ଭୋପାଳ,୨୬।୪: ନିର୍ବାଚନ ବର୍ଷରେ କ୍ଷମତା ହାତେଇବାକୁ ଉଭୟ ରାଜନୈତିକ ଦଳ ଭାରତୀୟ ଜନତା ପାର୍ଟି(ଭାଜପା) ଓ କଂଗ୍ରେସ ପକ୍ଷରୁ ବଡ ବଡ ଘୋଷଣା କରାଯାଉଛି। ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂ ଏବେ ଏକ ବଡ ଘୋଷଣା କରିଛନ୍ତି। ସେ କହିଛନ୍ତି, ଯଦି କଂଗ୍ରେସ କ୍ଷମତାକୁ ଆସେ ତେବେ ୧୦ ବର୍ଷ କାଳ ମଧ୍ୟରେ ଦିଆଯାଇଥିବା ଅଧିକାର ପୁଣିଥରେ ପଞ୍ଚାୟତର ଲୋକ ପ୍ରତିନିଧି ତଥା ସ୍ଥାନୀୟ ସଂସ୍ଥାର ପ୍ରତିନିଧିଙ୍କ ନିକଟକୁ ଫେରାଇ ଦିଆଯିବ। ତେଣୁ ଭାଜପା ଛାଡି କଂଗ୍ରେସକୁ ମଜଭୁତ କରିବାକୁ ସେ ପ୍ରତିନିଧିମାନଙ୍କୁ ନିବେଦନ କରିଛନ୍ତି।
ଦିଗବିଜୟ ସିଂ ଲଗାତାର ମଧ୍ୟପ୍ରଦେଶର ହାରିଯାଇଥିବା ବିଧାନସଭା ଆସନ ଗସ୍ତ କରୁଛନ୍ତି। ଏହି ସମୟରେ ସେ ସାଧାରଣ ଭୋଟରଙ୍କୁ ବହୁ ମହତ୍ୱପୂର୍ଣ୍ଣ କଥା ବି କହୁଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ଆଉ ଏକ ବଡ ଘୋଷଣା କରିଛନ୍ତି। ସେ କହିଛନ୍ତି, ପଞ୍ଚାୟତିରାଜକୁ ମଜଭୁତ କରିବାକୁ ନିର୍ବାଚିତ ହୋଇଥିବା ପ୍ରତିନିଧିଙ୍କୁ ୧୯୯୩-୨୦୦୩ ମଧ୍ୟରେ ଦିଆଯାଇଥିବା ସମସ୍ତ ଅଧିକାର ଫେରାଇ ଦିଆଯିବ। ସୂଚନାଯୋଗ୍ୟ, ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂ ପଞ୍ଚାୟତ ରାଜକୁ ମଜଭୁତ କରିବାକୁ ଜିଲା ସରକାରର ସ୍ଥାପନା କରିଥିଲେ। ଏହି ସମୟରେ ଜିଲା ପଞ୍ଚାୟତ ଅଧ୍ୟକ୍ଷଙ୍କୁ ରାଜ୍ୟ ମନ୍ତ୍ରୀର ଅଧିକାର ଦିଆଯାଇଥିଲା।