ମୁମ୍ବାଇ,୬।୪: ଦୀନେଶ କାର୍ତ୍ତିକଙ୍କ ମ୍ୟାଚ୍ ଓ୍ବିନିଂ ପାଳି ଯୋଗୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ୪ ଉଇକେଟରେ ରାଜସ୍ଥାନ ରୟାଲ୍ସକୁ ହରାଇ ଦେଇଛି। ସଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହେଉଥିବା ବେଳେ ସେ ୨୩ ବଲରେ ଖେଳିଥିଲେ ୪୪ ରନ୍ର ଅପରାଜିତ ପାଳି। ଏଭଳି ପ୍ରଦର୍ଶନ ପରେ ଉଇକେଟ କିପର ବ୍ୟାଟରଙ୍କୁ ପ୍ରଶଂସାରେ ପୋତି ପକାଇଛନ୍ତି ଅଧିନାୟକ ଫାଫ ଡୁ ପ୍ଲେସି। ଏପରିକି ତାଙ୍କୁ ଅନ୍ତର୍ଜାତୀୟ କ୍ରିକେଟକୁ ଫେରିବା ଦରକାର ବୋଲି ସେ କହିଛନ୍ତି।
“ଡିକେ ତାଙ୍କ କ୍ୟାରିୟରର ଶ୍ରେଷ୍ଠ କ୍ରିକେଟ ଖେଳୁଛନ୍ତି। ମୋ ମତରେ ତାଙ୍କୁ ଅନ୍ତର୍ଜାତୀୟ କ୍ରିକେଟକୁ ଫେରିବା ଦରକାର। ଯେଉଁ ଭଳି ସ୍ଥିତିରେ ଫସିଥିଲୁ, ସେଠାରୁ ବାହାର କରିବା ପାଇଁ ଡିକେଙ୍କ ଭଳି ଖେଳାଳି ନିହାତି ଆବଶ୍ୟକ। ଶେଷ ଆଡ଼କୁ ତାଙ୍କ କମ୍ପୋଜର ଅବିଶ୍ୱସନୀୟ। ସେ ଆର୍ସିବି ପାଇଁ ଗୁରୁତ୍ୱପୂର୍ଣ୍ଣ ସମ୍ପତ୍ତି। ନିମ୍ନକ୍ରମରେ ସେ ବ୍ୟାଟିଂ କରୁଥିବାରୁ ଅନ୍ୟ ଖେଳାଳିଙ୍କୁ ସ୍ବାଭାବିକ ଖେଳିବାକୁ ଅନୁମତି ମିଳୁଛି” ବୋଲି ପୂର୍ବତନ ଦକ୍ଷିଣ ଆଫ୍ରିକୀୟ ଅଧିନାୟକ କହିଛନ୍ତି।
କାର୍ତ୍ତିକ ଅନେକ ଥର ଭାରତୀୟ ଦଳକୁ ଫେରିଛନ୍ତି। ସେ ଅନ୍ତିମ ଥର ୨୦୧୯ ବିଶ୍ୱକପ୍ରେ ଖେଳିଥିଲେ। ସେ ଭାରତୀୟ ଦଳକୁ ଫିନିଶର ଭାବେ ଫେରିବାକୁ ଚାହୁଁଛନ୍ତି।