ଭୁବନେଶ୍ୱର,୨୩ା୧୨(ବ୍ୟୁରୋ): ସ୍ବଚ୍ଛତା, ସମୟାନୁବର୍ତ୍ତିତା, ଅନ୍ଲାଇନ ସେବା ତଥା ‘ଇ-ଅବକାରୀ’ ନୀତି ପାଇଁ ରାଜ୍ୟ ଅବକାରୀ ବିଭାଗକୁ ସମ୍ମାନଜନକ ‘ଡିଜିଟାଲ ଇଣ୍ଡିଆ ସ୍ବର୍ଣ୍ଣ ପୁରସ୍କାର’ ନିମନ୍ତେ ଚୟନ କରାଯାଇଛି। ୨୦୨୩ ଜାନୁୟାରୀ ୭ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି ପୁରସ୍କାର ପ୍ରଦାନ କରିବେ ବୋଲି ଜଣାପଡ଼ିଛି। ଓଡ଼ିଶା ସରକାରଙ୍କ ‘୫-ଟି’ ସୂତ୍ର ଅନୁଯାୟୀ ୨୦୧୯-୨୦ରୁ ରାଷ୍ଟ୍ରୀୟ ସୂଚନା ଓ ବିଜ୍ଞାନ କେନ୍ଦ୍ରର ସହାୟତାରେ ଅବକାରୀ ବିଭାଗ ଅନ୍ଲାଇନ୍ ମାଧ୍ୟମରେ ୩୦ରୁ ଅଧିକ କାର୍ଯ୍ୟକ୍ରମ ଓ ସେବା ଯୋଗାଇ ଆସୁଛି। ଅବକାରୀ ଅପରାଧର ଠିକ୍ ପର୍ଯ୍ୟବେକ୍ଷଣ, ଚଢ଼ାଉକୁ ଜୋର୍ଦାର କରିବା, ନକଲି ମଦ କାରବାର ରୋକିବା, ସମୟାନୁବର୍ତ୍ତୀ ସେବା ପ୍ରଦାନ, ମଦ ଉତ୍ପାଦନ, ପରିବହନ, ନିୟନ୍ତ୍ରଣ, ଯୋଗାଣ ଓ ପରିଚାଳନା ସମେତ ସାମୂହିକ ସେବାରେ ସହାୟତା ପ୍ରଦାନ କରି ଆସୁଛି। ଇ-ଅବକାରୀ ଦ୍ୱାରା ଅନ୍ଲାଇନ ଲଟେରି ମାଧ୍ୟମରେ ଅବକାରୀ ଦୋକାନ ବନ୍ଦୋବସ୍ତ, ଠିକ୍ ସମୟରେ ଲାଇସେନ୍ସ ପ୍ରଦାନ, ନବୀକରଣ, ୧୦୦% ସରକାରୀ ପ୍ରାପ୍ୟର ଅନ୍ଲାଇନ ପୈଠ, ବ୍ରାଣ୍ଡ/ଲେବୁଲ ପଞ୍ଜୀକରଣ, ଅବକାରୀ ଦୋକାନଗୁଡ଼ିକର ସ୍ଥାନାନ୍ତର ଓ ମାଲିକାନା ସ୍ବତ୍ୱ ପରିବର୍ତ୍ତନ, ପର୍ମିଟ୍ ଓ ପାସ୍ ପ୍ରଦାନ, ମୋବାଇଲ ଆପ୍ ମାଧ୍ୟମରେ ଚଢ଼ାଉ ସ୍ଥାନ ଚିହ୍ନଟ କରାଯାଉଛି। ଫଳରେ ପୂର୍ବ ବର୍ଷ ତୁଳନାରେ ଦୁଇଗୁଣା ଅଭିଯୁକ୍ତ ଗିରଫ ହୋଇଛନ୍ତି। ବିଭାଗ ଅଧିକ ସ୍ବଚ୍ଛ, କ୍ରିୟାଶୀଳ, ଉତ୍ତରଦାୟୀ ହୋଇପାରିଛି।