୍ ନ ଖେଳିବାକୁ ଇଂଲଣ୍ଡ ଓ ନ୍ୟୁଜିଲାଣ୍ଡ ନେଇଥିବା ନିଷ୍ପତ୍ତି ଆମ ପାଇଁ ଏକ ବଡ଼ ଶିକ୍ଷା। ଏବେଠାରୁ ଆମେ କେବଳ ଆମ ଫାଇଦା ଦେଖିବୁ। ଇଂଲଣ୍ଡର ନିଷ୍ପତ୍ତିରେ ମୁଁ ଖୁବ୍ ଦୁଃଖିତ। ଦୁର୍ଭାଗ୍ୟର କଥା, ପାଶ୍ଚାତ୍ୟ ଦେଶମାନଙ୍କ ଚିନ୍ତାଧାରା ଏବେ ମଧ୍ୟ ବଦଳି ନାହିଁ। ସେମାନେ ପରସ୍ପରକୁ ସମର୍ଥନ କରୁଛନ୍ତି। ଆମ ସୁରକ୍ଷା ଉପରେ ତୁମେ ତୁମର ଚିନ୍ତାଧାରା କାରଣରୁ ଯେ କୌଣସି ନିଷ୍ପତ୍ତି ନେଇପାରିବ। ପ୍ରଥମେ ନ୍ୟୁଜିଲାଣ୍ଡ ଆମ ସହ ବିନା କୌଣସି ଆଲୋଚନରେ ସୁରକ୍ଷା ଗତ କାରଣ ଦର୍ଶାଇ ପାକିସ୍ତାନରୁ ଚାଲିଗଲା। ଆଉ ଏବେ ଇଂଲଣ୍ଡ ଆମକୁ ଏକ ଶିକ୍ଷା ଦେଇଛି। ସେମାନଙ୍କ ଦେଶକୁ ଆମେ ଯେତେବେଳେ ଯାଇଥିଲୁ, ଆମକୁ ଲମ୍ବା କ୍ୱାରେଣ୍ଟିନରେ ରଖାଯାଇଥିଲା। ଏହାର ପ୍ରତି ବଦଳରେ ଆମେ ସେମାନଙ୍କୁ ସମ୍ପୂର୍ଣ୍ଣ ସ୍ବାଗତ କରିବାକୁ ପ୍ରସ୍ତୁତ ଥିଲୁ। ମାତ୍ର ସେମାନଙ୍କ ନିଷ୍ପତ୍ତି ଆମକୁ ଏକ ଶିକ୍ଷା ଦେଲା ଯେ, ଆମେ କେବଳ ଆମ ଫାଇଦା କଥା ଚିନ୍ତା କରିବୁ“ ବୋଲି ପୂର୍ବତନ ବ୍ୟାଟ୍ସମ୍ୟାନ ନିଜ ଦୁଃଖ ପ୍ରକାଶ କରି କହିଛନ୍ତି।
ସେ ପାକିସ୍ତାନ କ୍ରିକେଟ ଉପରେ କହିଛନ୍ତି, କ୍ରିକେଟ ଜଗତ ଆମକୁ ସାହାଯ୍ୟ ନ କଲେ ଆମ ଦେଶରେ କ୍ରିକେଟ ବନ୍ଦ ହୋଇଯିବ ନାହିଁ। କ୍ରିକେଟକୁ ବଞ୍ଚାଇ ରଖିବାକୁ ଆମେ ଗୁରୁତ୍ୱ ଦେବୁ। ଆଗକୁ ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜ୍ ଅଛି। ନ୍ୟୁଜିଲାଣ୍ଡ ଓ ଇଂଲଣ୍ଡ କାରଣରୁ ଏହି ସିରିଜ୍ ମଧ୍ୟ ପ୍ରଭାବିତ ହେବ। ତା’ ପରେ ଅଷ୍ଟ୍ରେଲିଆ ସିରିଜ୍ ଅଛି। କିନ୍ତୁ ସେମାନେ ପାକିସ୍ତାନ ଗସ୍ତ ଉପରେ ବିଚାର କରୁଛନ୍ତି। ଇଂଲଣ୍ଡ, ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ଗୋଟିଏ ବ୍ଲକରେ ରୁହନ୍ତି। ଆମେ କିଏ ପ୍ରଶ୍ନ ଉଠାଇବୁ। ଆମେ ସେମାନଙ୍କୁ ନିଜର ଭାବିଥିଲୁ, କିନ୍ତୁ ସେମାନେ ଆମକୁ ଗ୍ରହଣ କରି ନାହାନ୍ତି।
