କୁନ୍ଦୁରା,୨୪।୩(ଡି.ଏନ.ଏ.): କୋରାପୁଟ ଜିଲା କୁନ୍ଦୁରା ବ୍ଲକ ଦିଗାପୁର ପଞ୍ଚାୟତର ଖିଲପୁଟତୋଟାଠାରେ ଦୀର୍ଘ ୫୦୦ ବର୍ଷ ପୁରୁଣା ମା’ ବୁଢ଼ୀ ଠାକୁରାଣୀଙ୍କ ଦୈବୀ ପୀଠ ରହଛି। ଏବେ ମା’ଙ୍କ ଘଟଯାତ୍ରା ସମୟ। ଚୈତ୍ରମାସର ଦ୍ୱିତୀୟ ମଙ୍ଗଳବାରରେ ଏହି ପୀଠରେ ଘଟଯାତ୍ରା ହୋଇଥାଏ l ୨୦୧୭ରେ ଘଟଯାତ୍ରା ବେଳେ ମା’ଙ୍କ ଲାଠି ଭାଙ୍ଗି ଯାଇଥିଲା। ଚଳିତ ଘଟଯାତ୍ରାକୁ ଦୃଷ୍ଟିରେ ରଖି ମା’ଙ୍କ ପୂଜକ ଜାଇ ଶିରା, ଗୁରୁମାଇଁ, ହୁଣ୍ଡି ପୂଜାରୀ ଓ ଖିଲପୁଟ, ଦିଗାପୁର, ନୂଆଁଗୁଡା, କଦମଗୁଡା, ପ୍ରଧାନୀପୁଟର ଶତାଧିକ ଶ୍ରଦ୍ଧାଳୁ ମା’ବୈଜାରିଣୀଙ୍କ ଲାଠି ଆଣିବାକୁ ବୈପାରୀଗୁଡା ବ୍ଲକ କାଠପଡା ପଞ୍ଚାୟତର କେନ୍ଦୁପୁଟ ଗ୍ରାମ ନିକଟସ୍ଥ ପାହାଡ଼କୁ ଯାଇଥିଲେ। ପରମ୍ପରା ଅନୁସାରେ ପୂଜକଙ୍କୁ ମା’ ସ୍ବପ୍ନାଦେଶ ଦେବା ପରେ ଲାଠି ଆଣିବାକୁ ଗ୍ରାମବାସୀ ବାହାରିଥିଲେ। ମୁଖ୍ୟ ପୂଜକ ଓ ଗ୍ରାମ ମୁଖିଆଙ୍କ ସହଯୋଗରେ ପାର୍ବତରେ ଏକାଧିକ ସ୍ଥାନରେ ଭିନ୍ନ ଭିନ୍ନ ପ୍ରକାରର ଭୋଗ ଦେବା ପରେ ସିରା ଗୁରୁମାଇଁଙ୍କ ଦ୍ୱାରା ପୂଜା କରାଯାଇ ଲାଠି ପାଇଁ ଗଛ କଟାଯାଇଥିଲା। ସେହି ଲାଠିକୁ ପୂଜାର୍ଚ୍ଚନା କରି କେନ୍ଦୁପୁଟ ଗ୍ରାମହୁଣ୍ଡି ମନ୍ଦିରକୁ ଅଣାଯାଇଥିଲା। ସେଠାରେ ସମସ୍ତେ ଏକତ୍ରିତ ହୋଇ ଲାଠିକୁ ବିଦାୟ ଜଣାଇଥିଲେ। ନିୟମ ଅନୁସାରେ ଲାଠିକୁ କଟାଯାଇଥିବା ସତ୍ୱେ କେନ୍ଦୁପୁଟ ଗ୍ରାମରୁ ବାହାରିବା ପରେ ରାସ୍ତାରେ ଯେତେ ଗ୍ରାମପଡେ ସେହି ଗ୍ରାମଗୁଡିକରେ ପୂଜାର୍ଚ୍ଚନା ହୋଇ ଲାଠିକୁ ମପାଯାଇ ବଢିଥିବା ଅଂଶ କଟାଯାଇଥିଲା l ଦିଗାପୁର ଆରମ୍ଭରେ ପ୍ରବାହିତ କଲାବନଦୀଠାରେ ଲାଠି ପୁଣି ମାପି ବଢିଥିବା ଅଂଶ କଟାଯିବା ପରେ ଲାଠି ଧୋଇ ନୂତନ ବାନା, ପିତଳ ଗୁବା ଚଢାଇବା ସହ ପୂଜାର୍ଚ୍ଚନା କରି ଦିଗାପୁର ମା’ବୁଢ଼ୀ ଠାକୁରାଣୀଙ୍କ ନିକଟକୁ ଅଣାଯାଇଥିଲା l ପରେ ଭାଙ୍ଗିଯାଇଥିବା ଲାଠିକୁ ନଦୀରେ ବିସର୍ଜନ କରାଯାଇଥିଲା l ବିଶ୍ୱାସ ରହିଛି ଯଦିଓ କୌଣସି କାରଣ ବଶତଃ ମା ଙ୍କର ଯାତ୍ରା ବନ୍ଦ ହୁଏ ତେବେ ଅଞ୍ଚଳରେ ଅନେକ ଅସୁବିଧା ଦେଖାଦିଏ।