ଖୋର୍ଦ୍ଧା ଅଫିସ,୩୧।୭: ଶିକ୍ଷାର ବିକାଶ ଏବଂ ଭିତ୍ତିଭୂମି ଲାଗି ରାଜ୍ୟ ସରକାର ଲକ୍ଷାଧିକ ଟଙ୍କା ଖର୍ଚ୍ଚ କରୁଛନ୍ତି। ୫-ଟି ଯୋଜନା ଅନ୍ତର୍ଗତ ସ୍କୁଲ ରୂପାନ୍ତରଣରେ ସ୍ମାର୍ଟ ସ୍କୁଲ ନିର୍ମାଣ ଚାଲିଛି। ତେବେ ଦୀପ ତଳ ଅନ୍ଧାର ଭଳି ଖୋର୍ଦ୍ଧା ଜିଲା ଶିକ୍ଷକ ପ୍ରଶିକ୍ଷଣ ପ୍ରତିଷ୍ଠାନ(ଡିଆଇଇଟି)ରେ ଅବ୍ୟବସ୍ଥା ଘେରରେ ପାଠପଢ଼ା ଚାଲିଥିବା ଦେଖିବାକୁ ମିଳିଛି। ଏକ ଅସ୍ବାସ୍ଥ୍ୟକର ପରିବେଶରେ ପିଲାମାନେ ପାଠ ପଢୁଥିବା ଜଣାପଡ଼ିଛି। ଚାରିଆଡ଼େ ଅନାବନା ଗଛଲତା ମାଡ଼ିଯାଇଛି। ଯେପରି କୃତ୍ରିମ ଜଙ୍ଗଲର ଭ୍ରମ ସୃଷ୍ଟି କରୁଛି। ମଶାଙ୍କ ଦୌରାତ୍ମ୍ୟ ସହ ସରୀସୃପଙ୍କ ଭୟ ମଧ୍ୟ ରହୁଛି। ଛାତ୍ରୀ ମାନଙ୍କ ପାଇଁ ଛାତ୍ରୀନିବାସ ନାହିଁ। ଫଳରେ ଦୂରରୁ ଆସୁଥିବା ଛାତ୍ରୀମାନେ ଭଡ଼ା ଘରେ ରହୁଛନ୍ତି। ଛାତ୍ରୀନିବାସ ନିର୍ମାଣ କରାଗଲେ ଅଧିକ ଖର୍ଚ୍ଚାନ୍ତରୁ ମୁକ୍ତି ମିଳିବ ବୋଲି ଏକାଧିକ ଛାତ୍ରୀ ଗଣମାଧ୍ୟମ ଆଗରେ କହିଛନ୍ତି। ୧୯୮୯ ମସିହାରେ ଖୋର୍ଦ୍ଧା ସହରରେ ଏହି ଶିକ୍ଷାନୁଷ୍ଠାନ ଗଢ଼ିଉଠିଥିଲା। ଶିକ୍ଷାର ବିକାଶ ଲାଗି ଏଠାରେ କାର୍ଯ୍ୟରତ ଶିକ୍ଷୟିତ୍ରୀ ଶିକ୍ଷକଙ୍କୁ ବିଭିନ୍ନ ପ୍ରସଙ୍ଗରେ ଟ୍ରେନିଂ ଦିଆଯିବା ସହ ସିଟି ଛାତ୍ରୀଛାତ୍ରମାନେ ପ୍ରଶିକ୍ଷଣ ନେଉଛନ୍ତି। ଏଠାରେ ୬୬ ଜଣ ଛାତ୍ରୀ ଏବଂ ୨୭ ଛାତ୍ର ରହିଛନ୍ତି। ଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ଶିକ୍ଷାନୁଷ୍ଠାନ ପରିସରରେ ଛାତ୍ରୀନିବାସ, କ୍ୟାମ୍ପସ୍ ପରିସରରେ ଏକ ଉତ୍ତମ ବାତାବରଣ ଓ ସୌନ୍ଦର୍ଯ୍ୟକରଣ ଲାଗି ବୁଦ୍ଧିଜୀବୀଙ୍କ ମହଲରେ ଦାବି ହୋଇଛି। ଏ ନେଇ କଲେଜ ଅଧ୍ୟକ୍ଷ ତାପସ କୁମାର ନାୟକ କୁହନ୍ତି, ଛାତ୍ରୀନିବାସ ଲାଗି ଉପରିସ୍ଥ ଅଧିକାରୀଙ୍କ ସହ ଆଲୋଚନା କରାଯାଇଛି। କ୍ୟାମ୍ପସ୍ର ସୌନ୍ଦର୍ଯ୍ୟକରଣ ଲାଗି ଗୁରୁତ୍ୱ ଦିଆଯାଉଛି। ଆଗାମୀ ଦିନରେ ଏକ ସୁନ୍ଦର ବାତାବରଣ ମଧ୍ୟରେ କ୍ୟାମ୍ପସ୍ରେ ପିଲାଙ୍କ ପାଠପଢ଼ା ଲାଗି ପଦକ୍ଷେପ ନିଆଯିବ।
