ବେଜିଂ, ୨୩ା୧୨: ଦକ୍ଷିଣ ଚାଇନାର ଗାନ୍ଝୌରୁ ବୈଜ୍ଞାନିକମାନେ ଡାଇନୋସରର ଏକ ଭ୍ରୂଣକୁ ପାଇଛନ୍ତି। ପ୍ରାୟ ୬.୬ରୁ ୭.୨ କୋଟି ବର୍ଷ ତଳୁ ଏହା ସଂରକ୍ଷିତ ଅବସ୍ଥାରେ ରହିଥିଲା ଏବଂ ଭ୍ରୂଣଟି ଅଣ୍ଡାରୁ ବାହାରକୁ ବାହାରିବାକୁ ଚେଷ୍ଟା କରୁଥିଲା। ଏ ନେଇ ବର୍ମିଂହାମ୍ ୟୁନିଭର୍ସିଟି ଗବେଷକ ଫିଓନ ଓ୍ବାଇସମ୍ ମା କହିଛନ୍ତି। ଏହାର ନାମ ‘ବେବି ୟିଙ୍ଗଲିଆଙ୍ଗ’ ରଖାଯାଇଛି। ଏହି ଡାଇନୋସର ଓଭିରାପ୍ଟୋରସର ପ୍ରଜାତିର, ଯାହାର ଦାନ୍ତ ନ ଥାଏ ବୋଲି ଜଣାପଡ଼ିଛି। ଡାଇନୋସର ଜୀବାଶ୍ମ ମଧ୍ୟରୁ ଇତିହାସର ଏହା ସବୁଠୁ ବଡ଼ ସନ୍ଧାନ ବୋଲି ସେ କହିଛନ୍ତି।
ଭିତରେ ବେବି ୟିଙ୍ଗଲିଆଙ୍ଗର ମୁଣ୍ଡ ଏହାର ଶରୀର ତଳେ ରହିଥିଲା। ଗୋଡ଼ ମୁଣ୍ଡର ଉଭୟ ପାର୍ଶ୍ୱରେ ରହିଥିବାବେଳେ ପଛଭାଗ ଅଣ୍ଡାକାର ଭାବେ ମୋଡ଼ି ହୋଇ ଥିଲା। ଆଧୁନିକ ପକ୍ଷୀଙ୍କ ଭ୍ରୂଣ ଏପରି ଅବସ୍ଥାରେ ରହିଥାନ୍ତି। ‘ଡେଲି ମେଲ୍’ର ରିପୋର୍ଟ ଅନୁଯାୟୀ, ଏହା ପ୍ରାୟ ଜନ୍ମ ହେବାର ନିକଟତର ହୋଇଯାଇଥିଲା। ପକ୍ଷୀଙ୍କ କ୍ଷେତ୍ରରେ ସେମାନଙ୍କ ଶାରୀରିକ କାର୍ଯ୍ୟ କେନ୍ଦ୍ରୀୟ ସ୍ନାୟୁ ପ୍ରଣାଳୀ ଦ୍ୱାରା ନିୟନ୍ତ୍ରିତ ହୋଇଥାଏ, ଯାହାକୁ ଟକିଂ ବୋଲି କୁହାଯାଏ। ଏହା ମାଧ୍ୟମରେ ଭ୍ରୂଣ ନିଜର ମୁଣ୍ଡକୁ ସ୍ଥିର ଓ ମଜଭୁତ କରି ଅଣ୍ଡାକୁ ଫଟାଇପାରିଥାଏ। ଟକିଂରେ ବିଫଳ ହେଲେ ଭ୍ରୂଣ ବାହାରକୁ ବାହାରି ନ ପାରି ସେଠାରେ ମରିଯାଇଥାଏ। ଏବେ ମିଳିଥିବା ଡାଇନୋସର ଭ୍ରୂଣ ଅଣ୍ଡା ଫଟାଇବା ଅବସ୍ଥାରେ ରହିଥିଲା ବୋଲି ଗବେଷକମାନେ ଜାଣିବାକୁ ପାଇଛନ୍ତି। ଏହି ଭ୍ରୂଣର ଲମ୍ବ ୨୭ ସେଣ୍ଟିମିଟର ଏବଂ ତାହା ୧୭ ସେଣ୍ଟିମିଟର ଲମ୍ବର ଅଣ୍ଡା ଭିତରେ ରହିଥିଲା। ବେବି ୟିଙ୍ଗଲିଆଙ୍ଗ ଉପରେ ଅଧିକ ଗବେଷଣା ଦ୍ୱାରା ଡାଇନୋସର ଉପରେ ଅଧିକ ତଥ୍ୟ ଜଣାପଡ଼ିବ ବୋଲି ରିସର୍ଚ୍ଚର ଟିମ୍ ଆଶା ରଖିଛନ୍ତି।