ଭୁବନେଶ୍ୱର, ୧୯।୯ (କ୍ରୀଡ଼ା ପ୍ରତିନିଧି): ଉଗାଣ୍ଡାର କାମ୍ପାଲାଠାରେ ଅନୁଷ୍ଠିତ ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନ ଚାମ୍ପିୟନଶିପ୍ରେ ଭାରତ ପକ୍ଷରୁ ପ୍ରତିନିଧିତ୍ୱ କରୁଥିବା ଓଡ଼ିଶାର ୩ ଜଣ ଯାକ ପ୍ରତିଯୋଗୀ ପଦକ ହାସଲ କରିଛନ୍ତି। ଜି. ଦିଲେଶ୍ୱର ରାଓ ସିଙ୍ଗଲ୍ସରେ ରୌପ୍ୟ, ଡବଲ୍ସରେ ସ୍ବର୍ଣ୍ଣ, ଅମରେନ୍ଦ୍ର ବେହେରା ଡବଲ୍ସରେ ରୌପ୍ୟ ଏବଂ ନୁରୁଲ ହୋସେନ ଖାଁ ସିଙ୍ଗଲ୍ସ ଓ ଡବଲ୍ସରେ ବ୍ରୋଞ୍ଜ ପଦକ ହାସଲ କରିଛନ୍ତି। ଡବଲ୍ସରେ ଦିଲେଶ୍ୱର ଓ ନବୀନ ଶିବକୁମାର ଯୋଡ଼ି ନିଜ ଦେଶର ଅମରେନ୍ଦ୍ର ବେହେରା ଓ ଅଭିଜିତ ସାଖୁଜାଙ୍କୁ ୨୧-୧୮, ୨୧-୧୯ରେ ହରାଇ ଚାମ୍ପିୟନ ହୋଇଥିଲେ।
ଫଳରେ ଅମରେନ୍ଦ୍ର ଓ ସାଖୁଜାଙ୍କୁ ରୌପ୍ୟରେ ସନ୍ତୁଷ୍ଟ ହେବାକୁ ପଡ଼ିଥିଲା। ଦିଲେଶ୍ୱର କିନ୍ତୁ ସିଙ୍ଗଲ୍ସ ଫାଇନାଲରେ ଅନ୍ୟତମ ଭାରତୀୟ ଶାରାନ୍ନାପ୍ପାଙ୍କଠାରୁ ୧୬-୨୧, ୧୮-୨୧ରେ ହାରି ରୌପ୍ୟ ପଦକ ପାଇଛନ୍ତି। ସେହିପରି ନୁରୁଲ ହୋସେନ ହୁଇଲଚେୟାର-୨ ଇଭେଣ୍ଟର ସିଙ୍ଗଲ୍ସ ସେମିଫାଇନାଲରେ ଜାପାନର ମାତ୍ସୁମୋତୋ ତାକୁମିଙ୍କଠାରୁ ୧୨-୨୧, ୬-୨୧ରେ ହାରି ଯାଇଥିଲେ। ସେହିପରି ନୀରଜ କୁମାରଙ୍କୁ ସାଥିକରି ଡବଲ୍ସ ଖେଳିଥିବା ନୁରୁଲ ଭାରତର ଅନ୍ୟ ଯୋଡ଼ି ମାନ୍ନା ଖଲିଦ ଓ ଶଶାଙ୍କ କୁମାରଙ୍କଠାରୁ ସେମିଫାଇନାଲରେ ୬-୨୧, ୭-୨୧ରେ ପରାଜିତ ହୋଇଥିଲେ। ନିୟମ ଅନୁସାରେ ପରାଜିତ ସେମିଫାଇନାଲିଷ୍ଟଭାବେ ସେ ୨ଟି ବ୍ରୋଞ୍ଜ ପଦକ ପାଇଥିଲେ। ଓଡ଼ିଶା ପ୍ରତିଯୋଗୀଙ୍କ ୧ ସ୍ବର୍ଣ୍ଣ, ୨ ରୌପ୍ୟ ଓ ୨ ବ୍ରୋଞ୍ଜ ପଦକ ବିଜୟରେ ଓଡ଼ିଶା ଦଳର କୋଚ୍ ତଥା ପାରା ସ୍ପୋଟର୍ସ ଆସୋସିଏଶନ ଅଫ୍ ଓଡ଼ିଶା ଅଧ୍ୟକ୍ଷ ଶିବ ପ୍ରସାଦ ଦାସ ଅଭିନନ୍ଦନ ଜଣାଇଛନ୍ତି।