ନୂଆଦିଲ୍ଲୀ, ୧୨।୨: ଚଳିତ ଆର୍ଥିକ ବର୍ଷର ଫେବୃୟାରୀ ୧୦ ମଧ୍ୟରେ ପ୍ରତ୍ୟକ୍ଷ ଟିକସ ସଂଗ୍ରହ ପ୍ରାୟ ୧୬ (୧୫.୬୭) ଲକ୍ଷ କୋଟି ଟଙ୍କା ହୋଇଥିବା ଶନିବାର ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଏପରିକି ୨୦୨୨-୨୩ ଆର୍ଥିକ ବର୍ଷର ଏ ପର୍ଯ୍ୟନ୍ତ ସୁଦ୍ଧା ୨୪.୦୯% ବୃଦ୍ଧି ହୋଇଥିବା ଜଣାପଡ଼ିଛି। ବିଶେଷକରି କରଦାତାଙ୍କର ରିଫଣ୍ଡ ଜାରି କରିବା ପରେ ଡାଇରେକ୍ଟ ଟ୍ୟାକ୍ସ ସଂଗ୍ରହ ରାଶି ୧୨.୯୮ ଲକ୍ଷ କୋଟି ଟଙ୍କା ରହିଛି, ଯାହା ଗତ ଆର୍ଥିକ ବର୍ଷ ତୁଳନାରେ ୧୮.୪୦% ରୁ ଅଧିକ ବୋଲି କୁହାଯାଉଛି। ଏ ନେଇ ଅର୍ଥ ମନ୍ତ୍ରଣାଳୟ କହିଛି, ଡାଇରେକ୍ଟ ଟ୍ୟାକ୍ସ କଲେକ୍ସନ ବଜେଟ ଆକଳନର ୯୧.୩୯% ହୋଇଥିବା ବେଳେ ୨୦୨୨-୨୩ ଆର୍ଥିକ ବର୍ଷର ରିଭାଇଜ୍ଡ ଏଷ୍ଟିମେଟ (ଆର୍ଇ)ର ଏହା ୭୮.୬୫% ରହିଛି। ଏହି ଅବଧି ଭିତରେ କର୍ପୋରେଟ୍ ଇନ୍କମ୍ ଟ୍ୟାକ୍ସରେ ୧୯.୩୩% ବୃଦ୍ଧି ଦେଖିବାକୁ ମିଳିଛି। ସେହିପରି ପର୍ସନାଲ ଇନ୍କମ ଟ୍ୟାକ୍ସ ଓ ଶେୟାର କିଣାବିକା ହେଉଥିବା ସିକ୍ୟୁରିଟି ଟ୍ରାଞ୍ଜାକ୍ସନ ଟ୍ୟାକ୍ସକୁ ମିଶାଇ ମୋଟ ୨୯.୬୩% ଟ୍ୟାକ୍ସ ଆଦାୟ ହୋଇଛି। ରିଫଣ୍ଡକୁ ଆଡ୍ଜଷ୍ଟ କରିବା ପରେ କର୍ପୋରେଟ୍ ଇନ୍କମ ଟ୍ୟାକ୍ସରେ ୧୫.୮୪% ଓ ପର୍ସନାଲ ଇନ୍କମ୍ ଟ୍ୟାକ୍ସରେ ୨୧.୯୩ % ଆଦାୟ ବଢ଼ିଛି। ସେହିପରି ପର୍ସନାଲ ଇନ୍କମ୍ ଟ୍ୟାକ୍ସରେ ସିକ୍ୟୁରିଟି ଟ୍ରାଞ୍ଜାକ୍ସନ ଟ୍ୟାକ୍ସକୁ ମିଶାଇଲେ ଟ୍ୟାକ୍ସ କଲେକ୍ସନରେ ୨୧.୨୩%ବୃଦ୍ଧି ଦେଖିବାକୁ ମିଳିଛି। ଅର୍ଥ ମନ୍ତ୍ରଣାଳୟ ସୂଚନା ଅନୁସାରେ ୨୦୨୨ ଏପ୍ରିଲ ୧ରୁ ଆରମ୍ଭକରି ୨୦୨୩ ଫେବୃୟାରୀ ୧୦ ପର୍ଯ୍ୟନ୍ତ ମୋଟ ୨.୬୯ ଲକ୍ଷ କୋଟି ରିଫଣ୍ଡ ଜାରି କରାଯାଇଛି, ଯାହା ଗତବର୍ଷର ସମସ୍ତ ଅବଧି ତୁଳନାରେ ୬୧.୫୮% ରୁ ଅଧିକ ବୋଲି କୁହାଯାଉଛି। ସୂଚନାଯୋଗ୍ୟ, ୨୦୨୨-୨୩ ଆର୍ଥକ ବର୍ଷରେ କେନ୍ଦ୍ର ସରକାର ୧୪.୨୦ % ଟ୍ୟାକ୍ସ କଲେକ୍ସନ ହେବ ବୋଲି ଲକ୍ଷ୍ୟଧାର୍ଯ୍ୟ କରିଥିଲେ। ହେଲେ ଏହାଠାରୁ ଅଧିକ ଟିକସ ଆଦାୟ ହୋଇଛି ବୋଲି କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି।