ଭୁବନେଶ୍ୱର,୨୬।୭: ଚଳିତ ମାସ ଡିଜେଲ ଦର ଲଗାତର ଭାବେ ବୃଦ୍ଧି ପାଇଚାଲିଛି। ଶନିବାର ତୈଳ ବିପଣନ କମ୍ପାନୀଗୁଡ଼ିକ ଦର ପରିବର୍ତ୍ତନ କରିବା ଫଳରେ ଡିଜେଲ ଲିଟର ପିଛା ୧୫ ପଇସା ବୃଦ୍ଧି ଘଟିଛି। ଭୁବନେଶ୍ୱରରେ ଡିଜେଲ ଦର ୭୯.୭୩ ଟଙ୍କାରୁ ବୃଦ୍ଧି ପାଇ ୭୯.୮୮ ଟଙ୍କା ଛୁଇଁଛି। ଏହି ସମୟରେ ଘରୋଇ ବଜାରରେ ପେଟ୍ରୋଲ ଦର ଅପରିବର୍ତ୍ତିତ ରହିଛି। ଏଠାରେ ଗୋଟିଏ ଲିଟର ପେଟ୍ରୋଲ ଦର ୮୧.୦୧ ଟଙ୍କା ରହିଥିବା ରାଷ୍ଟ୍ରାୟତ୍ତ କମ୍ପାନୀ ଇଣ୍ଡିଆନ ଅଏଲ ପକ୍ଷରୁ ସୂଚନା ରହିଛି। ଚଳିତ ମାସରେ ତୈଳ ବିପଣନ କମ୍ପାନୀଗୁଡ଼ିକ ୯ଥର ଡିଜେଲ ଦର ବୃଦ୍ଧି କରିଥିବା ଜଣାପଡ଼ିଛି। ଏହା ପୂର୍ବରୁ ସୋମବାର ଡିଜେଲ ୨୦ ପଇସା ବଢ଼ିଥିଲା। ଏହି ସମୟରେ ନୂଆଦିଲ୍ଲୀରେ ଡିଜେଲ ଦର ରେକର୍ଡ ସ୍ତର ଛୁଇଁଛି। ଏଠାରେ ଗୋଟିଏ ମାସରେ ଡିଜେଲ ୧.୪୫ ଟଙ୍କା ବଢ଼ିବା ଯୋଗୁ ଦର ୮୧.୭୯ ଟଙ୍କା ରହିଛି। ସେହିଭଳି ଦେଶର ଅନ୍ୟ ମେଟ୍ରୋ ସହରଗୁଡ଼ିକରେ ଡିଜେଲ ଦର ୧୩ରୁ ୧୫ ପଇସା ଲେଖାଏ ବଢ଼ିଛି। ଚେନ୍ନାଇରେ ୧୩ ପଇସା ବଢ଼ି ୭୮.୭୩ ଟଙ୍କା ଲିଟର ପ୍ରତି ଦର ରହିଛି। ସେହିଭଳି କୋଲକାତା ଏବଂ ମୁମ୍ବାଇରେ ଡିଜେଲ ଦର ୧୪ ପଇସା ବଢ଼ି ଯଥାକ୍ରମେ ୭୬.୯୧ ଓ ୭୯.୯୭ ଟଙ୍କା ହୋଇଛି। ବର୍ତ୍ତମାନ ବଜାରରେ ଚାହିଦା କମ୍ ରହିଥିବା ବେଳେ ଏଭଳି ଦର ବୃଦ୍ଧି ପରିବହନ କ୍ଷେତ୍ର ଲାଗି ଚାପ ସୃଷ୍ଟି କରୁଛି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ୧.୭% ଖସିବା ଯୋଗୁ ବ୍ୟାରେଲ ପିଛା ମୂଲ୍ୟ ୩୦୬୩ ଟଙ୍କା ରହିଛି।
