ଭୁବନେଶ୍ୱର,୨୦।୭: କରୋନା ମହାମାରୀ ସମୟରେ ତେଲ ଦର ବୃଦ୍ଧି ଲୋକଙ୍କୁ ଅତିଷ୍ଠ କରିଛି। ପେଟ୍ରୋଲ ଦର ଗତ କିଛିଦିନ ଧରି ବୃଦ୍ଧି ହୋଇ ନ ଥିବା ବେଳେ ଡିଜେଲ ଦରରେ ବିରତି ଲାଗୁ ନାହିଁ। ସୋମବାର ଭୁବନେଶ୍ୱରରେ ଡିଜେଲ ଦର ୧୨ ପଇସା ବଢ଼ି ୭୯.୭୩ ଟଙ୍କା ଛୁଇଁଛି। ଏଠାରେ ପେଟ୍ରୋଲ ଲିଟର ଅପରିବର୍ତ୍ତିତ ୮୧.୦୧ ଟଙ୍କା ରହିଥିବା ରାଷ୍ଟ୍ରାୟତ୍ତ ସଂସ୍ଥା ଇଣ୍ଡିଆନ ଅଏଲ ପକ୍ଷରୁ ସୂଚନା ଦିଆଯାଇଛି। ସେହିଭଳି ସୋମବାର ନୂଆଦିଲ୍ଲୀରେ ଡିଜେଲ ଦର ୧୨ ପଇସା ବଢ଼ି ୮୧.୬୪ ଟଙ୍କା ହୋଇଛି। ମୁମ୍ବାଇରେ ଲୋକମାନେ ୧ ଲିଟର ପେଟ୍ରୋଲ ପାଇଁ ୭୯.୮୩ ଟଙ୍କା ଦେଉଛନ୍ତି। ଏହାବାଦ ଚେନ୍ନାଇରେ ଡିଜେଲ ୧୦ ପଇସା ବଢ଼ି ୭୮.୬୦ ଟଙ୍କା ଏବଂ କୋଲକାତାରେ ୧୦ ପଇସା ବଢ଼ି ୭୬.୭୭ ଟଙ୍କା ରହିଥିବା ସୂଚନା ରହିଛି। ଗତ ୨୨ ଦିନ ହେବ ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀଗୁଡ଼ିକ ପେଟ୍ରୋଲ ଦରରେ କୌଣସି ପରିବର୍ତ୍ତନ କରିନାହାନ୍ତି। ସେହିପରି ଗତ ୫ ସପ୍ତାହ ମଧ୍ୟରେ ଡିଜେଲ ଦର ୨୮ ଥର ବଢ଼ିଥିବା ଜଣାପଡ଼ିଛି। ଏହି ସମୟ ମଧ୍ୟରେ ପେଟ୍ରୋଲ ଦର ୨୧ ଥର ବୃଦ୍ଧି ଘଟିଛି। ଲକ୍ଡାଉନ ସମୟରେ ପ୍ରାୟ ୮୧ ଦିନ ଧରି ଦରରେ କୌଣସି ପରିବର୍ତ୍ତନ ହୋଇ ନ ଥିବା ବେଳେ ଜୁନ୍ ୭ ପରଠାରୁ କମ୍ପାନୀଗୁଡ଼ିକ ଦରରେ ଦୈନିକ ପରିବର୍ତ୍ତନ ନିୟମ କାର୍ଯ୍ୟକାରୀ କରିଛନ୍ତି। ଜୁନ ୨୯ ପରଠାରୁ ପେଟ୍ରୋଲ ଦରରେ କୌଣସି ପରିବର୍ତ୍ତନ ହୋଇ ନାହିଁ। ଜୁନ୍ ୭ ପରଠାରୁ ଆଜି ପର୍ଯ୍ୟନ୍ତ ପେଟ୍ରୋଲ ଲିଟର ପିଛା ୯.୧୭ ଟଙ୍କା ଏବଂ ଡିଜେଲ ଲିଟର ପିଛା ୧୨.୩୩ ଟଙ୍କା ବୃଦ୍ଧି ଘଟିଥିବା ଜଣାପଡ଼ିଛି।
