ସମ୍ବଲପୁର,୧୩ା୧୧(ବ୍ୟୁରୋ): ମମିତା ମେହେର ହତ୍ୟା ଘଟଣାରେ ପୋଲିସ କାର୍ଯ୍ୟ ସମ୍ପାଦନାରେ ଅବହେଳା କରିନାହିଁ। ଅଭିଯୋଗ ପରେ ମାମଲା ରୁଜୁ ହୋଇଥିଲା। ଅଭିଯୁକ୍ତଙ୍କ କ୍ରାଇମ୍ ସିନ କରିବା, କୋର୍ଟଙ୍କୁ ସୂଚନା ଦେବା, ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିବା ସବୁ ସମୟ ଅନୁସାରେ କରାଯାଇଛି। ବିଭିନ୍ନ ଦିଗକୁ ନେଇ ତଦନ୍ତ କରିବା ସହ ସାଇଣ୍ଟିଫିକ ଟିମ୍, ଫରେନ୍ସିକ୍ ଟିମ୍ ଯାଞ୍ଚ କରିଛି। ଘଟଣାରେ ୧୦ଜଣଙ୍କ ୧୬୪ରେ ଏବଂ ୧୧୦ରୁ ଊର୍ଦ୍ଧ୍ୱ ବ୍ୟକ୍ତିଙ୍କ ୧୬୧ ଧାରାରେ ବୟାନ ରେକର୍ଡ ହୋଇଛି। ଘଟଣାସ୍ଥଳରୁ ପ୍ରାମାଣ ସଂଗ୍ରହ ସହ ୨ ଅଭିଯୁକ୍ତଙ୍କୁ ଗିରଫ କରାଯାଇଛି। ଏପର୍ଯ୍ୟନ୍ତ ଅନ୍ୟ କାହାର ସମ୍ପୃକ୍ତି ଥିବା ନେଇ ପୋଲିସ ପାଖରେ ପ୍ରମାଣ ନାହିଁ। ହେଲେ କୋର୍ଟରେ ଅଭିଯୁକ୍ତମାନଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ପୋଲିସ ପାଖରେ ଯଥେଷ୍ଟ ପ୍ରମାଣ ରହିଛି ବୋଲି ଶନିବାର ସମ୍ବଲପୁରଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଉତ୍ତରାଞ୍ଚଳ ପୋଲିସ ଡିଆଇଜି ଡ. ଦୀପକ କୁମାର କହିଛନ୍ତି।
ସେ ଆହୁରି କହିଥିଲେ, ଘଟଣାକୁ ନେଇ ବିଭିନ୍ନ ଗଣମାଧ୍ୟମ ଓ କେତେଜଣ ବ୍ୟକ୍ତି ପୋଲିସ କାର୍ଯ୍ୟରେ ଅବହେଳା କରୁଥିବା କହୁଛନ୍ତି। ହେଲେ ଘଟଣା ଦିନ ଅର୍ଥାତ୍ ଅକ୍ଟୋବର ୧୩ ତାରିଖ ମଧ୍ୟାହ୍ନ ୧୨.୫୦ ମିନିଟରେ ଅଭିଯୋଗ ହୋଇଥିଲା। ମାମଲା ରୁଜୁ କରି ଅଭିଯୋଗକାରୀଙ୍କୁ ଏକ କପି ମଧ୍ୟ ଦିଆଯାଇଥିଲା। ଏହା ସହ ପୋଲିସ ବିଭାଗର ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇ ଦିଆଯାଇଥିଲା। ସୁପ୍ରିମକୋର୍ଟଙ୍କ ନିୟମ ଅନୁସାରେ ସବୁ କାର୍ଯ୍ୟ କରାଯାଇଥିଲା। ୧୩ରୁ ୧୫ ତାରିଖ ଦଶହରା ଛୁଟି ଥିବାରୁ କୋର୍ଟରେ ୧୬ ତାରିଖରେ ସିଡି ଦାଖଲ ହୋଇଥିଲା। ଅଭିଯୁକ୍ତମାନଙ୍କୁ ରିମାଣ୍ଡରେ ଆଣି ଆକ୍ଟୋବର ୨୦ରୁ ୨୫ ତାରିଖ ଭିତରେ କ୍ରାଇମ୍ ସିନ୍ ରି-କ୍ରିଏଶନ କରାଯାଇଥିଲା, ଯାହା କୋର୍ଟରେ ଦାଖଲ ହୋଇଛି। ପୋଲିସ ଘଟଣାକୁ ଗୁରୁତ୍ୱର ସହ ନେଇଛି। ଆଇନ ଅନୁସାରେ କିଭଳି ଶୀଘ୍ର ଦୋଷୀଙ୍କୁ ଦଣ୍ଡ ମିଳିବ ସେ ନେଇ ସବୁପ୍ରକାର ଉଦ୍ୟମ କରିଛି ବୋଲି କହିଥିଲେ। ପରେ ଗଣମାଧ୍ୟମ ପ୍ରଶ୍ନ ଉପରେ ସେ କହିଥିଲେ, ଅନେକ ଚର୍ଚ୍ଚା ହେଉଛି। ହେଲେ ମମିତା ରାୟପୁର ଯିବା ନେଇ ପୋଲିସକୁ କୌଣସି ପ୍ରମାଣ ମିଳିନାହିଁ। ଅଭିଯୁକ୍ତ ପୋଲିସ ହେପାଜତରୁ ଫେରାର ଘଟଣାରେ କାର୍ଯ୍ୟାନୁଷ୍ଠାନ ବାବଦରେ ସେ ଉତ୍ତର ଦେଇ ନ ଥିଲେ। ଖବରଦାତା ସମ୍ମିଳନୀରେ ଏସ୍ପି ବାତୁଲା ଗଙ୍ଗାଧର ଉପସ୍ଥିତ ଥିଲେ।
