କଟକ ଅଫିସ,୨୧ା୨:ଅଭିନେତ୍ରୀ ପ୍ରକୃତି ମିଶ୍ରଙ୍କୁ ଆକ୍ରମଣ ମାମଲାରେ ୨ମାସ ମଧ୍ୟରେ ଆଇନ ଅନୁଯାୟୀ ତଦନ୍ତ ଶେଷ କରିବା ନିମନ୍ତେ ହାଇକୋର୍ଟ ଭୁବନେଶ୍ୱର ଡିସିପିଙ୍କୁ ସୋମବାର ନିର୍ଦ୍ଦେଶ ଦେଇଛନ୍ତି। ବିଚାରପତି ଡ. ସଞ୍ଜୀବ ପାଣିଗ୍ରାହୀଙ୍କ ଖଣ୍ଡପୀଠ ମାମଲାର ଶୁଣାଣି କରି ମାମଲାର ପୂର୍ଣ୍ଣଚ୍ଛେଦ ପକାଇଛନ୍ତି।
ହାଇକୋର୍ଟରେ ଅଭିନେତ୍ରୀ ପ୍ରକୃତି ଦର୍ଶାଇଥିଲେ ଯେ, ତାଙ୍କ ପ୍ରତି ହୋଇଥିବା ଆକ୍ରମଣରେ ଯେଉଁସବୁ ଦଫା ଲାଗିବା କଥା ତାହା ପୋଲିସ ଲଗାଇନାହିଁ। ଏପରିକି ଏନେଇ ପ୍ରକୃତିଙ୍କ ପକ୍ଷରୁ ଡିସିପିଙ୍କୁ ଅଭିଯୋଗ କରାଯାଇଥିବାବେଳେ ଖାରବେଳନଗର ଥାନା ପୋଲିସ ଚାର୍ଜଶିଟ୍ ଦାଖଲ କରିସାରିଛି। କିନ୍ତୁ ଘଟଣାର ଉପଯୁକ୍ତ ତଦନ୍ତ କରାଯାଇନାହିଁ କି ଉପଯୁକ୍ତ ଦଫା ଲଗାଯାଇନାହିଁ। ଭୁବନେଶ୍ବର ଡିସିପିଙ୍କ ନିକଟରେ ପ୍ରକୃତିଙ୍କ ଅଭିଯୋଗ ବିଚାରାଧୀନ ଥିବା ବେଳେ କିଛି ପଦକ୍ଷେପ ନିଅଯାଇନାହିଁ। ସୋମବାର ହାଇକୋର୍ଟରେ ପୋଲିସ ନିଷ୍କ୍ରିୟତା ବିରୋଧରେ ଦାୟର ମାମଲାର ଶୁଣାଣି ସମୟରେ ପ୍ରକୃତିଙ୍କ ତରଫରୁ ଆଇନଜୀବୀ ବ୍ୟୋମକେଶ ତ୍ରିପାଠୀ ଏପରି ଯୁକ୍ତି ଉପସ୍ଥାପନ କରିଥିଲେ। ପ୍ରକୃତିଙ୍କ ଅଭିଯୋଗ ଉପରେ ଶୁଣାଣି କରି ଡିସିପି ୨ ମାସ ଭିତରେ ନିଷ୍ପତ୍ତି ନେବେ ବୋଲି ହାଇକୋର୍ଟ କହିଛନ୍ତି। ସୂଚନାଯୋଗ୍ୟ, ପୋଲିସ ତଦନ୍ତରେ ନିଷ୍କ୍ରିୟତା ଅଭିଯୋଗ କରି ପ୍ରକୃତି ୨୦୨୨ ଅଗଷ୍ଟ ୨୩ରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ।