ନୂଆଦିଲ୍ଲୀ,୧୨।୧: ଗତ ମାସ ଭଳି ଚଳିତ ମାସରେ ମଧ୍ୟ ପ୍ରତ୍ୟକ୍ଷ ଟିକସ ସଂଗ୍ରହ ବୃଦ୍ଧି ପାଇଛି। ଏପରିକି ଚଳିତ ବର୍ଷ ଜାନୁୟାରୀ ୧୦ ତାରିଖ ମଧ୍ୟରେ ପ୍ରାୟ ୧୫ ଲକ୍ଷ କୋଟି ଟଙ୍କା ଟିକସ ଆକାରରେ ଆଦାୟ କରାଯାଇଛି। ବିଶେଷ କରି ପ୍ରତ୍ୟକ୍ଷ ଟିକସ ସଂଗ୍ରହରେ ପ୍ରାୟ ୨୫% (୨୪.୫୮%) ବୃଦ୍ଧି ଘଟିଥିବା କେନ୍ଦ୍ରୀୟ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ (ସିବିଡିଟି) ପକ୍ଷରୁ ବୁଧବାର ବିସ୍ତୃତ ସୂଚନା ଦିଆଯାଇଛି। ଏତଦ୍ବ୍ୟତୀତ ଦେଶରେ ନେଟ୍ ପ୍ରତ୍ୟକ୍ଷ ଟିକସ ବାବଦକୁ ୧୨.୩୧ ଲକ୍ଷ କୋଟି ଟଙ୍କା ସଂଗ୍ରହ ହୋଇଥିବା ଜଣାପଡିଛି, ଯାହାକି ଗତବର୍ଷ ସମାନ ଅବଧି ତୁଳନାରେ ଏହା ୧୯.୫୫% ଅଧିକ ରହିଛି ବୋଲି ସିବିଡିଟି ପକ୍ଷରୁ କୁହାଯାଇଛି।
ସେହିଭଳି ଚଳିତ ଆର୍ଥିକ ବର୍ଷ ପାଇଁ ପ୍ରତ୍ୟକ୍ଷ ଟିକସ ସଂଗ୍ରହରେ ମୋଟ ବଜେଟ ଆକଳନରୁ ନେଟ୍ ସଂଗ୍ରହ ୮୬.୬୮% ଏବଂ ବଜେଟରେ ଏହି ଆର୍ଥିକ ବର୍ଷରେ ୧୪.୨୦ ଲକ୍ଷ କୋଟି ଟଙ୍କା ପ୍ରତ୍ୟକ୍ଷ ଟିକସ ସଂଗ୍ରହ ହେବ ବୋଲି ଅର୍ଥ ମନ୍ତ୍ରଣାଳୟ ପକ୍ଷରୁ ଆକଳନ କରାଯାଇଛି। ୨୦୨୨-୨୩ ଆର୍ଥିକ ବର୍ଷରେ କର୍ପୋରେଟ ଟିକସ ବାବଦକୁ ୧୯.୭୨% ବୃଦ୍ଧି ପାଇଥିବାବେଳେ ବ୍ୟକ୍ତିଗତ ଆୟକର ଟ୍ୟାକ୍ସ ସଂଗ୍ରହରେ ୩୦.୪୬% ବୃଦ୍ଧି ଘଟିଛି। ସେହିପରି ଚଳିତ ବର୍ଷ ଜାନୁୟାରୀ ୧୦ ମଧ୍ୟରେ ଦେଶର ପ୍ରତ୍ୟକ୍ଷ ଟିକସ ସଂଗ୍ରହରେ ୧୪.୭୧ ଲକ୍ଷ କୋଟି ଟଙ୍କା ରହିଛି, ଯାହାକି ମୋଟ ସଂଗ୍ରହଠାରୁ ୨୪.୫୮% ଅଧିକ ବୋଲି ସିବିଟିଡି ପକ୍ଷରୁ କୁହାଯାଇଛି।
