ମୁମ୍ବାଇ: ବଲିଉଡ୍ ନାୟକ ସୁଶାନ୍ତ ସିଂ ରାଜପୁତ ଆଜି ସମସ୍ତଙ୍କୁ ପର କରି ଅଫେରା ରାଇଜର ପଥିକ ସାଜିଥିବା ବେଳେ ଏବେବି ତାଙ୍କ ପ୍ରତି ଦର୍ଶକଙ୍କର ଭଲ ପାଇବା ଦେଖିବାକୁ ମିଳିଛି। ମଙ୍ଗଳବାର ସୁଶାନ୍ତଙ୍କ ଶେଷ ଅଭିନୀତ ଫିଲ୍ମର ଟ୍ରେଲର ରିଲିଜ୍ ହୋଇଥିବା ବେଳେ ଏହା ଏବେ ଇତିହାସ ରଚିଛି। ପୂର୍ବରୁ ଏହାକୁ ଦେଖିବାକୁ ପାଗଳ ଭଳି ଦର୍ଶକେ ଅପେକ୍ଷା ରଖିଥିବା ବେଳେ ଏହାକୁ ମାତ୍ର ୪ ଘଣ୍ଟାରେ ସବୁଠାରୁ ଅଧିକ ଲାଇକ୍ସ ମିଳି ସାରିଛି। ଫଟୋ ଜର୍ନାଲିଷ୍ଟ ବରିନ୍ଦର ଚାଓ୍ବାଲା ସୋସିଆଲ ମିଡିଆରେ ପୋଷ୍ଟ କରି ସୂଚନା ଦେଇଛନ୍ତି କି ‘ଦିଲ ବେଚାରା’ ଟ୍ରେଲରକୁ ୪ ଘଣ୍ଟା ମଧ୍ୟରେ ୩ ମିଲିୟନ୍ ଲାଇକ୍ସ ମିଳି ସାରିଛି। ଯାହାକି ଏକ ରେକର୍ଡ। ଏବେ ଏହି ଟ୍ରେଲର ଭାରତୀୟ ଚଳଚ୍ଚିତ୍ର ଜଗତର ସବୁଠାରୁ ଅଧିକ ପସନ୍ଦ କରାଯାଉଥିବା ଟ୍ରେଲର ଭାବେ ଇତିହାସ ରହିଛି ବୋଲି ସେ କହିଛନ୍ତି। ଡିଜିଟାଲ ପ୍ରିମୟର ପରେ ସୁଶାନ୍ତଙ୍କ ଅଭିନୀତ ଏହି ଫିଲ୍ମ ଆହୁରି ରେକର୍ଡ କରିବ ବୋଲି ଚାଓ୍ବଲା ଦାବି କରିଛନ୍ତି।