ରଗଡ଼ି, ୨୧ା୪(ଡି.ଏନ.ଏ.): କୋରେଇ ବ୍ଲକ ରଣପୁର ପଞ୍ଚାୟତ ରଣପୁର ଗ୍ରାମର ଗହନିଆ ନାଳ ଉପରେ ବିଜୁ ସେତୁ ନିର୍ମାଣ ନାମରେ ଲକ୍ଷାଧିକ ଟଙ୍କା ଚଳୁ ହୋଇଥିବା ଅଭିଯୋଗ ହୋଇଛି। ଠିକାଦାର ଏକ ସୁଇମିଂ ପୁଲ ଭଳି ଗର୍ତ୍ତ ଖୋଳି ଅଧାପନ୍ତରିଆ କାମ ସାରି ଫେରାର ହୋଇ ଯାଇଥିବା ସୂଚନା ମିଳିଛି।
ଏହି ଗ୍ରାମର ପୂର୍ତ୍ତ ବିଭାଗ ରାସ୍ତା ନିକଟରୁ ଗହାନିଆ ନାଳ ୧ କି.ମି.ମଧ୍ୟରେ ବିଜୁ ସେତୁ ପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୧ କୋଟି ୯୨ ଲକ୍ଷ ୮୮ ହଜାର ଟଙ୍କା ବ୍ୟୟ ବରାଦ ହୋଇଥିଲା। ଏହି କାର୍ଯ୍ୟର ଚୁକ୍ତିନାମା ନଂ. ୩୪-୧-୨୦୧୯-୨୦୨୦ ରହିଥିବାବେଳେ ୧୩ା୮ା୨୦୧୯ରୁ କାର୍ଯ୍ୟ ଆରମ୍ଭ ହୋଇ ୧୨ା୬ା୨୦୨୦ରେ ଶେଷ ହେବାକୁ ବିଭାଗ ପକ୍ଷରୁ ଅନୁମତି ହୋଇଥିଲା। ରଣପୁର, ଗୋପାଳପୁର, ମହୁଲିଆ, ତରନ୍ଦା, ତୁଳସୀପୁର, ଗୋରପୁର, ଇଚ୍ଛାପୁର, ରଘୁପୁର, ଅସନଝର ଆଦି ଗ୍ରାମର ୮ ହଜାରରୁ ଊର୍ଦ୍ଧ୍ୱ ଲୋକ ଏହି ସେତୁ ଉପରେ ନିର୍ଭର କରି ରହିଥିବା ବେଳେ ବିଭାଗୀୟ ଅଧିକାରୀ ଓ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁ କାମ ଅଧାପନ୍ତରିଆ ହୋଇ ପଡ଼ି ରହିଛି। ଫଳରେ ଉକ୍ତ ସେତୁ ଉପରେ ନିର୍ଭର କରୁଥିବା ଲୋକଙ୍କ ଜୀବନ ଜୀବିକା ଉପରେ ପ୍ରଭାବ ପଡୁଛି। ବର୍ଷା ଦିନେ ଏହି ନାଳ ବାଟେ ଯିବା ଅସମ୍ଭବ ହୋଇ ପଡୁଛି। ବିଜୁ ସେତୁ ପାଇଁ ଅଧାପନ୍ତରିଆ ହୋଇ ପଡିଥିବା ଗର୍ତ୍ତରେ ଗାଇ ଗୋରୁ ଆଦି ଗୃହ ପାଳିତ ପଶୁ ପଡି ମୃତ୍ୟୁବରଣ କରୁଥିବା ଗ୍ରାମବାସୀ କହିଛନ୍ତି। କାମ ନ କରି ଠିକାଦାର ଅଧାରୁ ଅଧିକ ଅର୍ଥ ହରିଲୁଟ କରିଥିବା ସହ ଏଥିରୁ କିଛି ଅନୁଦାନ ବିଭାଗୀୟ ଅଧିକାରୀଙ୍କ ପକେଟ୍କୁ ଚାଲି ଯାଇଥିବା ଚର୍ଚ୍ଚା ହେଉଛି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଉକ୍ତ ବିଜୁ ସେତୁ କାର୍ଯ୍ୟକୁ ସମ୍ପୂର୍ଣ୍ଣ କରିବାକୁ ଲୋକମାନେ ଦାବି କରିଛନ୍ତି।