ନୋଏଡା,୨୪।୬: ଉତ୍ତରପ୍ରଦେଶ ନୋଏଡାରେ ଏକ ଅଭାବନୀୟ ଘଟଣା ଘଟିଛି। ଜଣେ ୪ବର୍ଷର ଭଉଣୀ ନିଜ ୮ମାସର ସାନ ଭାଇକୁ ପାଣି ଭାବି ଡିଜେଲ ପିଆଇଦେଇଥିବା ଘଟଣା ସାମ୍ନାକୁ ଆସିଛି। ଫଳରେ ଉକ୍ତ ଶିଶୁ ପୁତ୍ରଙ୍କର ମୃତ୍ୟୁ ଘଟିଛି। ଏହି ଘଟଣା ନୋଏଡା ସେକ୍ଟର-୬୩ ଅଞ୍ଚଳର ଛିଜାରସି ଗ୍ରାମରେ ଘଟିଛି। ସୂଚନାଯୋଗ୍ୟ, ଛିଜାରସି ଗାଁରେ ଲବକୁଶ ନାମକ ଜଣେ ବ୍ୟକ୍ତି ତାଙ୍କ ପରିବାର ସହ ରୁହନ୍ତି। ସୋମବାର ଘରେ ସମସ୍ତେ ଉପସ୍ଥିତ ଥିବା ବେଳେ ୮ମାସର ଶିଶୁ ହଠାତ୍ କାନ୍ଦିବାକୁ ଲାଗିଥିଲେ। ଭାଇକୁ କାନ୍ଦିବା ଦେଖି ୪ବର୍ଷର ଭଉଣୀ ପାଖରେ ଥିବା ବୋତଲକୁ ଆଣି ତାଙ୍କୁ ପିଆଇ ଦେଇଥିଲେ। ସେହି ସମୟରେ ଉକ୍ତ ଶିଶୁ ଜାଣି ନ ଥିଲେ ଯେ, ଏହା ପାଣି ନୁହେଁ ବରଂ ଡିଜେଲ। ତେବେ ପୁଅ ଆହୁରି ଜୋରରେ କାନ୍ଦିବା ଦେଖି ପରିବାର ଲୋକ ତାଙ୍କ ପାଖକୁ ଆସିଥିଲେ। ତେବେ ସେ ପାଣି ବଦଳରେ ଡିଜେଲ ପିଇଥିବା ଜାଣି ସଙ୍ଗେ ସଙ୍ଗେ ତାଙ୍କୁ ହସ୍ପିଟାଲକୁ ନେଇଥିଲେ। ହେଲେ ୩ଦିନ ପରେ ଚିକିତ୍ସାଧିନ ଅବସ୍ଥାରେ ଶୁକ୍ରବାର ତାଙ୍କର ମୃତ୍ୟୁ ଘଟିଛି। ଖବର ପାଇ ପୋଲିସ ଟିମ୍ କୋତଓ୍ବାଲି ସେକ୍ଟର-୬୩ରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଜାରି ରଖିଛି।