ଭୁବନେଶ୍ୱର, ୨୦।୧୦(ବ୍ୟୁରୋ): ରାଜ୍ୟର ଦିବଂଗତ ଓଡ଼ିଶୀ ନୃତ୍ୟଗୁରୁଙ୍କ ନୃତ୍ୟ ଓ ସଙ୍ଗୀତକୁ ଉଜ୍ଜୀବିତ କରିବାକୁ ରାଜ୍ୟ ସଂସ୍କୃତି ବିଭାଗ ଓ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା ପ୍ରତିଷ୍ଠାନ ଆଗେଇ ଆସିଛି। ଗବେଷଣା ପ୍ରତିଷ୍ଠାନ ଅଭିଲେଖାଗାରର ସମ୍ପୂର୍ଣ୍ଣ ଡିଜିଟାଇଜେଶନ କାମ ଚାଲିଛି। ଏହାଦ୍ୱାରା ଗୋଟିଏ ସ୍ଥାନରେ ଶାସ୍ତ୍ରୀୟ ନୃତ୍ୟ ଓଡ଼ିଶୀର ସମସ୍ତ କଳା, କୌଶଳ ପୁରାତନ ଗୁରୁଙ୍କ କାଳଜୟୀ କଳାର ସମାହାର ମିଳିପାରିବ। ଯାହାଫଳରେ ଏବେକାର ଶିଳ୍ପୀ ଓ ଆଗାମୀ ପିଢ଼ି ଓଡ଼ିଶୀ ସମ୍ପର୍କରେ ବହୁ ତଥ୍ୟ ପାଇପାରିବେ। ଡିଜିଟାଇଜ୍ଡ ହେବା ପରେ ଶିଳ୍ପୀମାନେ ଅନ୍ଲାଇନ୍ ମାଧ୍ୟମରେ ଖାଣ୍ଟି ଓଡ଼ିଶୀ ନୃତ୍ୟର ସବୁ ଗ୍ରାମାର ପାଇପାରିବେ। ଅନ୍ଲାଇନ୍ରୁ ଓଡ଼ିଶୀ ଶିକ୍ଷା ସହିତ ଗବେଷଣା ପାଇଁ ଶାସ୍ତ୍ରୀୟ ନୃତ୍ୟର ଏବିସିଡି ମିଳିପାରିବ। କେବଳ ସେତିକି ନୁହେଁ, ଓଡ଼ିଶୀକୁ ଉତ୍ତୁଙ୍ଗ ଶିଖରରେ ପହଞ୍ଚାଇଥିବା ଗୁରୁ କେଳୁଚରଣ ମହାପାତ୍ର, ଦେବପ୍ରସାଦ ଦାସ, ପଙ୍କଜ ଚରଣ ଦାସ, ସଞ୍ଜୁକ୍ତା ପାଣିଗ୍ରାହୀଙ୍କ ଭଳି ପ୍ରତିଷ୍ଠିତ ଗୁରୁମାନଙ୍କ ପ୍ରତିଟି କଳା କୌଶଳକୁ ଗୋଟିଏ ସ୍ଥାନରେ ପାଇପାରିବେ। ୧୯୯୦ରୁ ଏପର୍ଯ୍ୟନ୍ତ ସମସ୍ତ ପ୍ରମୁଖ ଗୁରୁଙ୍କ ନୃତ୍ୟ ଶୈଳୀର ଭିଡିଓ ଏଠାରେ ସଂରକ୍ଷିତ ହୋଇ ରହିଛି। ବହୁ ପୂର୍ବରୁ କାମ ଆରମ୍ଭ ହେବାର ଥିଲେ ବି କରୋନା ପାଇଁ ଏହା ବନ୍ଦ ଥିଲା। ଗତ ଜୁଲାଇ ମାସରେ ଡିଜିଟାଇଜେଶନ କାମ ଆରମ୍ଭ ହୋଇଛି। ଏହା ଭିତରେ ପ୍ରତିଷ୍ଠାନର ନିଜସ୍ବ ୪୮ଲକ୍ଷ ଟଙ୍କା ବ୍ୟୟରେ ଓଡ଼ିଶା କ୍ଷୁଦ୍ର ଶିଳ୍ପ ନିଗମ ମାଧ୍ୟମରେ ଅଭିଲେଖାଗାର ଅଧା କାମ ସରିଯାଇଛି।
ଏ ସମ୍ପର୍କରେ ଗବେଷଣା ପ୍ରତିଷ୍ଠାନର ମୁଖ୍ୟ କାର୍ଯ୍ୟନିର୍ବାହୀ ସଙ୍ଗୀତା ଗୋସାଇଁ କହିଛନ୍ତି, ଅଭିଲେଖାଗାରକୁ ଡିଜିଟାଇଜ୍ କରିବା ମୋର ସ୍ବପ୍ନ ଥିଲା। କାଳଜୟୀ ରଚନାଗୁଡ଼ିକ ଯେପରି ଚୋରି ହୋଇପାରିବ ନାହିଁ ସେଥିପାଇଁ ଆମେ ଯଥେଷ୍ଟ ଯତ୍ନବାନ ଅଛୁ। ଅଧା କାମ ସରିଲାଣି। ବାକି କାମ ପାଇଁ ୮୦ଲକ୍ଷ ଟଙ୍କା ହୋଇପାରିଲେ ସମସ୍ତ କାମ ହୋଇପାରିବ। ଆଶା ଅଛି ଯେ ଯଥାଶୀଘ୍ର ସଂସ୍କୃତି ବିଭାଗ ଏହି ଟଙ୍କା ପ୍ରଦାନ କରିବ। ଡିଜିଟାଇଜ୍ ହେବା ପରେ ଦିବଂଗତ ଗୁରୁମାନଙ୍କ ନୃତ୍ୟ ଶୈଳୀ ଦେଖି ପାରିବା ସହ ଓଡ଼ିଶୀ ନୃତ୍ୟର ଅଭିବୃଦ୍ଧି ସମ୍ପର୍କରେ ମଧ୍ୟ ଜାଣି ପାରିବେ।