ଦୃଢ଼ ଇଚ୍ଛାଶକ୍ତି ସଫଳତା ଆଣେ। ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ସମ୍ବଲପୁର ଜିଲା ଧନକଉଡ଼ା ଗ୍ରାମର ମାତା ଜ୍ୟୋତ୍ସାମୟୀ ଏବଂ ପିତା ବିପିନ ବିହାରୀ ଦାଶଙ୍କ କନିଷ୍ଠ କନ୍ୟା ଦୀପ୍ତି ଦାଶ। ତୁଳସୀ ଦୁଇପତ୍ରରୁ ବାସିଲା ପରି ଛୋଟ ବେଳୁ ନାଚଗୀତ, ଖେଳକୁଦ ସବୁଠି ସେ ଥିଲେ ଆଗରେ। ହେଲେ ଖେଳକୁଦ ବୟସରେ ଅର୍ଥାତ୍ ମାତ୍ର ୧୦ ବର୍ଷ ବୟସରେ ହଠାତ୍ ତାଙ୍କ ଜୀବନରେ କଳାବାଦାଲ ମାଡ଼ି ଆସିଲା। ସେ ପକ୍ଷାଘାତ ରୋଗରେ ଆକ୍ରାନ୍ତ ହେଲେ। ଘର ଅଗଣା, ଦାଣ୍ଡ ଦୁଆରେ ପିଲାଙ୍କ ମେଳରେ ଖେଳବୁଲ କରୁଥିବା ଝିଅଟି ହଠାତ୍ ଶଯ୍ୟାଶାୟୀ ହୋଇଗଲେ। ପାଠପଢ଼ା ବନ୍ଦ ହୋଇଗଲା। ଏହା ଦେଖି ପରିବାର ଲୋକେ ଭାଙ୍ଗି ପଡ଼ିଥିଲେ। ହେଲେ ଦୀପ୍ତିଙ୍କ ମନୋବଳ ଦୃଢ଼ ଥିଲା। ଯଦିଓ ସେ ସ୍କୁଲ ଯିବାକୁ ଅସମର୍ଥ ହୋଇପଡ଼ିଥିଲେ ହେଲେ ପାଠପଢ଼ା ପ୍ରତି ଆଗ୍ରହ ଯୋଗୁ ସ୍ବାସ୍ଥ୍ୟାବସ୍ଥାରେ ଧୀରେ ଧୀରେ ଉନ୍ନତି ଆସିଥିଲା। ପରିବାର ଲୋକଙ୍କ ସହଯୋଗରେ ସେ ଘରେ ପାଠପଢ଼ି ମାଟ୍ରିକ ପାସ୍ କଲେ। ପରେ ସେ ସୋସିଆଲ ୱାର୍କ ଏବଂ ଆପ୍ଲାଏଡ୍ ସାଇକୋଲୋଜି ଉଭୟରେ ମାଷ୍ଟର ଡିଗ୍ରୀ ହାସଲ କଲେ।
ପିଲାବେଳୁ ଅନ୍ୟ ପିଲାଙ୍କ ଭଳି ତାଙ୍କର ମଧ୍ୟ ଜଣେ ଭଲ ନୃତ୍ୟଶିଳ୍ପୀ ଏବଂ ଖେଳାଳି ହେବା ଇଚ୍ଛା ଥିଲା। ତେବେ ଭାଗ୍ୟର ବିଡ଼ମ୍ବନା କାରଣରୁ ସେ ସେଥିରୁ ବଞ୍ଚତ୍ତ ହେଲେ ସତ, କିନ୍ତୁ ଜଣେ ସଚଳ ବ୍ୟକ୍ତିଙ୍କଠାରୁ କୌଣସି ଗୁଣରେ କମ୍ ନୁହନ୍ତି। ତାଙ୍କ ଭଳି କୌଣସି ଦିବ୍ୟାଙ୍ଗ ଯେପରି ଅସୁବିଧାର ସମ୍ମୁଖୀନ ନ ହେଉ, ସେଥିଲାଗି ସେ ଅନେକ ସାମାଜିକ ଅନୁଷ୍ଠାନ ସହ ଜଡ଼ିତ ରହି ଦିବ୍ୟାଙ୍ଗ ପିଲାମାନଙ୍କ ପାଇଁ କାର୍ଯ୍ୟ କରୁଛନ୍ତି। ଏଥିପାଇଁ ସେ ରାଜ୍ୟ ତଥା ଜାତୀୟ ସ୍ତରରେ ବହୁ ସୁନାମ ଅର୍ଜନ କରିବା ସହ ପ୍ରତିଭା ସମ୍ମାନର ଅଧିକାରିଣୀ ମଧ୍ୟ ହୋଇପାରିଛନ୍ତି। ଜଣେ ରିହାବିଲିଟେଶନ କନ୍ସଲଟାଣ୍ଟ ଭାବେ ଭିନ୍ନକ୍ଷମ, ମହିଳା ଓ ଶିଶୁ ମାନଙ୍କ ନିମନ୍ତେ କାମକରି ଦିବ୍ୟାଙ୍ଗଙ୍କ ପାଇଁ ସେ ପ୍ରେରଣାର ଉତ୍ସ ପାଲଟିଛନ୍ତି। ବର୍ତ୍ତମାନ ସେ ପୁରୀରେ ରହି ଜିଲା ଶିଶୁ ମଙ୍ଗଳ କମିଟି ସଦସ୍ୟ ଭାବେ କାର୍ଯ୍ୟ କରୁଛନ୍ତି।
– ପ୍ରଭାତ ପାଣିଗ୍ରାହୀ