ବମ୍ବେ: ଲୋକପ୍ରିୟ ଅଭିନେତ୍ରୀ ତଥା ବିଗ୍ବସ୍ ଫେମ୍ ଦୀପିକା କକ୍କଡ଼-ଅଭିନେତା ଶୋଏବ ଇବ୍ରାହିମ୍ଙ୍କ ଯୋଡ଼ିକୁ ବେଶ୍ ପସନ୍ଦ କରାଯାଏ। ଇତି ମଧ୍ୟରେ ଉଭୟଙ୍କ ବିବାହର ତିନି ବର୍ଷ ପୂରଣ ହୋଇଛି। ଖାସ୍ ଦିନକୁ ଆହୁରି ସ୍ବତନ୍ତ୍ର କରିବାକୁ ଯାଇ ପରସ୍ପରକୁ ନିଆରା ବାର୍ତ୍ତା ଦେଇଛନ୍ତି ଏହି ଟେଲି କପଲ୍।
ଦୀପିକା ଇନ୍ଷ୍ଟ୍ରାଗ୍ରାମରେ ଏକ ଫଟୋ ଶେୟାର କରିଛନ୍ତି। ଏଥିରେ ସେ ଲାଲ୍ ରଙ୍ଗର ଓଢ଼ଣୀ ପକାଇଥିବା ନଜର ଆସୁଛି। ଫଟୋ ଶେୟାର କରି ଦୀପିକା ଲେଖିଛନ୍ତି, ଶୋଏବଙ୍କ ବଧୂ ସାଜିବାର ତିନି ବର୍ଷ ବିତିଛି। ତାଙ୍କ ସହ ଜୀବନ ଦିନକୁ ଦିନ ଅଧିକ ସୁନ୍ଦର ହୋଇଯାଉଛି। ଏତେ ଭଲପାଇବା ସେ ଭରି ଦେଇଛନ୍ତି ଯେ ଏବେ ନିଜ ନଜର ଲାଗି ଯାଇପାରେ ବୋଲି ଲାଗୁଛି। ସ୍ବାମୀଙ୍କ ସହ ପରିବାରର ଭଲପାଇବା ମଧ୍ୟ ମିଳିଛି। ସେମାନଙ୍କ ବିନା ଏ ଯାତ୍ରା ସୁନ୍ଦର ହୋଇ ନ ଥାନ୍ତା। ଯେଭଳି ଆଜି। ସବା(ସୋଏବଙ୍କ ଭଉଣୀ) ଏହି ଓଢ଼ଣୀ ଉପହାରରେ ଦେଇ ଦିନକୁ ଅଧିକ ସ୍ପେଶାଲ କରିଛନ୍ତି। ତାଙ୍କ ଭାଉଜଙ୍କୁ କ’ଣ ପସନ୍ଦ ସେ ବେଶ୍ ଭଲ ଭାବେ ଜାଣନ୍ତି। ଆମକୁ ବିବାହ ବାର୍ଷିକର ଶୁଭେଚ୍ଛା। ତୁମେ ସମସ୍ତେ ମୋ ଜୀବନ। ସମସ୍ତଙ୍କ ଭିତରେ ମୋ ଆତ୍ମା ରହିଛି ବୋଲି ଦୀପିକା ଲେଖିଛନ୍ତି।
ଦୀପିକାଙ୍କ ଏଭଳି ପୋଷ୍ଟ ଆଗରେ ଫିକା ପଡ଼ି ନାହାନ୍ତି ଶୋଏବ। ସେ ନିଜର ସୋସିଆଲ ଆକାଉଣ୍ଟରେ ଦୀପିକାଙ୍କ ସହ ଏକ ରୋମାଣ୍ଟିକ ଫଟୋ ଶେୟାର କରି ଲେଖିଛନ୍ତି, ଭଲପାଇବା ତାହା ନୁହେଁ ଯେତିକି ଦିନ, ମାସ ଏବଂ ବର୍ଷ ତୁମେ ଏକାଠି ରୁହ। ପ୍ରତିଦିନ କିଏ କାହାକୁ କେତେ ଭଲପାଇଲ, ତାହା ହିଁ ପ୍ରକୃତ ପ୍ରେମ। ବିବାହ ବାର୍ଷିକୀର ଶୁଭେଚ୍ଛା ଦୀପିକା। ମୁଁ ତୁମକୁ ବହୁତ ଭଲପାଏ।
କଲର୍ସ ଚ୍ୟାନେଲରେ ପ୍ରସାରିତ ଧାରାବାହିକ ସସୁରାଲ ସିମର୍ କା ସେଟ୍ରେ ଶୋଏବଙ୍କୁ ଭେଟିଥିଲେ ଦୀପିକା। ଉଭୟ ସ୍ବାମୀସ୍ତ୍ରୀ ଭୂମିକାରେ ନଜର ଆସିଥିଲେ। ପରଦାରେ ପରସ୍ପରକୁ ପସନ୍ଦ କରିବା ପରେ ପ୍ରକୃତ ଜୀବନରେ ଉଭୟ ବନ୍ଧୁ ପାଲଟିଥିଲେ। ଧିରେ ଧିରେ ଏହା ପ୍ରେମରେ ପରିବର୍ତ୍ତନ ହୋଇଥିଲା। ହେଲେ ଶୋଏବଙ୍କ ବିବାହ ପୂର୍ବରୁ ବିବାହିତ ଥିଲେ ଦୀପିକା। ସେ ୨୦୧୧ରେ ରୌନକ ସାମସନଙ୍କୁ ବିବାହ କରିଥିଲେ। ୨୦୧୫ରେ ଉଭୟ ଅଲଗା ହୋଇଥିଲେ। ପରେ ଦୀପିକା ଶୋଏବଙ୍କୁ ବିବାହ କରିଛନ୍ତି। ବିବାହ ପାଇଁ ନିଜ ଧର୍ମ ପରିବର୍ତ୍ତନ କରିଛନ୍ତି ଦୀପିକା। କେବଳ ଏତିକି ନୁହେଁ ନିଜର ନାମକୁ ବଦଳାଇ ଫୈଜା ରଖିଛନ୍ତି। ୨୦୧୮ ଫେବୃୟାରୀରେ ଉଭୟ ବିବାହ ବନ୍ଧନରେ ଆବଦ୍ଧ ହୋଇଥିଲେ।